Sukta 15

15.1

7 katya utkilah, agnih, trishtup

वि पाज॑सा पृ॒थुना॒ शोशु॑चानो॒ बाध॑स्व द्वि॒षो र॒क्षसो॒ अमी॑वाः ।
सु॒शर्म॑णो बृह॒तः शर्म॑णि स्याम॒ग्नेर॒हं सु॒हव॑स्य॒ प्रणी॑तौ ॥१॥

Vi pajasa prithuna shoshuchano badhasva dvisho rakshaso amivah
Susharmano brihatah sharmani syamagneraham suhavasya pranitau

त्वं नो॑ अ॒स्या उ॒षसो॒ व्यु॑ष्टौ॒ त्वं सूर॒ उदि॑ते बोधि गो॒पाः ।
जन्मे॑व॒ नित्यं॒ तन॑यं जुषस्व॒ स्तोमं॑ मे अग्ने त॒न्वा॑ सुजात ॥२॥

Tvam no asya ushaso vyushtau tvam sura udite bodhi gopah
Janmeva nityam tanayam jushasva stomam me agne tanva sujata

त्वं नृ॒चक्षा॑ वृष॒भानु॑ पू॒र्वीः कृ॒ष्णास्व॑ग्ने अरु॒षो वि भा॑हि ।
वसो॒ नेषि॑ च॒ पर्षि॒ चात्यंह॑ः कृ॒धी नो॑ रा॒य उ॒शिजो॑ यविष्ठ ॥३॥

Tvam nrichaksha vrishabhanu purvih krishnasvagne arusho vi bhahi
Vaso neshi cha parshi chatyanhah kridhi no raya ushijo yavishtha

अषा॑ळहो अग्ने वृष॒भो दि॑दीहि॒ पुरो॒ विश्वा॒ः सौभ॑गा संजिगी॒वान् ।
य॒ज्ञस्य॑ ने॒ता प्र॑थ॒मस्य॑ पा॒योर्जात॑वेदो बृह॒तः सु॑प्रणीते ॥४॥

Ashalaho agne vrishabho didihi puro vishvah saubhaga sanjigivan
Yagyasya neta prathamasya payorjatavedo brihatah supranite

अच्छि॑द्रा॒ शर्म॑ जरितः पु॒रूणि॑ दे॒वाँ अच्छा॒ दीद्या॑नः सुमे॒धाः ।
रथो॒ न सस्नि॑र॒भि व॑क्षि॒ वाज॒मग्ने॒ त्वं रोद॑सी नः सु॒मेके॑ ॥५॥

Achchhidra sharma jaritah puruni devam achchha didyanah sumedhah
Ratho na sasnirabhi vakshi vajamagne tvam rodasi nah sumeke

प्र पी॑पय वृषभ॒ जिन्व॒ वाजा॒नग्ने॒ त्वं रोद॑सी नः सु॒दोघे॑ ।
दे॒वेभि॑र्देव सु॒रुचा॑ रुचा॒नो मा नो॒ मर्त॑स्य दुर्म॒तिः परि॑ ष्ठात् ॥६॥

Pra pipaya vrishabha jinva vajanagne tvam rodasi nah sudoghe
Devebhirdeva surucha ruchano ma no martasya durmatih pari shthat

इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑ः सू॒नुस्तन॑यो वि॒जावा ऽग्ने॒ सा ते॑ सुम॒तिर्भू॑त्व॒स्मे ॥७॥

Ilamagne purudansam sanim goh shashvattamam havamanaya sadha
Syannah sunustanayo vijava gne sa te sumatirbhutvasme