Sukta 42

42.1

3 gritsamada (angirasah shaunahotrah pashchad) bhargavah shaunakah, shakuntah (kapinjalarupindrah), trishtup

कनि॑क्रदज्ज॒नुषं॑ प्रब्रुवा॒ण इय॑र्ति॒ वाच॑मरि॒तेव॒ नाव॑म् ।
सु॒म॒ङ्गल॑श्च शकुने॒ भवा॑सि॒ मा त्वा॒ का चि॑दभि॒भा विश्व्या॑ विदत् ॥१॥

Kanikradajjanusham prabruvana iyarti vachamariteva navam
Sumangalashcha shakune bhavasi ma tva ka chidabhibha vishvya vidat

42.2

मा त्वा॑ श्ये॒न उद् व॑धी॒न्मा सु॑प॒र्णो मा त्वा॑ विद॒दिषु॑मान् वी॒रो अस्ता॑ ।
पित्र्या॒मनु॑ प्र॒दिशं॒ कनि॑क्रदत् सुम॒ङ्गलो॑ भद्रवा॒दी व॑दे॒ह ॥२॥

Ma tva shyena ud vadhinma suparno ma tva vidadishuman viro asta
Pitryamanu pradisham kanikradat sumangalo bhadravadi vadeha

42.3

अव॑ क्रन्द दक्षिण॒तो गृ॒हाणां॑ सुम॒ङ्गलो॑ भद्रवा॒दी श॑कुन्ते ।
मा न॑ः स्ते॒न ई॑शत॒ माघशं॑सो बृ॒हद् व॑देम वि॒दथे॑ सु॒वीरा॑ः ॥३॥

Ava kranda dakshinato grihanam sumangalo bhadravadi shakunte
Ma nah stena ishata maghashanso brihad vadema vidathe suvirah