Sukta 44

44.1

15 kashyapovatsarah (10 kshatra-manasa-evavada-yajata-sadhri- avatsarah, 11 vishvavara- yajata- mayi- avatsarah, 12 avatsarena saha sadaprina- yajata- bahuvrikta- shrutavit-taryah, 13 sutambharashcha), vishve devah, jagati, 14-15 trishtup

तं प्र॒त्नथा॑ पू॒र्वथा॑ वि॒श्वथे॒मथा॑ ज्ये॒ष्ठता॑तिं बर्हि॒षदं॑ स्व॒र्विद॑म् ।
प्र॒ती॒ची॒नं वृ॒जनं॑ दोहसे गि॒रा ऽऽशुं जय॑न्त॒मनु॒ यासु॒ वर्ध॑से ॥१॥

Tam pratnatha purvatha vishvathematha jyeshthatatim barhishadam svarvidam
Pratichinam vrijanam dohase gira shum jayantamanu yasu vardhase

44.2

श्रि॒ये सु॒दृशी॒रुप॑रस्य॒ याः स्व॑र्वि॒रोच॑मानः क॒कुभा॑मचो॒दते॑ ।
सु॒गो॒पा अ॑सि॒ न दभा॑य सुक्रतो प॒रो मा॒याभि॑र्ऋ॒त आ॑स॒ नाम॑ ते ॥२॥

Shriye sudrishiruparasya yah svarvirochamanah kakubhamachodate
Sugopa asi na dabhaya sukrato paro mayabhirrita asa nama te

44.3

अत्यं॑ ह॒विः स॑चते॒ सच्च॒ धातु॒ चाऽरि॑ष्टगातु॒ः स होता॑ सहो॒भरि॑ः ।
प्र॒सर्स्रा॑णो॒ अनु॑ ब॒र्हिर्वृषा॒ शिशु॒र्मध्ये॒ युवा॒जरो॑ वि॒स्रुहा॑ हि॒तः ॥३॥

Atyam havih sachate sachcha dhatu charishtagatuh sa hota sahobharih
Prasarsrano anu barhirvrisha shishurmadhye yuvajaro visruha hitah

44.4

प्र व॑ ए॒ते सु॒युजो॒ याम॑न्नि॒ष्टये॒ नीची॑र॒मुष्मै॑ य॒म्य॑ ऋता॒वृध॑ः ।
सु॒यन्तु॑भिः सर्वशा॒सैर॒भीशु॑भि॒ः क्रिवि॒र्नामा॑नि प्रव॒णे मु॑षायति ॥४॥

Pra va ete suyujo yamannishtaye nichiramushmai yamya ritavridhah
Suyantubhih sarvashasairabhishubhih krivirnamani pravane mushayati

44.5

सं॒जर्भु॑राण॒स्तरु॑भिः सुते॒गृभं॑ वया॒किनं॑ चि॒त्तग॑र्भासु सु॒स्वरु॑ः ।
धा॒र॒वा॒केष्वृ॑जुगाथ शोभसे॒ वर्ध॑स्व॒ पत्नी॑र॒भि जी॒वो अ॑ध्व॒रे ॥५॥

Sanjarbhuranastarubhih sutegribham vayakinam chittagarbhasu susvaruh
Dharavakeshvrijugatha shobhase vardhasva patnirabhi jivo adhvare

44.6

या॒दृगे॒व ददृ॑शे ता॒दृगु॑च्यते॒ सं छा॒यया॑ दधिरे सि॒ध्रया॒प्स्वा ।
म॒हीम॒स्मभ्य॑मुरु॒षामु॒रु ज्रयो॑ बृ॒हत् सु॒वीर॒मन॑पच्युतं॒ सह॑ः ॥६॥

Yadrigeva dadrishe tadriguchyate sam chhayaya dadhire sidhrayapsva
Mahimasmabhyamurushamuru jrayo brihat suviramanapachyutam sahah

44.7

वेत्यग्रु॒र्जनि॑वा॒न् वा अति॒ स्पृध॑ः समर्य॒ता मन॑सा॒ सूर्य॑ः क॒विः ।
घ्रं॒सं रक्ष॑न्तं॒ परि॑ वि॒श्वतो॒ गय॑म॒स्माकं॒ शर्म॑ वनव॒त् स्वाव॑सुः ॥७॥

Vetyagrurjanivan va ati spridhah samaryata manasa suryah kavih
Ghransam rakshantam pari vishvato gayamasmakam sharma vanavat svavasuh

