Sukta 61

61.1

27 nabhanedishtho manavah, vishve devah, trishtup

इ॒दमि॒त्था रौद्रं॑ गू॒र्तव॑चा॒ ब्रह्म॒ क्रत्वा॒ शच्या॑म॒न्तरा॒जौ ।
क्रा॒णा यद॑स्य पि॒तरा॑ मंहने॒ष्ठाः पर्ष॑त्प॒क्थे अह॒न्ना स॒प्त होतॄ॑न् ॥१॥

Idamittha raudram gurtavacha brahma kratva shachyamantarajau
Krana yadasya pitara manhaneshthah parshatpakthe ahanna sapta hotrin

61.2

स इद्दा॒नाय॒ दभ्या॑य व॒न्वञ्च्यवा॑न॒ः सूदै॑रमिमीत॒ वेदि॑म् ।
तूर्व॑याणो गू॒र्तव॑चस्तम॒ः क्षोदो॒ न रेत॑ इ॒तऊ॑ति सिञ्चत् ॥२॥

Sa iddanaya dabhyaya vanvanchyavanah sudairamimita vedim
Turvayano gurtavachastamah kshodo na reta itauti sinchat

61.3

मनो॒ न येषु॒ हव॑नेषु ति॒ग्मं विप॒ः शच्या॑ वनु॒थो द्रव॑न्ता ।
आ यः शर्या॑भिस्तुविनृ॒म्णो अ॒स्याऽश्री॑णीता॒दिशं॒ गभ॑स्तौ ॥३॥

Mano na yeshu havaneshu tigmam vipah shachya vanutho dravanta
A yah sharyabhistuvinrimno asyashrinitadisham gabhastau

61.4

कृ॒ष्णा यद्गोष्व॑रु॒णीषु॒ सीद॑द्दि॒वो नपा॑ताश्विना हुवे वाम् ।
वी॒तं मे॑ य॒ज्ञमा ग॑तं मे॒ अन्नं॑ वव॒न्वांसा॒ नेष॒मस्मृ॑तध्रू ॥४॥

Krishna yadgoshvarunishu sidaddivo napatashvina huve vam
Vitam me yagyama gatam me annam vavanvansa neshamasmritadhru

61.5

प्रथि॑ष्ट॒ यस्य॑ वी॒रक॑र्ममि॒ष्णदनु॑ष्ठितं॒ नु नर्यो॒ अपौ॑हत् ।
पुन॒स्तदा वृ॑हति॒ यत्क॒नाया॑ दुहि॒तुरा अनु॑भृतमन॒र्वा ॥५॥

Prathishta yasya virakarmamishnadanushthitam nu naryo apauhat
Punastada vrihati yatkanaya duhitura anubhritamanarva

61.6

म॒ध्या यत्कर्त्व॒मभ॑वद॒भीके॒ कामं॑ कृण्वा॒ने पि॒तरि॑ युव॒त्याम् ।
म॒ना॒नग्रेतो॑ जहतुर्वि॒यन्ता॒ सानौ॒ निषि॑क्तं सुकृ॒तस्य॒ योनौ॑ ॥६॥

Madhya yatkartvamabhavadabhike kamam krinvane pitari yuvatyam
Mananagreto jahaturviyanta sanau nishiktam sukritasya yonau

61.7

पि॒ता यत्स्वां दु॑हि॒तर॑मधि॒ष्कन्क्ष्म॒या रेत॑ः संजग्मा॒नो नि षि॑ञ्चत् ।
स्वा॒ध्यो॑ऽजनय॒न्ब्रह्म॑ दे॒वा वास्तो॒ष्पतिं॑ व्रत॒पां निर॑तक्षन् ॥७॥

Pita yatsvam duhitaramadhishkankshmaya retah sanjagmano ni shinchat
Svadhyojanayanbrahma deva vastoshpatim vratapam niratakshan

61.8

स ईं॒ वृषा॒ न फेन॑मस्यदा॒जौ स्मदा परै॒दप॑ द॒भ्रचे॑ताः ।
सर॑त्प॒दा न दक्षि॑णा परा॒वृङ्न ता नु मे॑ पृश॒न्यो॑ जगृभ्रे ॥८॥

Sa im vrisha na phenamasyadajau smada paraidapa dabhrachetah
Saratpada na dakshina paravrinna ta nu me prishanyo jagribhre

61.9

म॒क्षू न वह्नि॑ः प्र॒जाया॑ उप॒ब्दिर॒ग्निं न न॒ग्न उप॑ सीद॒दूध॑ः ।
सनि॑ते॒ध्मं सनि॑तो॒त वाजं॒ स ध॒र्ता ज॑ज्ञे॒ सह॑सा यवी॒युत् ॥९॥

Makshu na vahnih prajaya upabdiragnim na nagna upa sidadudhah
Sanitedhmam sanitota vajam sa dharta jagye sahasa yaviyut

