Sukta 154

154.1

5 yami vaivasvati, bhavavrittam, anushtup

सोम॒ एके॑भ्यः पवते घृ॒तमेक॒ उपा॑सते । येभ्यो॒ मधु॑ प्र॒धाव॑ति॒ ताँश्चि॑दे॒वापि॑ गच्छतात् ॥१॥

Soma ekebhyah pavate ghritameka upasate, yebhyo madhu pradhavati tanshchidevapi gachchhatat

तप॑सा॒ ये अ॑नाधृ॒ष्यास्तप॑सा॒ ये स्व॑र्य॒युः । तपो॒ ये च॑क्रि॒रे मह॒स्ताँश्चि॑दे॒वापि॑ गच्छतात् ॥२॥

Tapasa ye anadhrishyastapasa ye svaryayuh, tapo ye chakrire mahastanshchidevapi gachchhatat

ये युध्य॑न्ते प्र॒धने॑षु॒ शूरा॑सो॒ ये त॑नू॒त्यज॑ः । ये वा॑ स॒हस्र॑दक्षिणा॒स्ताँश्चि॑दे॒वापि॑ गच्छतात् ॥३॥

Ye yudhyante pradhaneshu shuraso ye tanutyajah, ye va sahasradakshinastanshchidevapi gachchhatat

ये चि॒त्पूर्व॑ ऋत॒साप॑ ऋ॒तावा॑न ऋता॒वृध॑ः । पि॒तॄन्तप॑स्वतो यम॒ ताँश्चि॑दे॒वापि॑ गच्छतात् ॥४॥

Ye chitpurva ritasapa ritavana ritavridhah, pitrintapasvato yama tanshchidevapi gachchhatat

स॒हस्र॑णीथाः क॒वयो॒ ये गो॑पा॒यन्ति॒ सूर्य॑म् । ऋषी॒न्तप॑स्वतो यम तपो॒जाँ अपि॑ गच्छतात् ॥५॥

Sahasranithah kavayo ye gopayanti suryam, rishintapasvato yama tapojam api gachchhatat