44.8

ज्यायां॑सम॒स्य य॒तुन॑स्य के॒तुन॑ ऋषिस्व॒रं च॑रति॒ यासु॒ नाम॑ ते ।
या॒दृश्मि॒न् धायि॒ तम॑प॒स्यया॑ विद॒द् य उ॑ स्व॒यं वह॑ते॒ सो अरं॑ करत् ॥८॥

Jyayansamasya yatunasya ketuna rishisvaram charati yasu nama te
Yadrishmin dhayi tamapasyaya vidad ya u svayam vahate so aram karat

44.9

स॒मु॒द्रमा॑सा॒मव॑ तस्थे अग्रि॒मा न रि॑ष्यति॒ सव॑नं॒ यस्मि॒न्नाय॑ता ।
अत्रा॒ न हार्दि॑ क्रव॒णस्य॑ रेजते॒ यत्रा॑ म॒तिर्वि॒द्यते॑ पूत॒बन्ध॑नी ॥९॥

Samudramasamava tasthe agrima na rishyati savanam yasminnayata
Atra na hardi kravanasya rejate yatra matirvidyate putabandhani

44.10

स हि क्ष॒त्रस्य॑ मन॒सस्य॒ चित्ति॑भिरेवाव॒दस्य॑ यज॒तस्य॒ सध्रे॑ः ।
अ॒व॒त्सा॒रस्य॑ स्पृणवाम॒ रण्व॑भि॒ः शवि॑ष्ठं॒ वाजं॑ वि॒दुषा॑ चि॒दर्ध्य॑म् ॥१०॥

Sa hi kshatrasya manasasya chittibhirevavadasya yajatasya sadhreh
Avatsarasya sprinavama ranvabhih shavishtham vajam vidusha chidardhyam

44.11

श्ये॒न आ॑सा॒मदि॑तिः क॒क्ष्यो॒३ मदो॑ वि॒श्ववा॑रस्य यज॒तस्य॑ मा॒यिन॑ः ।
सम॒न्यम॑न्यमर्थय॒न्त्येत॑वे वि॒दुर्वि॒षाणं॑ परि॒पान॒मन्ति॒ ते ॥११॥

Shyena asamaditih kakshyo3 mado vishvavarasya yajatasya mayinah
Samanyamanyamarthayantyetave vidurvishanam paripanamanti te

44.12

स॒दा॒पृ॒णो य॑ज॒तो वि द्विषो॑ वधीद् बाहुवृ॒क्तः श्रु॑त॒वित् तर्यो॑ व॒ः सचा॑ ।
उ॒भा स वरा॒ प्रत्ये॑ति॒ भाति॑ च॒ यदीं॑ ग॒णं भज॑ते सुप्र॒याव॑भिः ॥१२॥

Sadaprino yajato vi dvisho vadhid bahuvriktah shrutavit taryo vah sacha
Ubha sa vara pratyeti bhati cha yadim ganam bhajate suprayavabhih

44.13

सु॒त॒म्भ॒रो यज॑मानस्य॒ सत्प॑ति॒र्विश्वा॑सा॒मूध॒ः स धि॒यामु॒दञ्च॑नः ।
भर॑द् धे॒नू रस॑वच्छिश्रिये॒ पयो॑ऽनुब्रुवा॒णो अध्ये॑ति॒ न स्व॒पन् ॥१३॥

Sutambharo yajamanasya satpatirvishvasamudhah sa dhiyamudanchanah
Bharad dhenu rasavachchhishriye payonubruvano adhyeti na svapan

44.14

यो जा॒गार॒ तमृच॑ः कामयन्ते॒ यो जा॒गार॒ तमु॒ सामा॑नि यन्ति ।
यो जा॒गार॒ तम॒यं सोम॑ आह॒ तवा॒हम॑स्मि स॒ख्ये न्यो॑काः ॥१४॥

Yo jagara tamrichah kamayante yo jagara tamu samani yanti
Yo jagara tamayam soma aha tavahamasmi sakhye nyokah

44.15

अ॒ग्निर्जा॑गार॒ तमृच॑ः कामयन्ते॒ऽग्निर्जा॑गार॒ तमु॒ सामा॑नि यन्ति ।
अ॒ग्निर्जा॑गार॒ तम॒यं सोम॑ आह॒ तवा॒हम॑स्मि स॒ख्ये न्यो॑काः ॥१५॥

Agnirjagara tamrichah kamayantegnirjagara tamu samani yanti
Agnirjagara tamayam soma aha tavahamasmi sakhye nyokah