Sukta 137

137.1

7, 1 bharadvajah, 2 kashyapah, 3 gautamah, 4 atrih, 5 vishvamitrah, 6 jamadagnih, 7 vasishthah, vishvedevah, anushtup

उ॒त दे॑वा॒ अव॑हितं॒ देवा॒ उन्न॑यथा॒ पुन॑ः । उ॒ताग॑श्च॒क्रुषं॑ देवा॒ देवा॑ जी॒वय॑था॒ पुन॑ः ॥१॥

Uta deva avahitam deva unnayatha punah, utagashchakrusham deva deva jivayatha punah

द्वावि॒मौ वातौ॑ वात॒ आ सिन्धो॒रा प॑रा॒वत॑ः । दक्षं॑ ते अ॒न्य आ वा॑तु॒ परा॒न्यो वा॑तु॒ यद्रप॑ः ॥२॥

Dvavimau vatau vata a sindhora paravatah, daksham te anya a vatu paranyo vatu yadrapah

आ वा॑त वाहि भेष॒जं वि वा॑त वाहि॒ यद्रप॑ः । त्वं हि वि॒श्वभे॑षजो दे॒वानां॑ दू॒त ईय॑से ॥३॥

A vata vahi bheshajam vi vata vahi yadrapah, tvam hi vishvabheshajo devanam duta iyase

आ त्वा॑गमं॒ शंता॑तिभि॒रथो॑ अरि॒ष्टता॑तिभिः । दक्षं॑ ते भ॒द्रमाभा॑र्षं॒ परा॒ यक्ष्मं॑ सुवामि ते ॥४॥

A tvagamam shantatibhiratho arishtatatibhih, daksham te bhadramabharsham para yakshmam suvami te

त्राय॑न्तामि॒ह दे॒वास्त्राय॑तां म॒रुतां॑ ग॒णः । त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त् ॥५॥

Trayantamiha devastrayatam marutam ganah, trayantam vishva bhutani yathayamarapa asat

आप॒ इद्वा उ॑ भेष॒जीरापो॑ अमीव॒चात॑नीः । आप॒ः सर्व॑स्य भेष॒जीस्तास्ते॑ कृण्वन्तु भेष॒जम् ॥६॥

Apa idva u bheshajirapo amivachatanih, apah sarvasya bheshajistaste krinvantu bheshajam

हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी । अ॒ना॒म॒यि॒त्नुभ्यां॑ त्वा॒ ताभ्यां॒ त्वोप॑ स्पृशामसि ॥७॥

Hastabhyam dashashakhabhyam jihva vachah purogavi, anamayitnubhyam tva tabhyam tvopa sprishamasi