Sukta 7

7.1

11 gathino vishvamitrah, agnih, trishtup

प्र य आ॒रुः शि॑तिपृ॒ष्ठस्य॑ धा॒सेरा मा॒तरा॑ विविशुः स॒प्त वाणी॑ः ।
प॒रि॒क्षिता॑ पि॒तरा॒ सं च॑रेते॒ प्र स॑र्स्राते दी॒र्घमायु॑ः प्र॒यक्षे॑ ॥१॥

Pra ya aruh shitiprishthasya dhasera matara vivishuh sapta vanih
Parikshita pitara sam charete pra sarsrate dirghamayuh prayakshe

7.2

दि॒वक्ष॑सो धे॒नवो॒ वृष्णो॒ अश्वा॑ दे॒वीरा त॑स्थौ॒ मधु॑म॒द् वह॑न्तीः ।
ऋ॒तस्य॑ त्वा॒ सद॑सि क्षेम॒यन्तं॒ पर्येका॑ चरति वर्त॒निं गौः ॥२॥

Divakshaso dhenavo vrishno ashva devira tasthau madhumad vahantih
Ritasya tva sadasi kshemayantam paryeka charati vartanim gauh

7.3

आ सी॑मरोहत् सु॒यमा॒ भव॑न्ती॒ः पति॑श्चिकि॒त्वान् र॑यि॒विद् र॑यी॒णाम् ।
प्र नील॑पृष्ठो अत॒सस्य॑ धा॒सेस्ता अ॑वासयत् पुरु॒धप्र॑तीकः ॥३॥

A simarohat suyama bhavantih patishchikitvan rayivid rayinam
Pra nilaprishtho atasasya dhasesta avasayat purudhapratikah

7.4

महि॑ त्वा॒ष्ट्रमू॒र्जय॑न्तीरजु॒र्यं स्त॑भू॒यमा॑नं व॒हतो॑ वहन्ति ।
व्यङ्गे॑भिर्दिद्युता॒नः स॒धस्थ॒ एका॑मिव॒ रोद॑सी॒ आ वि॑वेश ॥४॥

Mahi tvashtramurjayantirajuryam stabhuyamanam vahato vahanti
Vyangebhirdidyutanah sadhastha ekamiva rodasi a vivesha

7.5

जा॒नन्ति॒ वृष्णो॑ अरु॒षस्य॒ शेव॑मु॒त ब्र॒ध्नस्य॒ शास॑ने रणन्ति ।
दि॒वो॒रुच॑ः सु॒रुचो॒ रोच॑माना॒ इळा॒ येषां॒ गण्या॒ माहि॑ना॒ गीः ॥५॥

Jananti vrishno arushasya shevamuta bradhnasya shasane rananti
Divoruchah surucho rochamana ila yesham ganya mahina gih

7.6

उ॒तो पि॒तृभ्यां॑ प्र॒विदानु॒ घोषं॑ म॒हो म॒हद्भ्या॑मनयन्त शू॒षम् ।
उ॒क्षा ह॒ यत्र॒ परि॒ धान॑म॒क्तोरनु॒ स्वं धाम॑ जरि॒तुर्व॒वक्ष॑ ॥६॥

Uto pitribhyam pravidanu ghosham maho mahadbhyamanayanta shusham
Uksha ha yatra pari dhanamaktoranu svam dhama jariturvavaksha

7.7

अ॒ध्व॒र्युभि॑ः प॒ञ्चभि॑ः स॒प्त विप्रा॑ः प्रि॒यं र॑क्षन्ते॒ निहि॑तं प॒दं वेः ।
प्राञ्चो॑ मदन्त्यु॒क्षणो॑ अजु॒र्या दे॒वा दे॒वाना॒मनु॒ हि व्र॒ता गुः ॥७॥

Adhvaryubhih panchabhih sapta viprah priyam rakshante nihitam padam veh
Prancho madantyukshano ajurya deva devanamanu hi vrata guh

7.8

दैव्या॒ होता॑रा प्रथ॒मा न्यृ॑ञ्जे स॒प्त पृ॒क्षास॑ः स्व॒धया॑ मदन्ति ।
ऋ॒तं शंस॑न्त ऋ॒तमित् त आ॑हु॒रनु॑ व्र॒तं व्र॑त॒पा दीध्या॑नाः ॥८॥

Daivya hotara prathama nyrinje sapta prikshasah svadhaya madanti
Ritam shansanta ritamit ta ahuranu vratam vratapa didhyanah

7.9

वृ॒षा॒यन्ते॑ म॒हे अत्या॑य पू॒र्वीर्वृष्णे॑ चि॒त्राय॑ र॒श्मय॑ः सुया॒माः ।
देव॑ होतर्म॒न्द्रत॑रश्चिकि॒त्वान् म॒हो दे॒वान् रोद॑सी॒ एह व॑क्षि ॥९॥

Vrishayante mahe atyaya purvirvrishne chitraya rashmayah suyamah
Deva hotarmandratarashchikitvan maho devan rodasi eha vakshi

7.10

पृ॒क्षप्र॑यजो द्रविणः सु॒वाच॑ः सुके॒तव॑ उ॒षसो॑ रे॒वदू॑षुः ।
उ॒तो चि॑दग्ने महि॒ना पृ॑थि॒व्याः कृ॒तं चि॒देन॒ः सं म॒हे द॑शस्य ॥१०॥

Prikshaprayajo dravinah suvachah suketava ushaso revadushuh
Uto chidagne mahina prithivyah kritam chidenah sam mahe dashasya

7.11

इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑ः सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे ॥११॥

Ilamagne purudansam sanim goh shashvattamam havamanaya sadha
Syannah sunustanayo vijavagne sa te sumatirbhutvasme