Sukta 31

31.1

15 vamadevo gautamah, indrah, gayatri, 3 pada nichrit

कया॑ नश्चि॒त्र आ भु॑वदू॒ती स॒दावृ॑ध॒ः सखा॑ । कया॒ शचि॑ष्ठया वृ॒ता ॥१॥

Kaya nashchitra a bhuvaduti sadavridhah sakha, kaya shachishthaya vrita

कस्त्वा॑ स॒त्यो मदा॑नां॒ मंहि॑ष्ठो मत्स॒दन्ध॑सः । दृ॒ळहा चि॑दा॒रुजे॒ वसु॑ ॥२॥

Kastva satyo madanam manhishtho matsadandhasah, drilaha chidaruje vasu

अ॒भी षु ण॒ः सखी॑नामवि॒ता ज॑रितॄ॒णाम् । श॒तं भ॑वास्यू॒तिभि॑ः ॥३॥

Abhi shu nah sakhinamavita jaritrinam, shatam bhavasyutibhih

अ॒भी न॒ आ व॑वृत्स्व च॒क्रं न वृ॒त्तमर्व॑तः । नि॒युद्भि॑श्चर्षणी॒नाम् ॥४॥

Abhi na a vavritsva chakram na vrittamarvatah, niyudbhishcharshaninam

प्र॒वता॒ हि क्रतू॑ना॒मा हा॑ प॒देव॒ गच्छ॑सि । अभ॑क्षि॒ सूर्ये॒ सचा॑ ॥५॥

Pravata hi kratunama ha padeva gachchhasi, abhakshi surye sacha

सं यत्त॑ इन्द्र म॒न्यव॒ः सं च॒क्राणि॑ दधन्वि॒रे । अध॒ त्वे अध॒ सूर्ये॑ ॥६॥

Sam yatta indra manyavah sam chakrani dadhanvire, adha tve adha surye

उ॒त स्मा॒ हि त्वामा॒हुरिन्म॒घवा॑नं शचीपते । दाता॑र॒मवि॑दीधयुम् ॥७॥

Uta sma hi tvamahurinmaghavanam shachipate, dataramavididhayum

उ॒त स्मा॑ स॒द्य इत् परि॑ शशमा॒नाय॑ सुन्व॒ते । पु॒रू चि॑न्मंहसे॒ वसु॑ ॥८॥

Uta sma sadya it pari shashamanaya sunvate, puru chinmanhase vasu

न॒हि ष्मा॑ ते श॒तं च॒न राधो॒ वर॑न्त आ॒मुर॑ः । न च्यौ॒त्नानि॑ करिष्य॒तः ॥९॥

Nahi shma te shatam chana radho varanta amurah, na chyautnani karishyatah

अ॒स्माँ अ॑वन्तु ते श॒तम॒स्मान् त्स॒हस्र॑मू॒तय॑ः । अ॒स्मान् विश्वा॑ अ॒भिष्ट॑यः ॥१०॥

Asmam avantu te shatamasman tsahasramutayah, asman vishva abhishtayah

अ॒स्माँ इ॒हा वृ॑णीष्व स॒ख्याय॑ स्व॒स्तये॑ । म॒हो रा॒ये दि॒वित्म॑ते ॥११॥

Asmam iha vrinishva sakhyaya svastaye, maho raye divitmate

अ॒स्माँ अ॑विड्ढि वि॒श्वहेन्द्र॑ रा॒या परी॑णसा । अ॒स्मान् विश्वा॑भिरू॒तिभि॑ः ॥१२॥

Asmam aviddhi vishvahendra raya parinasa, asman vishvabhirutibhih

अ॒स्मभ्यं॒ ताँ अपा॑ वृधि व्र॒जाँ अस्ते॑व॒ गोम॑तः । नवा॑भिरिन्द्रो॒तिभि॑ः ॥१३॥

Asmabhyam tam apa vridhi vrajam asteva gomatah, navabhirindrotibhih

अ॒स्माकं॑ धृष्णु॒या रथो॑ द्यु॒माँ इ॒न्द्रान॑पच्युतः । ग॒व्युर॑श्व॒युरी॑यते ॥१४॥

Asmakam dhrishnuya ratho dyumam indranapachyutah, gavyurashvayuriyate

अ॒स्माक॑मुत्त॒मं कृ॑धि॒ श्रवो॑ दे॒वेषु॑ सूर्य । वर्षि॑ष्ठं॒ द्यामि॑वो॒परि॑ ॥१५॥

Asmakamuttamam kridhi shravo deveshu surya, varshishtham dyamivopari