Sukta 9

9.1

6 gritsamada (angirasah shaunahotrah pashchad) bhargavah shaunakah, agnih, trishtup

नि होता॑ होतृ॒षद॑ने॒ विदा॑नस्त्वे॒षो दी॑दि॒वाँ अ॑सदत् सु॒दक्ष॑ः ।
अद॑ब्धव्रतप्रमति॒र्वसि॑ष्ठः सहस्रम्भ॒रः शुचि॑जिह्वो अ॒ग्निः ॥१॥

Ni hota hotrishadane vidanastvesho didivam asadat sudakshah
Adabdhavratapramatirvasishthah sahasrambharah shuchijihvo agnih

त्वं दू॒तस्त्वमु॑ नः पर॒स्पास्त्वं वस्य॒ आ वृ॑षभ प्रणे॒ता ।
अग्ने॑ तो॒कस्य॑ न॒स्तने॑ त॒नूना॒मप्र॑युच्छ॒न् दीद्य॑द् बोधि गो॒पाः ॥२॥

Tvam dutastvamu nah paraspastvam vasya a vrishabha praneta
Agne tokasya nastane tanunamaprayuchchhan didyad bodhi gopah

वि॒धेम॑ ते पर॒मे जन्म॑न्नग्ने वि॒धेम॒ स्तोमै॒रव॑रे स॒धस्थे॑ ।
यस्मा॒द् योने॑रु॒दारि॑था॒ यजे॒ तं प्र त्वे ह॒वींषि॑ जुहुरे॒ समि॑द्धे ॥३॥

Vidhema te parame janmannagne vidhema stomairavare sadhasthe
Yasmad yonerudaritha yaje tam pra tve havinshi juhure samiddhe

अग्ने॒ यज॑स्व ह॒विषा॒ यजी॑याञ्छ्रु॒ष्टी दे॒ष्णम॒भि गृ॑णीहि॒ राध॑ः ।
त्वं ह्यसि॑ रयि॒पती॑ रयी॒णां त्वं शु॒क्रस्य॒ वच॑सो म॒नोता॑ ॥४॥

Agne yajasva havisha yajiyanchhrushti deshnamabhi grinihi radhah
Tvam hyasi rayipati rayinam tvam shukrasya vachaso manota

उ॒भयं॑ ते॒ न क्षी॑यते वस॒व्यं॑ दि॒वेदि॑वे॒ जाय॑मानस्य दस्म ।
कृ॒धि क्षु॒मन्तं॑ जरि॒तार॑मग्ने कृ॒धि पतिं॑ स्वप॒त्यस्य॑ रा॒यः ॥५॥

Ubhayam te na kshiyate vasavyam divedive jayamanasya dasma
Kridhi kshumantam jaritaramagne kridhi patim svapatyasya rayah

सैनानी॑केन सुवि॒दत्रो॑ अ॒स्मे यष्टा॑ दे॒वाँ आय॑जिष्ठः स्व॒स्ति ।
अद॑ब्धो गो॒पा उ॒त न॑ः पर॒स्पा अग्ने॑ द्यु॒मदु॒त रे॒वद् दि॑दीहि ॥६॥

Sainanikena suvidatro asme yashta devam ayajishthah svasti
Adabdho gopa uta nah paraspa agne dyumaduta revad didihi