Sukta 150

150.1

5 mriliko vasishthah, agnih, brihati, 4-5 uparishtajjyotih, 4 jagati va

समि॑द्धश्चि॒त्समि॑ध्यसे दे॒वेभ्यो॑ हव्यवाहन । आ॒दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि ॥१॥

Samiddhashchitsamidhyase devebhyo havyavahana, adityai rudrairvasubhirna a gahi mrilikaya na a gahi

इ॒मं य॒ज्ञमि॒दं वचो॑ जुजुषा॒ण उ॒पाग॑हि । मर्ता॑सस्त्वा समिधान हवामहे मृळी॒काय॑ हवामहे ॥२॥

Imam yagyamidam vacho jujushana upagahi, martasastva samidhana havamahe mrilikaya havamahe

त्वामु॑ जा॒तवे॑दसं वि॒श्ववा॑रं गृणे धि॒या । अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान् ॥३॥

Tvamu jatavedasam vishvavaram grine dhiya, agne devam a vaha nah priyavratanmrilikaya priyavratan

अ॒ग्निर्दे॒वो दे॒वाना॑मभवत्पु॒रोहि॑तो॒ऽग्निं म॑नु॒ष्या॒३ ऋष॑य॒ः समी॑धिरे ।
अ॒ग्निं म॒हो धन॑साताव॒हं हु॑वे मृळी॒कं धन॑सातये ॥४॥

Agnirdevo devanamabhavatpurohitognim manushya3 rishayah samidhire
Agnim maho dhanasatavaham huve mrilikam dhanasataye

अ॒ग्निरत्रिं॑ भ॒रद्वा॑जं॒ गवि॑ष्ठिरं॒ प्राव॑न्न॒ः कण्वं॑ त्र॒सद॑स्युमाह॒वे ।
अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः ॥५॥

Agniratrim bharadvajam gavishthiram pravannah kanvam trasadasyumahave
Agnim vasishtho havate purohito mrilikaya purohitah