61.10

म॒क्षू क॒नाया॑ः स॒ख्यं नव॑ग्वा ऋ॒तं वद॑न्त ऋ॒तयु॑क्तिमग्मन् ।
द्वि॒बर्ह॑सो॒ य उप॑ गो॒पमागु॑रदक्षि॒णासो॒ अच्यु॑ता दुदुक्षन् ॥१०॥

Makshu kanayah sakhyam navagva ritam vadanta ritayuktimagman
Dvibarhaso ya upa gopamaguradakshinaso achyuta dudukshan

61.11

म॒क्षू क॒नाया॑ः स॒ख्यं नवी॑यो॒ राधो॒ न रेत॑ ऋ॒तमित्तु॑रण्यन् ।
शुचि॒ यत्ते॒ रेक्ण॒ आय॑जन्त सब॒र्दुघा॑या॒ः पय॑ उ॒स्रिया॑याः ॥११॥

Makshu kanayah sakhyam naviyo radho na reta ritamitturanyan
Shuchi yatte rekna ayajanta sabardughayah paya usriyayah

61.12

प॒श्वा यत्प॒श्चा वियु॑ता बु॒धन्तेति॑ ब्रवीति व॒क्तरी॒ ररा॑णः ।
वसो॑र्वसु॒त्वा का॒रवो॑ऽने॒हा विश्वं॑ विवेष्टि॒ द्रवि॑ण॒मुप॒ क्षु ॥१२॥

Pashva yatpashcha viyuta budhanteti braviti vaktari raranah
Vasorvasutva karavoneha vishvam viveshti dravinamupa kshu

61.13

तदिन्न्व॑स्य परि॒षद्वा॑नो अग्मन्पु॒रू सद॑न्तो नार्ष॒दं बि॑भित्सन् ।
वि शुष्ण॑स्य॒ संग्र॑थितमन॒र्वा वि॒दत्पु॑रुप्रजा॒तस्य॒ गुहा॒ यत् ॥१३॥

Tadinnvasya parishadvano agmanpuru sadanto narshadam bibhitsan
Vi shushnasya sangrathitamanarva vidatpuruprajatasya guha yat

61.14

भर्गो॑ ह॒ नामो॒त यस्य॑ दे॒वाः स्व१र्ण ये त्रि॑षध॒स्थे नि॑षे॒दुः ।
अ॒ग्निर्ह॒ नामो॒त जा॒तवे॑दाः श्रु॒धी नो॑ होतॠ॒तस्य॒ होता॒ध्रुक् ॥१४॥

Bhargo ha namota yasya devah sva1rna ye trishadhasthe nisheduh
Agnirha namota jatavedah shrudhi no hotaritasya hotadhruk

61.15

उ॒त त्या मे॒ रौद्रा॑वर्चि॒मन्ता॒ नास॑त्याविन्द्र गू॒र्तये॒ यज॑ध्यै ।
म॒नु॒ष्वद्वृ॒क्तब॑र्हिषे॒ ररा॑णा म॒न्दू हि॒तप्र॑यसा वि॒क्षु यज्यू॑ ॥१५॥

Uta tya me raudravarchimanta nasatyavindra gurtaye yajadhyai
Manushvadvriktabarhishe rarana mandu hitaprayasa vikshu yajyu

61.16

अ॒यं स्तु॒तो राजा॑ वन्दि वे॒धा अ॒पश्च॒ विप्र॑स्तरति॒ स्वसे॑तुः ।
स क॒क्षीव॑न्तं रेजय॒त्सो अ॒ग्निं ने॒मिं न च॒क्रमर्व॑तो रघु॒द्रु ॥१६॥

Ayam stuto raja vandi vedha apashcha viprastarati svasetuh
Sa kakshivantam rejayatso agnim nemim na chakramarvato raghudru

61.17

स द्वि॒बन्धु॑र्वैतर॒णो यष्टा॑ सब॒र्धुं धे॒नुम॒स्वं॑ दु॒हध्यै॑ ।
सं यन्मि॒त्रावरु॑णा वृ॒ञ्ज उ॒क्थैर्ज्येष्ठे॑भिरर्य॒मणं॒ वरू॑थैः ॥१७॥

Sa dvibandhurvaitarano yashta sabardhum dhenumasvam duhadhyai
Sam yanmitravaruna vrinja ukthairjyeshthebhiraryamanam varuthaih

61.18

तद्ब॑न्धुः सू॒रिर्दि॒वि ते॑ धियं॒धा नाभा॒नेदि॑ष्ठो रपति॒ प्र वेन॑न् ।
सा नो॒ नाभि॑ः पर॒मास्य वा॑ घा॒ऽहं तत्प॒श्चा क॑ति॒थश्चि॑दास ॥१८॥

Tadbandhuh surirdivi te dhiyandha nabhanedishtho rapati pra venan
Sa no nabhih paramasya va ghaham tatpashcha katithashchidasa

