Sukta 4

4.1

11 gathino vishvamitrah, aprisuktam (1 idhmah samiddhognirva, 2 tanunapat, 3 ilah, 4 barhih, 5 devirdvarah, 6 ushasanakta, 7 daivyo hotarau prachetasau, 8 tisro devyahsarasvatilabharatyah, 9 tvashta, 10 vanaspatih, 11 svahakritayah), trishtup

स॒मित्स॑मित् सु॒मना॑ बोध्य॒स्मे शु॒चाशु॑चा सुम॒तिं रा॑सि॒ वस्व॑ः ।
आ दे॑व दे॒वान् य॒जथा॑य वक्षि॒ सखा॒ सखी॑न् त्सु॒मना॑ यक्ष्यग्ने ॥१॥

Samitsamit sumana bodhyasme shuchashucha sumatim rasi vasvah
A deva devan yajathaya vakshi sakha sakhin tsumana yakshyagne

4.2

यं दे॒वास॒स्त्रिरह॑न्ना॒यज॑न्ते दि॒वेदि॑वे॒ वरु॑णो मि॒त्रो अ॒ग्निः ।
सेमं य॒ज्ञं मधु॑मन्तं कृधी न॒स्तनू॑नपाद् घृ॒तयो॑निं वि॒धन्त॑म् ॥२॥

Yam devasastrirahannayajante divedive varuno mitro agnih
Semam yagyam madhumantam kridhi nastanunapad ghritayonim vidhantam

4.3

प्र दीधि॑तिर्वि॒श्ववा॑रा जिगाति॒ होता॑रमि॒ळः प्र॑थ॒मं यज॑ध्यै ।
अच्छा॒ नमो॑भिर्वृष॒भं व॒न्दध्यै॒ स दे॒वान् य॑क्षदिषि॒तो यजी॑यान् ॥३॥

Pra didhitirvishvavara jigati hotaramilah prathamam yajadhyai
Achchha namobhirvrishabham vandadhyai sa devan yakshadishito yajiyan

4.4

ऊ॒र्ध्वो वां॑ गा॒तुर॑ध्व॒रे अ॑कार्यू॒र्ध्वा शो॒चींषि॒ प्रस्थि॑ता॒ रजां॑सि ।
दि॒वो वा॒ नाभा॒ न्य॑सादि॒ होता॑ स्तृणी॒महि॑ दे॒वव्य॑चा॒ वि ब॒र्हिः ॥४॥

Urdhvo vam gaturadhvare akaryurdhva shochinshi prasthita rajansi
Divo va nabha nyasadi hota strinimahi devavyacha vi barhih

4.5

स॒प्त हो॒त्राणि॒ मन॑सा वृणा॒ना इन्व॑न्तो॒ विश्वं॒ प्रति॑ यन्नृ॒तेन॑ ।
नृ॒पेश॑सो वि॒दथे॑षु॒ प्र जा॒ता अ॒भी॒३मं य॒ज्ञं वि च॑रन्त पू॒र्वीः ॥५॥

Sapta hotrani manasa vrinana invanto vishvam prati yannritena
Nripeshaso vidatheshu pra jata abhi3mam yagyam vi charanta purvih

4.6

आ भन्द॑माने उ॒षसा॒ उपा॑के उ॒त स्म॑येते त॒न्वा॒३ विरू॑पे ।
यथा॑ नो मि॒त्रो वरु॑णो॒ जुजो॑ष॒दिन्द्रो॑ म॒रुत्वाँ॑ उ॒त वा॒ महो॑भिः ॥६॥

A bhandamane ushasa upake uta smayete tanva3 virupe
Yatha no mitro varuno jujoshadindro marutvam uta va mahobhih

4.7

दैव्या॒ होता॑रा प्रथ॒मा न्यृ॑ञ्जे स॒प्त पृ॒क्षास॑ः स्व॒धया॑ मदन्ति ।
ऋ॒तं शंस॑न्त ऋ॒तमित् त आ॑हु॒रनु॑ व्र॒तं व्र॑त॒पा दीध्या॑नाः ॥७॥

Daivya hotara prathama nyrinje sapta prikshasah svadhaya madanti
Ritam shansanta ritamit ta ahuranu vratam vratapa didhyanah

4.8

आ भार॑ती॒ भार॑तीभिः स॒जोषा॒ इळा॑ दे॒वैर्म॑नु॒ष्ये॑भिर॒ग्निः ।
सर॑स्वती सारस्व॒तेभि॑र॒र्वाक् तिस्रो दे॒वीर्ब॒र्हिरेदं स॑दन्तु ॥८॥

A bharati bharatibhih sajosha ila devairmanushyebhiragnih
Sarasvati sarasvatebhirarvak tisro devirbarhiredam sadantu

4.9

तन्न॑स्तु॒रीप॒मध॑ पोषयि॒त्नु देव॑ त्वष्ट॒र्वि र॑रा॒णः स्य॑स्व ।
यतो॑ वी॒रः क॑र्म॒ण्य॑ः सु॒दक्षो॑ यु॒क्तग्रा॑वा॒ जाय॑ते दे॒वका॑मः ॥९॥

Tannasturipamadha poshayitnu deva tvashtarvi raranah syasva
Yato virah karmanyah sudaksho yuktagrava jayate devakamah

4.10

वन॑स्प॒तेऽव॑ सृ॒जोप॑ दे॒वान॒ग्निर्ह॒विः श॑मि॒ता सू॑दयाति ।
सेदु॒ होता॑ स॒त्यत॑रो यजाति॒ यथा॑ दे॒वानां॒ जनि॑मानि॒ वेद॑ ॥१०॥

Vanaspateva srijopa devanagnirhavih shamita sudayati
Sedu hota satyataro yajati yatha devanam janimani veda

4.11

आ या॑ह्यग्ने समिधा॒नो अ॒र्वाङिन्द्रे॑ण दे॒वैः स॒रथं॑ तु॒रेभि॑ः ।
ब॒र्हिर्न॑ आस्ता॒मदि॑तिः सुपु॒त्रा स्वाहा॑ दे॒वा अ॒मृता॑ मादयन्ताम् ॥११॥

A yahyagne samidhano arvangindrena devaih saratham turebhih
Barhirna astamaditih suputra svaha deva amrita madayantam