Sukta 25

25.1

5 gathino vishvamitrah, agnih, 4 agnindrau, virat

अग्ने॑ दि॒वः सू॒नुर॑सि॒ प्रचे॑ता॒स्तना॑ पृथि॒व्या उ॒त वि॒श्ववे॑दाः ।
ऋध॑ग्दे॒वाँ इ॒ह य॑जा चिकित्वः ॥१॥

Agne divah sunurasi prachetastana prithivya uta vishvavedah
Ridhagdevam iha yaja chikitvah

अ॒ग्निः स॑नोति वी॒र्या॑णि वि॒द्वान् त्स॒नोति॒ वाज॑म॒मृता॑य॒ भूष॑न् ।
स नो॑ दे॒वाँ एह व॑हा पुरुक्षो ॥२॥

Agnih sanoti viryani vidvan tsanoti vajamamritaya bhushan
Sa no devam eha vaha puruksho

अ॒ग्निर्द्यावा॑पृथि॒वी वि॒श्वज॑न्ये॒ आ भा॑ति दे॒वी अ॒मृते॒ अमू॑रः ।
क्षय॒न् वाजै॑ः पुरुश्च॒न्द्रो नमो॑भिः ॥३॥

Agnirdyavaprithivi vishvajanye a bhati devi amrite amurah
Kshayan vajaih purushchandro namobhih

अग्न॒ इन्द्र॑श्च दा॒शुषो॑ दुरो॒णे सु॒ताव॑तो य॒ज्ञमि॒होप॑ यातम् ।
अम॑र्धन्ता सोम॒पेया॑य देवा ॥४॥

Agna indrashcha dashusho durone sutavato yagyamihopa yatam
Amardhanta somapeyaya deva

अग्ने॑ अ॒पां समि॑ध्यसे दुरो॒णे नित्य॑ः सूनो सहसो जातवेदः ।
स॒धस्था॑नि म॒हय॑मान ऊ॒ती ॥५॥

Agne apam samidhyase durone nityah suno sahaso jatavedah
Sadhasthani mahayamana uti