Sukta 163

163.1

6 vivriha kashyapah, yakshmanashanam, anushtup

अ॒क्षीभ्यां॑ ते॒ नासि॑काभ्यां॒ कर्णा॑भ्यां॒ छुबु॑का॒दधि॑ । यक्ष्मं॑ शीर्ष॒ण्यं॑ म॒स्तिष्का॑ज्जि॒ह्वाया॒ वि वृ॑हामि ते ॥१॥

Akshibhyam te nasikabhyam karnabhyam chhubukadadhi, yakshmam shirshanyam mastishkajjihvaya vi vrihami te

ग्री॒वाभ्य॑स्त उ॒ष्णिहा॑भ्य॒ः कीक॑साभ्यो अनू॒क्या॑त् । यक्ष्मं॑ दोष॒ण्य१मंसा॑भ्यां बा॒हुभ्यां॒ वि वृ॑हामि ते ॥२॥

Grivabhyasta ushnihabhyah kikasabhyo anukyat, yakshmam doshanya1mansabhyam bahubhyam vi vrihami te

आ॒न्त्रेभ्य॑स्ते॒ गुदा॑भ्यो वनि॒ष्ठोर्हृद॑या॒दधि॑ । यक्ष्मं॒ मत॑स्नाभ्यां य॒क्नः प्ला॒शिभ्यो॒ वि वृ॑हामि ते ॥३॥

Antrebhyaste gudabhyo vanishthorhridayadadhi, yakshmam matasnabhyam yaknah plashibhyo vi vrihami te

ऊ॒रुभ्यां॑ ते अष्ठी॒वद्भ्यां॒ पार्ष्णि॑भ्यां॒ प्रप॑दाभ्याम् । यक्ष्मं॒ श्रोणि॑भ्यां॒ भास॑दा॒द्भंस॑सो॒ वि वृ॑हामि ते ॥४॥

Urubhyam te ashthivadbhyam parshnibhyam prapadabhyam, yakshmam shronibhyam bhasadadbhansaso vi vrihami te

मेह॑नाद्वनं॒कर॑णा॒ल्लोम॑भ्यस्ते न॒खेभ्य॑ः । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥५॥

Mehanadvanankaranallomabhyaste nakhebhyah, yakshmam sarvasmadatmanastamidam vi vrihami te

अङ्गा॑दङ्गा॒ल्लोम्नो॑लोम्नो जा॒तं पर्व॑णिपर्वणि । यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥६॥

Angadangallomnolomno jatam parvaniparvani, yakshmam sarvasmadatmanastamidam vi vrihami te