Sukta 126

126.1

8 shailushih kulmalabarhisho, vamadevyohomugva, vishvedevah, uparishtadbrihati, 8 trishtup

न तमंहो॒ न दु॑रि॒तं देवा॑सो अष्ट॒ मर्त्य॑म् । स॒जोष॑सो॒ यम॑र्य॒मा मि॒त्रो नय॑न्ति॒ वरु॑णो॒ अति॒ द्विष॑ः ॥१॥

Na tamanho na duritam devaso ashta martyam, sajoshaso yamaryama mitro nayanti varuno ati dvishah

तद्धि व॒यं वृ॑णी॒महे॒ वरु॑ण॒ मित्रार्य॑मन् । येना॒ निरंह॑सो यू॒यं पा॒थ ने॒था च॒ मर्त्य॒मति॒ द्विष॑ः ॥२॥

Taddhi vayam vrinimahe varuna mitraryaman, yena niranhaso yuyam patha netha cha martyamati dvishah

ते नू॒नं नो॒ऽयमू॒तये॒ वरु॑णो मि॒त्रो अ॑र्य॒मा । नयि॑ष्ठा उ नो ने॒षणि॒ पर्षि॑ष्ठा उ नः प॒र्षण्यति॒ द्विष॑ः ॥३॥

Te nunam noyamutaye varuno mitro aryama, nayishtha u no neshani parshishtha u nah parshanyati dvishah

यू॒यं विश्वं॒ परि॑ पाथ॒ वरु॑णो मि॒त्रो अ॑र्य॒मा । यु॒ष्माकं॒ शर्म॑णि प्रि॒ये स्याम॑ सुप्रणीत॒योऽति॒ द्विष॑ः ॥४॥

Yuyam vishvam pari patha varuno mitro aryama, yushmakam sharmani priye syama supranitayoti dvishah

आ॒दि॒त्यासो॒ अति॒ स्रिधो॒ वरु॑णो मि॒त्रो अ॑र्य॒मा । उ॒ग्रं म॒रुद्भी॑ रु॒द्रं हु॑वे॒मेन्द्र॑म॒ग्निं स्व॒स्तयेऽति॒ द्विष॑ः ॥५॥

Adityaso ati sridho varuno mitro aryama, ugram marudbhi rudram huvemendramagnim svastayeti dvishah

नेता॑र ऊ॒ षु ण॑स्ति॒रो वरु॑णो मि॒त्रो अ॑र्य॒मा । अति॒ विश्वा॑नि दुरि॒ता राजा॑नश्चर्षणी॒नामति॒ द्विष॑ः ॥६॥

Netara u shu nastiro varuno mitro aryama, ati vishvani durita rajanashcharshaninamati dvishah

शु॒नम॒स्मभ्य॑मू॒तये॒ वरु॑णो मि॒त्रो अ॑र्य॒मा । शर्म॑ यच्छन्तु स॒प्रथ॑ आदि॒त्यासो॒ यदीम॑हे॒ अति॒ द्विष॑ः ॥७॥

Shunamasmabhyamutaye varuno mitro aryama, sharma yachchhantu sapratha adityaso yadimahe ati dvishah

यथा॑ ह॒ त्यद्व॑सवो गौ॒र्यं॑ चित्प॒दि षि॒ताममु॑ञ्चता यजत्राः ।
ए॒वो ष्व१स्मन्मु॑ञ्चता॒ व्यंह॒ः प्र ता॑र्यग्ने प्रत॒रं न॒ आयु॑ः ॥८॥

Yatha ha tyadvasavo gauryam chitpadi shitamamunchata yajatrah
Evo shva1smanmunchata vyanhah pra taryagne prataram na ayuh