61.19

इ॒यं मे॒ नाभि॑रि॒ह मे॑ स॒धस्थ॑मि॒मे मे॑ दे॒वा अ॒यम॑स्मि॒ सर्व॑ः ।
द्वि॒जा अह॑ प्रथम॒जा ऋ॒तस्ये॒दं धे॒नुर॑दुह॒ज्जाय॑माना ॥१९॥

Iyam me nabhiriha me sadhasthamime me deva ayamasmi sarvah
Dvija aha prathamaja ritasyedam dhenuraduhajjayamana

61.20

अधा॑सु म॒न्द्रो अ॑र॒तिर्वि॒भावाऽव॑ स्यति द्विवर्त॒निर्व॑ने॒षाट् ।
ऊ॒र्ध्वा यच्छ्रेणि॒र्न शिशु॒र्दन्म॒क्षू स्थि॒रं शे॑वृ॒धं सू॑त मा॒ता ॥२०॥

Adhasu mandro aratirvibhavava syati dvivartanirvaneshat
Urdhva yachchhrenirna shishurdanmakshu sthiram shevridham suta mata

61.21

अधा॒ गाव॒ उप॑मातिं क॒नाया॒ अनु॑ श्वा॒न्तस्य॒ कस्य॑ चि॒त्परे॑युः ।
श्रु॒धि त्वं सु॑द्रविणो न॒स्त्वं या॑ळाश्व॒घ्नस्य॑ वावृधे सू॒नृता॑भिः ॥२१॥

Adha gava upamatim kanaya anu shvantasya kasya chitpareyuh
Shrudhi tvam sudravino nastvam yalashvaghnasya vavridhe sunritabhih

61.22

अध॒ त्वमि॑न्द्र वि॒द्ध्य१स्मान्म॒हो रा॒ये नृ॑पते॒ वज्र॑बाहुः ।
रक्षा॑ च नो म॒घोन॑ः पा॒हि सू॒रीन॑ने॒हस॑स्ते हरिवो अ॒भिष्टौ॑ ॥२२॥

Adha tvamindra viddhya1smanmaho raye nripate vajrabahuh
Raksha cha no maghonah pahi surinanehasaste harivo abhishtau

61.23

अध॒ यद्रा॑जाना॒ गवि॑ष्टौ॒ सर॑त्सर॒ण्युः का॒रवे॑ जर॒ण्युः ।
विप्र॒ः प्रेष्ठ॒ः स ह्ये॑षां ब॒भूव॒ परा॑ च॒ वक्ष॑दु॒त प॑र्षदेनान् ॥२३॥

Adha yadrajana gavishtau saratsaranyuh karave jaranyuh
Viprah preshthah sa hyesham babhuva para cha vakshaduta parshadenan

61.24

अधा॒ न्व॑स्य॒ जेन्य॑स्य पु॒ष्टौ वृथा॒ रेभ॑न्त ईमहे॒ तदू॒ नु ।
स॒र॒ण्युर॑स्य सू॒नुरश्वो॒ विप्र॑श्चासि॒ श्रव॑सश्च सा॒तौ ॥२४॥

Adha nvasya jenyasya pushtau vritha rebhanta imahe tadu nu
Saranyurasya sunurashvo viprashchasi shravasashcha satau

61.25

यु॒वोर्यदि॑ स॒ख्याया॒स्मे शर्धा॑य॒ स्तोमं॑ जुजु॒षे नम॑स्वान् ।
वि॒श्वत्र॒ यस्मि॒न्ना गिर॑ः समी॒चीः पू॒र्वीव॑ गा॒तुर्दाश॑त्सू॒नृता॑यै ॥२५॥

Yuvoryadi sakhyayasme shardhaya stomam jujushe namasvan
Vishvatra yasminna girah samichih purviva gaturdashatsunritayai

61.26

स गृ॑णा॒नो अ॒द्भिर्दे॒ववा॒निति॑ सु॒बन्धु॒र्नम॑सा सू॒क्तैः ।
वर्ध॑दु॒क्थैर्वचो॑भि॒रा हि नू॒नं व्यध्वै॑ति॒ पय॑स उ॒स्रिया॑याः ॥२६॥

Sa grinano adbhirdevavaniti subandhurnamasa suktaih
Vardhadukthairvachobhira hi nunam vyadhvaiti payasa usriyayah

61.27

त ऊ॒ षु णो॑ म॒हो य॑जत्रा भू॒त दे॑वास ऊ॒तये॑ स॒जोषा॑ः ।
ये वाजाँ॒ अन॑यता वि॒यन्तो॒ ये स्था नि॑चे॒तारो॒ अमू॑राः ॥२७॥

Ta u shu no maho yajatra bhuta devasa utaye sajoshah
Ye vajam anayata viyanto ye stha nichetaro amurah