Sukta 48

48.1

5 vamadevo gautamah, vayuh, anushtup

वि॒हि होत्रा॒ अवी॑ता॒ विपो॒ न रायो॑ अ॒र्यः ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥१॥

Vihi hotra avita vipo na rayo aryah
Vayava chandrena rathena yahi sutasya pitaye

48.2

नि॒र्यु॒वा॒णो अश॑स्तीर्नि॒युत्वाँ॒ इन्द्र॑सारथिः ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥२॥

Niryuvano ashastirniyutvam indrasarathih
Vayava chandrena rathena yahi sutasya pitaye

48.3

अनु॑ कृ॒ष्णे वसु॑धिती ये॒माते॑ वि॒श्वपे॑शसा ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥३॥

Anu krishne vasudhiti yemate vishvapeshasa
Vayava chandrena rathena yahi sutasya pitaye

48.4

वह॑न्तु त्वा मनो॒युजो॑ यु॒क्तासो॑ नव॒तिर्नव॑ ।
वाय॒वा च॒न्द्रेण॒ रथे॑न या॒हि सु॒तस्य॑ पी॒तये॑ ॥४॥

Vahantu tva manoyujo yuktaso navatirnava
Vayava chandrena rathena yahi sutasya pitaye

48.5

वायो॑ श॒तं हरी॑णां यु॒वस्व॒ पोष्या॑णाम् ।
उ॒त वा॑ ते सह॒स्रिणो॒ रथ॒ आ या॑तु॒ पाज॑सा ॥५॥

Vayo shatam harinam yuvasva poshyanam
Uta va te sahasrino ratha a yatu pajasa