Sukta 28

28.1

5 vamadevo gautamah, indrah, indrasomau va, trishtup

त्वा यु॒जा तव॒ तत् सो॑म स॒ख्य इन्द्रो॑ अ॒पो मन॑वे स॒स्रुत॑स्कः ।
अह॒न्नहि॒मरि॑णात् स॒प्त सिन्धू॒नपा॑वृणो॒दपि॑हितेव॒ खानि॑ ॥१॥

Tva yuja tava tat soma sakhya indro apo manave sasrutaskah
Ahannahimarinat sapta sindhunapavrinodapihiteva khani

त्वा यु॒जा नि खि॑द॒त् सूर्य॒स्येन्द्र॑श्च॒क्रं सह॑सा स॒द्य इ॑न्दो ।
अधि॒ ष्णुना॑ बृह॒ता वर्त॑मानं म॒हो द्रु॒हो अप॑ वि॒श्वायु॑ धायि ॥२॥

Tva yuja ni khidat suryasyendrashchakram sahasa sadya indo
Adhi shnuna brihata vartamanam maho druho apa vishvayu dhayi

अह॒न्निन्द्रो॒ अद॑हद॒ग्निरि॑न्दो पु॒रा दस्यू॑न्म॒ध्यंदि॑नाद॒भीके॑ ।
दु॒र्गे दु॑रो॒णे क्रत्वा॒ न या॒तां पु॒रू स॒हस्रा॒ शर्वा॒ नि ब॑र्हीत् ॥३॥

Ahannindro adahadagnirindo pura dasyunmadhyandinadabhike
Durge durone kratva na yatam puru sahasra sharva ni barhit

विश्व॑स्मात् सीमध॒माँ इ॑न्द्र॒ दस्यू॒न् विशो॒ दासी॑रकृणोरप्रश॒स्ताः ।
अबा॑धेथा॒ममृ॑णतं॒ नि शत्रू॒नवि॑न्देथा॒मप॑चितिं॒ वध॑त्रैः ॥४॥

Vishvasmat simadhamam indra dasyun visho dasirakrinoraprashastah
Abadhethamamrinatam ni shatrunavindethamapachitim vadhatraih

ए॒वा स॒त्यं म॑घवाना यु॒वं तदिन्द्र॑श्च सोमो॒र्वमश्व्यं॒ गोः ।
आद॑र्दृत॒मपि॑हिता॒न्यश्ना॑ रिरि॒चथु॒ः क्षाश्चि॑त् ततृदा॒ना ॥५॥

Eva satyam maghavana yuvam tadindrashcha somorvamashvyam goh
Adardritamapihitanyashna ririchathuh kshashchit tatridana