Sukta 9

9.1

9 trishirastvashtrah, sindhudvipa ambarisho va, apah, gayatri, 5 vardhamana gayatri, 7 pratishtha gayatri, 8 -9 anushtup

आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ॥१॥

Apo hi shtha mayobhuvasta na urje dadhatana, mahe ranaya chakshase

यो व॑ः शि॒वत॑मो॒ रस॒स्तस्य॑ भाजयते॒ह न॑ः । उ॒श॒तीरि॑व मा॒तर॑ः ॥२॥

Yo vah shivatamo rasastasya bhajayateha nah, ushatiriva matarah

तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ॥३॥

Tasma aram gamama vo yasya kshayaya jinvatha, apo janayatha cha nah

शं नो॑ दे॒वीर॒भिष्ट॑य॒ आपो॑ भवन्तु पी॒तये॑ । शं योर॒भि स्र॑वन्तु नः ॥४॥

Sham no devirabhishtaya apo bhavantu pitaye, sham yorabhi sravantu nah

ईशा॑ना॒ वार्या॑णां॒ क्षय॑न्तीश्चर्षणी॒नाम् । अ॒पो या॑चामि भेष॒जम् ॥५॥

Ishana varyanam kshayantishcharshaninam, apo yachami bheshajam

अ॒प्सु मे॒ सोमो॑ अब्रवीद॒न्तर्विश्वा॑नि भेष॒जा । अ॒ग्निं च॑ वि॒श्वश॑म्भुवम् ॥६॥

Apsu me somo abravidantarvishvani bheshaja, agnim cha vishvashambhuvam

आप॑ः पृणी॒त भे॑ष॒जं वरू॑थं त॒न्वे॒३ मम॑ । ज्योक्च॒ सूर्यं॑ दृ॒शे ॥७॥

Apah prinita bheshajam varutham tanve3 mama, jyokcha suryam drishe

इ॒दमा॑प॒ः प्र व॑हत॒ यत्किं च॑ दुरि॒तं मयि॑ । यद्वा॒हम॑भिदु॒द्रोह॒ यद्वा॑ शे॒प उ॒तानृ॑तम् ॥८॥

Idamapah pra vahata yatkim cha duritam mayi, yadvahamabhidudroha yadva shepa utanritam

आपो॑ अ॒द्यान्व॑चारिषं॒ रसे॑न॒ सम॑गस्महि । पय॑स्वानग्न॒ आ ग॑हि॒ तं मा॒ सं सृ॑ज॒ वर्च॑सा ॥९॥

Apo adyanvacharisham rasena samagasmahi, payasvanagna a gahi tam ma sam srija varchasa