Sukta 74

74.1

6 gaurivitihshaktyah, indrah, trishtup

वसू॑नां वा चर्कृष॒ इय॑क्षन्धि॒या वा॑ य॒ज्ञैर्वा॒ रोद॑स्योः ।
अर्व॑न्तो वा॒ ये र॑यि॒मन्त॑ः सा॒तौ व॒नंअ वा॒ ये सु॒श्रुणं॑ सु॒श्रुतो॒ धुः ॥१॥

Vasunam va charkrisha iyakshandhiya va yagyairva rodasyoh
Arvanto va ye rayimantah satau vanana va ye sushrunam sushruto dhuh

74.2

हव॑ एषा॒मसु॑रो नक्षत॒ द्यां श्र॑वस्य॒ता मन॑सा निंसत॒ क्षाम् ।
चक्षा॑णा॒ यत्र॑ सुवि॒ताय॑ दे॒वा द्यौर्न वारे॑भिः कृ॒णव॑न्त॒ स्वैः ॥२॥

Hava eshamasuro nakshata dyam shravasyata manasa ninsata ksham
Chakshana yatra suvitaya deva dyaurna varebhih krinavanta svaih

74.3

इ॒यमे॑षाम॒मृता॑नां॒ गीः स॒र्वता॑ता॒ ये कृ॒पण॑न्त॒ रत्न॑म् ।
धियं॑ च य॒ज्ञं च॒ साध॑न्त॒स्ते नो॑ धान्तु वस॒व्य१मसा॑मि ॥३॥

Iyameshamamritanam gih sarvatata ye kripananta ratnam
Dhiyam cha yagyam cha sadhantaste no dhantu vasavya1masami

74.4

आ तत्त॑ इन्द्रा॒यव॑ः पनन्ता॒ऽभि य ऊ॒र्वं गोम॑न्तं॒ तितृ॑त्सान् ।
स॒कृ॒त्स्वं१ ये पु॑रुपु॒त्रां म॒हीं स॒हस्र॑धारां बृह॒तीं दुदु॑क्षन् ॥४॥

A tatta indrayavah panantabhi ya urvam gomantam titritsan
Sakritsvan1 ye puruputram mahim sahasradharam brihatim dudukshan

74.5

शची॑व॒ इन्द्र॒मव॑से कृणुध्व॒मना॑नतं द॒मय॑न्तं पृत॒न्यून् ।
ऋ॒भु॒क्षणं॑ म॒घवा॑नं सुवृ॒क्तिं भर्ता॒ यो वज्रं॒ नर्यं॑ पुरु॒क्षुः ॥५॥

Shachiva indramavase krinudhvamananatam damayantam pritanyun
Ribhukshanam maghavanam suvriktim bharta yo vajram naryam purukshuh

74.6

यद्वा॒वान॑ पुरु॒तमं॑ पुरा॒षाळा वृ॑त्र॒हेन्द्रो॒ नामा॑न्यप्राः ।
अचे॑ति प्रा॒सह॒स्पति॒स्तुवि॑ष्मा॒न्यदी॑मु॒श्मसि॒ कर्त॑वे॒ कर॒त्तत् ॥६॥

Yadvavana purutamam purashala vritrahendro namanyaprah
Acheti prasahaspatistuvishmanyadimushmasi kartave karattat