Sukta 35

35.1

8 prabhuvasurangirasah, indrah, anushtup, 8 panktih

यस्ते॒ साधि॒ष्ठोऽव॑स॒ इन्द्र॒ क्रतु॒ष्टमा भ॑र ।
अ॒स्मभ्यं॑ चर्षणी॒सहं॒ सस्निं॒ वाजे॑षु दु॒ष्टर॑म् ॥१॥

Yaste sadhishthovasa indra kratushtama bhara
Asmabhyam charshanisaham sasnim vajeshu dushtaram

यदि॑न्द्र ते॒ चत॑स्रो॒ यच्छू॑र॒ सन्ति॑ ति॒स्रः ।
यद् वा॒ पञ्च॑ क्षिती॒नामव॒स्तत् सु न॒ आ भ॑र ॥२॥

Yadindra te chatasro yachchhura santi tisrah
Yad va pancha kshitinamavastat su na a bhara

आ तेऽवो॒ वरे॑ण्यं॒ वृष॑न्तमस्य हूमहे ।
वृष॑जूति॒र्हि ज॑ज्ञि॒ष आ॒भूभि॑रिन्द्र तु॒र्वणि॑ः ॥३॥

A tevo varenyam vrishantamasya humahe
Vrishajutirhi jagyisha abhubhirindra turvanih

वृषा॒ ह्यसि॒ राध॑से जज्ञि॒षे वृष्णि॑ ते॒ शव॑ः ।
स्वक्ष॑त्रं ते धृ॒षन्मन॑ः सत्रा॒हमि॑न्द्र॒ पौंस्य॑म् ॥४॥

Vrisha hyasi radhase jagyishe vrishni te shavah
Svakshatram te dhrishanmanah satrahamindra paunsyam

त्वं तमि॑न्द्र॒ मर्त्य॑ममित्र॒यन्त॑मद्रिवः ।
स॒र्व॒र॒था श॑तक्रतो॒ नि या॑हि शवसस्पते ॥५॥

Tvam tamindra martyamamitrayantamadrivah
Sarvaratha shatakrato ni yahi shavasaspate

त्वामिद् वृ॑त्रहन्तम॒ जना॑सो वृ॒क्तब॑र्हिषः ।
उ॒ग्रं पू॒र्वीषु॑ पू॒र्व्यं हव॑न्ते॒ वाज॑सातये ॥६॥

Tvamid vritrahantama janaso vriktabarhishah
Ugram purvishu purvyam havante vajasataye

अ॒स्माक॑मिन्द्र दु॒ष्टरं॑ पुरो॒यावा॑नमा॒जिषु॑ ।
स॒यावा॑नं॒ धने॑धने वाज॒यन्त॑मवा॒ रथ॑म् ॥७॥

Asmakamindra dushtaram puroyavanamajishu
Sayavanam dhanedhane vajayantamava ratham

अ॒स्माक॑मि॒न्द्रेहि॑ नो॒ रथ॑मवा॒ पुरं॑ध्या ।
व॒यं श॑विष्ठ॒ वार्यं॑ दि॒वि श्रवो॑ दधीमहि दि॒वि स्तोमं॑ मनामहे ॥८॥

Asmakamindrehi no rathamava purandhya
Vayam shavishtha varyam divi shravo dadhimahi divi stomam manamahe