Sukta 9

9.1

9 gathino vishvamitrah, agnih, brihati, 9 trishtup

सखा॑यस्त्वा ववृमहे दे॒वं मर्ता॑स ऊ॒तये॑ ।
अ॒पां नपा॑तं सु॒भगं॑ सु॒दीदि॑तिं सु॒प्रतू॑र्तिमने॒हस॑म् ॥१॥

Sakhayastva vavrimahe devam martasa utaye
Apam napatam subhagam sudiditim supraturtimanehasam

काय॑मानो व॒ना त्वं यन्मा॒तॄरज॑गन्न॒पः ।
न तत् ते॑ अग्ने प्र॒मृषे॑ नि॒वर्त॑नं॒ यद् दू॒रे सन्नि॒हाभ॑वः ॥२॥

Kayamano vana tvam yanmatrirajagannapah
Na tat te agne pramrishe nivartanam yad dure sannihabhavah

अति॑ तृ॒ष्टं व॑वक्षि॒थाथै॒व सु॒मना॑ असि ।
प्रप्रा॒न्ये यन्ति॒ पर्य॒न्य आ॑सते॒ येषां॑ स॒ख्ये असि॑ श्रि॒तः ॥३॥

Ati trishtam vavakshithathaiva sumana asi
Prapranye yanti paryanya asate yesham sakhye asi shritah

ई॒यि॒वांस॒मति॒ स्रिध॒ः शश्व॑ती॒रति॑ स॒श्चत॑ः ।
अन्वी॑मविन्दन् निचि॒रासो॑ अ॒द्रुहो॒ऽप्सु सिं॒हमि॑व श्रि॒तम् ॥४॥

Iyivansamati sridhah shashvatirati sashchatah
Anvimavindan nichiraso adruhopsu sinhamiva shritam

स॒सृ॒वांस॑मिव॒ त्मना॒ ऽग्निमि॒त्था ति॒रोहि॑तम् ।
ऐनं॑ नयन्मात॒रिश्वा॑ परा॒वतो॑ दे॒वेभ्यो॑ मथि॒तं परि॑ ॥५॥

Sasrivansamiva tmana gnimittha tirohitam
Ainam nayanmatarishva paravato devebhyo mathitam pari

तं त्वा॒ मर्ता॑ अगृभ्णत दे॒वेभ्यो॑ हव्यवाहन ।
विश्वा॒न् यद् य॒ज्ञाँ अ॑भि॒पासि॑ मानुष॒ तव॒ क्रत्वा॑ यविष्ठ्य ॥६॥

Tam tva marta agribhnata devebhyo havyavahana
Vishvan yad yagyam abhipasi manusha tava kratva yavishthya

तद् भ॒द्रं तव॑ दं॒सना॒ पाका॑य चिच्छदयति ।
त्वां यद॑ग्ने प॒शव॑ः स॒मास॑ते॒ समि॑द्धमपिशर्व॒रे ॥७॥

Tad bhadram tava dansana pakaya chichchhadayati
Tvam yadagne pashavah samasate samiddhamapisharvare

आ जु॑होता स्वध्व॒रं शी॒रं पा॑व॒कशो॑चिषम् ।
आ॒शुं दू॒तम॑जि॒रं प्र॒त्नमीड्यं॑ श्रु॒ष्टी दे॒वं स॑पर्यत ॥८॥

A juhota svadhvaram shiram pavakashochisham
Ashum dutamajiram pratnamidyam shrushti devam saparyata

त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न् घृ॒तैरस्तृ॑णन् ब॒र्हिर॑स्मा॒ आदिद्धोता॑रं॒ न्य॑सादयन्त ॥९॥

Trini shata tri sahasranyagnim trinshachcha deva nava chasaparyan
Aukshan ghritairastrinan barhirasma adiddhotaram nyasadayanta