Sukta 182

182.1

3 tapurmurdha barhaspatyah, brihaspatih, trishtup

बृह॒स्पति॑र्नयतु दु॒र्गहा॑ ति॒रः पुन॑र्नेषद॒घशं॑साय॒ मन्म॑ ।
क्षि॒पदश॑स्ति॒मप॑ दुर्म॒तिं ह॒न्नथा॑ कर॒द्यज॑मानाय॒ शं योः ॥१॥

Brihaspatirnayatu durgaha tirah punarneshadaghashansaya manma
Kshipadashastimapa durmatim hannatha karadyajamanaya sham yoh

182.2

नरा॒शंसो॑ नोऽवतु प्रया॒जे शं नो॑ अस्त्वनुया॒जो हवे॑षु ।
क्षि॒पदश॑स्ति॒मप॑ दुर्म॒तिं ह॒न्नथा॑ कर॒द्यज॑मानाय॒ शं योः ॥२॥

Narashanso novatu prayaje sham no astvanuyajo haveshu
Kshipadashastimapa durmatim hannatha karadyajamanaya sham yoh

182.3

तपु॑र्मूर्धा तपतु र॒क्षसो॒ ये ब्र॑ह्म॒द्विष॒ः शर॑वे॒ हन्त॒वा उ॑ ।
क्षि॒पदश॑स्ति॒मप॑ दुर्म॒तिं ह॒न्नथा॑ कर॒द्यज॑मानाय॒ शं योः ॥३॥

Tapurmurdha tapatu rakshaso ye brahmadvishah sharave hantava u
Kshipadashastimapa durmatim hannatha karadyajamanaya sham yoh