Sukta 19

19.1

13 barhaspatyo bharadvajah, indrah, trishtup

म॒हाँ इन्द्रो॑ नृ॒वदा च॑र्षणि॒प्रा उ॒त द्वि॒बर्हा॑ अमि॒नः सहो॑भिः ।
अ॒स्म॒द्र्य॑ग्वावृधे वी॒र्या॑यो॒रुः पृ॒थुः सुकृ॑तः क॒र्तृभि॑र्भूत् ॥१॥

Maham indro nrivada charshanipra uta dvibarha aminah sahobhih
Asmadryagvavridhe viryayoruh prithuh sukritah kartribhirbhut

19.2

इन्द्र॑मे॒व धि॒षणा॑ सा॒तये॑ धाद् बृ॒हन्त॑मृ॒ष्वम॒जरं॒ युवा॑नम् ।
अषा॑ळ्हेन॒ शव॑सा शूशु॒वांसं॑ स॒द्यश्चि॒द् यो वा॑वृ॒धे असा॑मि ॥२॥

Indrameva dhishana sataye dhad brihantamrishvamajaram yuvanam
Ashalhena shavasa shushuvansam sadyashchid yo vavridhe asami

19.3

पृ॒थू क॒रस्ना॑ बहु॒ला गभ॑स्ती अस्म॒द्र्य१क् सं मि॑मीहि॒ श्रवां॑सि ।
यू॒थेव॑ प॒श्वः प॑शु॒पा दमू॑ना अ॒स्माँ इ॑न्द्रा॒भ्या व॑वृत्स्वा॒जौ ॥३॥

Prithu karasna bahula gabhasti asmadrya1k sam mimihi shravansi
Yutheva pashvah pashupa damuna asmam indrabhya vavritsvajau

19.4

तं व॒ इन्द्रं॑ च॒तिन॑मस्य शा॒कैरि॒ह नू॒नं वा॑ज॒यन्तो॑ हुवेम ।
यथा॑ चि॒त् पूर्वे॑ जरि॒तार॑ आ॒सुरने॑द्या अनव॒द्या अरि॑ष्टाः ॥४॥

Tam va indram chatinamasya shakairiha nunam vajayanto huvema
Yatha chit purve jaritara asuranedya anavadya arishtah

19.5

धृ॒तव्र॑तो धन॒दाः सोम॑वृद्ध॒ः स हि वा॒मस्य॒ वसु॑नः पुरु॒क्षुः ।
सं ज॑ग्मिरे प॒थ्या॒३ रायो॑ अस्मिन् त्समु॒द्रे न सिन्ध॑वो॒ याद॑मानाः ॥५॥

Dhritavrato dhanadah somavriddhah sa hi vamasya vasunah purukshuh
Sam jagmire pathya3 rayo asmin tsamudre na sindhavo yadamanah

19.6

शवि॑ष्ठं न॒ आ भ॑र शूर॒ शव॒ ओजि॑ष्ठ॒मोजो॑ अभिभूत उ॒ग्रम् ।
विश्वा॑ द्यु॒म्ना वृष्ण्या॒ मानु॑षाणाम॒स्मभ्यं॑ दा हरिवो माद॒यध्यै॑ ॥६॥

Shavishtham na a bhara shura shava ojishthamojo abhibhuta ugram
Vishva dyumna vrishnya manushanamasmabhyam da harivo madayadhyai

19.7

यस्ते॒ मद॑ः पृतना॒षाळमृ॑ध्र॒ इन्द्र॒ तं न॒ आ भ॑र शूशु॒वांस॑म् ।
येन॑ तो॒कस्य॒ तन॑यस्य सा॒तौ मं॑सी॒महि॑ जिगी॒वांस॒स्त्वोता॑ः ॥७॥

Yaste madah pritanashalamridhra indra tam na a bhara shushuvansam
Yena tokasya tanayasya satau mansimahi jigivansastvotah

19.8

आ नो॑ भर॒ वृष॑णं॒ शुष्म॑मिन्द्र धन॒स्पृतं॑ शूशु॒वांसं॑ सु॒दक्ष॑म् ।
येन॒ वंसा॑म॒ पृत॑नासु॒ शत्रू॒न् तवो॒तिभि॑रु॒त जा॒मीँरजा॑मीन् ॥८॥

A no bhara vrishanam shushmamindra dhanaspritam shushuvansam sudaksham
Yena vansama pritanasu shatrun tavotibhiruta jaminrajamin

19.9

आ ते॒ शुष्मो॑ वृष॒भ ए॑तु प॒श्चादोत्त॒राद॑ध॒रादा पु॒रस्ता॑त् ।
आ वि॒श्वतो॑ अ॒भि समे॑त्व॒र्वाङिन्द्र॑ द्यु॒म्नं स्व॑र्वद्धेह्य॒स्मे ॥९॥

A te shushmo vrishabha etu pashchadottaradadharada purastat
A vishvato abhi sametvarvangindra dyumnam svarvaddhehyasme

19.10

नृ॒वत् त॑ इन्द्र॒ नृत॑माभिरू॒ती वं॑सी॒महि॑ वा॒मं श्रोम॑तेभिः ।
ईक्षे॒ हि वस्व॑ उ॒भय॑स्य राज॒न् धा रत्नं॒ महि॑ स्थू॒रं बृ॒हन्त॑म् ॥१०॥

Nrivat ta indra nritamabhiruti vansimahi vamam shromatebhih
Ikshe hi vasva ubhayasya rajan dha ratnam mahi sthuram brihantam

19.11

म॒रुत्व॑न्तं वृष॒भं वा॑वृधा॒नमक॑वारिं दि॒व्यं शा॒समिन्द्र॑म् ।
वि॒श्वा॒साह॒मव॑से॒ नूत॑नायो॒ग्रं स॑हो॒दामि॒ह तं हु॑वेम ॥११॥

Marutvantam vrishabham vavridhanamakavarim divyam shasamindram
Vishvasahamavase nutanayogram sahodamiha tam huvema

19.12

जनं॑ वज्रि॒न् महि॑ चि॒न्मन्य॑मानमे॒भ्यो नृभ्यो॑ रन्धया॒ येष्वस्मि॑ ।
अधा॒ हि त्वा॑ पृथि॒व्यां शूर॑सातौ॒ हवा॑महे॒ तन॑ये॒ गोष्व॒प्सु ॥१२॥

Janam vajrin mahi chinmanyamanamebhyo nribhyo randhaya yeshvasmi
Adha hi tva prithivyam shurasatau havamahe tanaye goshvapsu

19.13

व॒यं त॑ ए॒भिः पु॑रुहूत स॒ख्यैः शत्रो॑ःशत्रो॒रुत्त॑र॒ इत् स्या॑म ।
घ्नन्तो॑ वृ॒त्राण्यु॒भया॑नि शूर रा॒या म॑देम बृह॒ता त्वोता॑ः ॥१३॥

Vayam ta ebhih puruhuta sakhyaih shatrohshatroruttara it syama
Ghnanto vritranyubhayani shura raya madema brihata tvotah