Sukta 159

159.1

6 paulomi shachi, shachi (atmanam tushtava), anushtup

उद॒सौ सूर्यो॑ अगा॒दुद॒यं मा॑म॒को भग॑ः । अ॒हं तद्वि॑द्व॒ला पति॑म॒भ्य॑साक्षि विषास॒हिः ॥१॥

Udasau suryo agadudayam mamako bhagah, aham tadvidvala patimabhyasakshi vishasahih

अ॒हं के॒तुर॒हं मू॒र्धाऽहमु॒ग्रा वि॒वाच॑नी । ममेदनु॒ क्रतुं॒ पति॑ः सेहा॒नाया॑ उ॒पाच॑रेत् ॥२॥

Aham keturaham murdhahamugra vivachani, mamedanu kratum patih sehanaya upacharet

मम॑ पु॒त्राः श॑त्रु॒हणोऽथो॑ मे दुहि॒ता वि॒राट् । उ॒ताहम॑स्मि संज॒या पत्यौ॑ मे॒ श्लोक॑ उत्त॒मः ॥३॥

Mama putrah shatruhanotho me duhita virat, utahamasmi sanjaya patyau me shloka uttamah

येनेन्द्रो॑ ह॒विषा॑ कृ॒त्व्यभ॑वद्द्यु॒म्न्यु॑त्त॒मः । इ॒दं तद॑क्रि देवा असप॒त्ना किला॑भुवम् ॥४॥

Yenendro havisha kritvyabhavaddyumnyuttamah, idam tadakri deva asapatna kilabhuvam

अ॒स॒प॒त्ना स॑पत्न॒घ्नी जय॑न्त्यभि॒भूव॑री । आवृ॑क्षम॒न्यासां॒ वर्चो॒ राधो॒ अस्थे॑यसामिव ॥५॥

Asapatna sapatnaghni jayantyabhibhuvari, avrikshamanyasam varcho radho astheyasamiva

सम॑जैषमि॒मा अ॒हं स॒पत्नी॑रभि॒भूव॑री । यथा॒हम॒स्य वी॒रस्य॑ वि॒राजा॑नि॒ जन॑स्य च ॥६॥

Samajaishamima aham sapatnirabhibhuvari, yathahamasya virasya virajani janasya cha