Sukta 37

37.1

5 bhaumotrih, indrah, trishtup

सं भा॒नुना॑ यतते॒ सूर्य॑स्या॒ऽऽजुह्वा॑नो घृ॒तपृ॑ष्ठ॒ः स्वञ्चा॑ः ।
तस्मा॒ अमृ॑ध्रा उ॒षसो॒ व्यु॑च्छा॒न् य इन्द्रा॑य सु॒नवा॒मेत्याह॑ ॥१॥

Sam bhanuna yatate suryasyajuhvano ghritaprishthah svanchah
Tasma amridhra ushaso vyuchchhan ya indraya sunavametyaha

समि॑द्धाग्निर्वनवत् स्ती॒र्णब॑र्हिर्यु॒क्तग्रा॑वा सु॒तसो॑मो जराते ।
ग्रावा॑णो॒ यस्ये॑षि॒रं वद॒न्त्यय॑दध्व॒र्युर्ह॒विषाव॒ सिन्धु॑म् ॥२॥

Samiddhagnirvanavat stirnabarhiryuktagrava sutasomo jarate
Gravano yasyeshiram vadantyayadadhvaryurhavishava sindhum

व॒धूरि॒यं पति॑मि॒च्छन्त्ये॑ति॒ य ईं॒ वहा॑ते॒ महि॑षीमिषि॒राम् ।
आस्य॑ श्रवस्या॒द् रथ॒ आ च॑ घोषात् पु॒रू स॒हस्रा॒ परि॑ वर्तयाते ॥३॥

Vadhuriyam patimichchhantyeti ya im vahate mahishimishiram
Asya shravasyad ratha a cha ghoshat puru sahasra pari vartayate

न स राजा॑ व्यथते॒ यस्मि॒न्निन्द्र॑स्ती॒व्रं सोमं॒ पिब॑ति॒ गोस॑खायम् ।
आ स॑त्व॒नैरज॑ति॒ हन्ति॑ वृ॒त्रं क्षेति॑ क्षि॒तीः सु॒भगो॒ नाम॒ पुष्य॑न् ॥४॥

Na sa raja vyathate yasminnindrastivram somam pibati gosakhayam
A satvanairajati hanti vritram ksheti kshitih subhago nama pushyan

पुष्या॒त् क्षेमे॑ अ॒भि योगे॑ भवात्यु॒भे वृतौ॑ संय॒ती सं ज॑याति ।
प्रि॒यः सूर्ये॑ प्रि॒यो अ॒ग्ना भ॑वाति॒ य इन्द्रा॑य सु॒तसो॑मो॒ ददा॑शत् ॥५॥

Pushyat ksheme abhi yoge bhavatyubhe vritau sanyati sam jayati
Priyah surye priyo agna bhavati ya indraya sutasomo dadashat