Sukta 4

4.1

9 somahutirbhargavah, agnih, trishtup

हु॒वे व॑ः सु॒द्योत्मा॑नं सुवृ॒क्तिं वि॒शाम॒ग्निमति॑थिं सुप्र॒यस॑म् ।
मि॒त्र इ॑व॒ यो दि॑धि॒षाय्यो॒ भूद् दे॒व आदे॑वे॒ जने॑ जा॒तवे॑दाः ॥१॥

Huve vah sudyotmanam suvriktim vishamagnimatithim suprayasam
Mitra iva yo didhishayyo bhud deva adeve jane jatavedah

इ॒मं वि॒धन्तो॑ अ॒पां स॒धस्थे॑ द्वि॒ताद॑धु॒र्भृग॑वो वि॒क्ष्वा॒३योः ।
ए॒ष विश्वा॑न्य॒भ्य॑स्तु॒ भूमा॑ दे॒वाना॑म॒ग्निर॑र॒तिर्जी॒राश्व॑ः ॥२॥

Imam vidhanto apam sadhasthe dvitadadhurbhrigavo vikshva3yoh
Esha vishvanyabhyastu bhuma devanamagniraratirjirashvah

अ॒ग्निं दे॒वासो॒ मानु॑षीषु वि॒क्षु प्रि॒यं धु॑ः क्षे॒ष्यन्तो॒ न मि॒त्रम् ।
स दी॑दयदुश॒तीरूर्म्या॒ आ द॒क्षाय्यो॒ यो दास्व॑ते॒ दम॒ आ ॥३॥

Agnim devaso manushishu vikshu priyam dhuh ksheshyanto na mitram
Sa didayadushatirurmya a dakshayyo yo dasvate dama a

अ॒स्य र॒ण्वा स्वस्ये॑व पु॒ष्टिः संदृ॑ष्टिरस्य हिया॒नस्य॒ दक्षो॑ः ।
वि यो भरि॑भ्र॒दोष॑धीषु जि॒ह्वामत्यो॒ न रथ्यो॑ दोधवीति॒ वारा॑न् ॥४॥

Asya ranva svasyeva pushtih sandrishtirasya hiyanasya dakshoh
Vi yo bharibhradoshadhishu jihvamatyo na rathyo dodhaviti varan

आ यन्मे॒ अभ्वं॑ व॒नद॒ः पन॑न्तो॒शिग्भ्यो॒ नामि॑मीत॒ वर्ण॑म् ।
स चि॒त्रेण॑ चिकिते॒ रंसु॑ भा॒सा जु॑जु॒र्वाँ यो मुहु॒रा युवा॒ भूत् ॥५॥

A yanme abhvam vanadah panantoshigbhyo namimita varnam
Sa chitrena chikite ransu bhasa jujurvam yo muhura yuva bhut

आ यो वना॑ तातृषा॒णो न भाति॒ वार्ण प॒था रथ्ये॑व स्वानीत् ।
कृ॒ष्णाध्वा॒ तपू॑ र॒ण्वश्चि॑केत॒ द्यौरि॑व॒ स्मय॑मानो॒ नभो॑भिः ॥६॥

A yo vana tatrishano na bhati varna patha rathyeva svanit
Krishnadhva tapu ranvashchiketa dyauriva smayamano nabhobhih

स यो व्यस्था॑द॒भि दक्ष॑दु॒र्वीं प॒शुर्नैति॑ स्व॒युरगो॑पाः ।
अ॒ग्निः शो॒चिष्माँ॑ अत॒सान्यु॒ष्णन् कृ॒ष्णव्य॑थिरस्वदय॒न्न भूम॑ ॥७॥

Sa yo vyasthadabhi dakshadurvim pashurnaiti svayuragopah
Agnih shochishmam atasanyushnan krishnavyathirasvadayanna bhuma

नू ते॒ पूर्व॒स्याव॑सो॒ अधी॑तौ तृ॒तीये॑ वि॒दथे॒ मन्म॑ शंसि ।
अ॒स्मे अ॑ग्ने सं॒यद्वी॑रं बृ॒हन्तं॑ क्षु॒मन्तं॒ वाजं॑ स्वप॒त्यं र॒यिं दा॑ः ॥८॥

Nu te purvasyavaso adhitau tritiye vidathe manma shansi
Asme agne sanyadviram brihantam kshumantam vajam svapatyam rayim dah

त्वया॒ यथा॑ गृत्सम॒दासो॑ अग्ने॒ गुहा॑ व॒न्वन्त॒ उप॑राँ अ॒भि ष्युः ।
सु॒वीरा॑सो अभिमाति॒षाह॒ः स्मत् सू॒रिभ्यो॑ गृण॒ते तद् वयो॑ धाः ॥९॥

Tvaya yatha gritsamadaso agne guha vanvanta uparam abhi shyuh
Suviraso abhimatishahah smat suribhyo grinate tad vayo dhah