Sukta 80

80.1

7 sauchikognirvaishvanaro va, saptirvajambharo va, agnih, trishtup

अ॒ग्निः सप्तिं॑ वाजम्भ॒रं द॑दात्य॒ग्निर्वी॒रं श्रुत्यं॑ कर्मनि॒ष्ठाम् ।
अ॒ग्नी रोद॑सी॒ वि च॑रत्सम॒ञ्जन्न॒ग्निर्नारीं॑ वी॒रकु॑क्षिं॒ पुरं॑धिम् ॥१॥

Agnih saptim vajambharam dadatyagnirviram shrutyam karmanishtham
Agni rodasi vi charatsamanjannagnirnarim virakukshim purandhim

80.2

अ॒ग्नेरप्न॑सः स॒मिद॑स्तु भ॒द्राऽग्निर्म॒ही रोद॑सी॒ आ वि॑वेश ।
अ॒ग्निरेकं॑ चोदयत्स॒मत्स्व॒ग्निर्वृ॒त्राणि॑ दयते पु॒रूणि॑ ॥२॥

Agnerapnasah samidastu bhadragnirmahi rodasi a vivesha
Agnirekam chodayatsamatsvagnirvritrani dayate puruni

80.3

अ॒ग्निर्ह॒ त्यं जर॑त॒ः कर्ण॑मावा॒ऽग्निर॒द्भ्यो निर॑दह॒ज्जरू॑थम् ।
अ॒ग्निरत्रिं॑ घ॒र्म उ॑रुष्यद॒न्तर॒ग्निर्नृ॒मेधं॑ प्र॒जया॑सृज॒त्सम् ॥३॥

Agnirha tyam jaratah karnamavagniradbhyo niradahajjarutham
Agniratrim gharma urushyadantaragnirnrimedham prajayasrijatsam

80.4

अ॒ग्निर्दा॒द्द्रवि॑णं वी॒रपे॑शा अ॒ग्निॠषिं॒ यः स॒हस्रा॑ स॒नोति॑ ।
अ॒ग्निर्दि॒वि ह॒व्यमा त॑ताना॒ऽग्नेर्धामा॑नि॒ विभृ॑ता पुरु॒त्रा ॥४॥

Agnirdaddravinam virapesha agnirishim yah sahasra sanoti
Agnirdivi havyama tatanagnerdhamani vibhrita purutra

80.5

अ॒ग्निमु॒क्थैॠष॑यो॒ वि ह्व॑यन्ते॒ऽग्निं नरो॒ याम॑नि बाधि॒तास॑ः ।
अ॒ग्निं वयो॑ अ॒न्तरि॑क्षे॒ पत॑न्तो॒ऽग्निः स॒हस्रा॒ परि॑ याति॒ गोना॑म् ॥५॥

Agnimukthairishayo vi hvayantegnim naro yamani badhitasah
Agnim vayo antarikshe patantognih sahasra pari yati gonam

80.6

अ॒ग्निं विश॑ ईळते॒ मानु॑षी॒र्या अ॒ग्निं मनु॑षो॒ नहु॑षो॒ वि जा॒ताः ।
अ॒ग्निर्गान्ध॑र्वीं प॒थ्या॑मृ॒तस्या॒ऽग्नेर्गव्यू॑तिर्घृ॒त आ निष॑त्ता ॥६॥

Agnim visha ilate manushirya agnim manusho nahusho vi jatah
Agnirgandharvim pathyamritasyagnergavyutirghrita a nishatta

80.7

अ॒ग्नये॒ ब्रह्म॑ ऋ॒भव॑स्ततक्षुर॒ग्निं म॒हाम॑वोचामा सुवृ॒क्तिम् ।
अग्ने॒ प्राव॑ जरि॒तारं॑ यवि॒ष्ठाऽग्ने॒ महि॒ द्रवि॑ण॒मा य॑जस्व ॥७॥

Agnaye brahma ribhavastatakshuragnim mahamavochama suvriktim
Agne prava jaritaram yavishthagne mahi dravinama yajasva