Sukta 102

102.1

12 mudgalo bharmyashvah, drughanah, indro va, trishtup, 1, 3, 12 brihati

प्र ते॒ रथं॑ मिथू॒कृत॒मिन्द्रो॑ऽवतु धृष्णु॒या ।
अ॒स्मिन्ना॒जौ पु॑रुहूत श्र॒वाय्ये॑ धनभ॒क्षेषु॑ नोऽव ॥१॥

Pra te ratham mithukritamindrovatu dhrishnuya
Asminnajau puruhuta shravayye dhanabhaksheshu nova

उत्स्म॒ वातो॑ वहति॒ वासो॑ऽस्या॒ अधि॑रथं॒ यदज॑यत्स॒हस्र॑म् ।
र॒थीर॑भून्मुद्ग॒लानी॒ गवि॑ष्टौ॒ भरे॑ कृ॒तं व्य॑चेदिन्द्रसे॒ना ॥२॥

Utsma vato vahati vasosya adhiratham yadajayatsahasram
Rathirabhunmudgalani gavishtau bhare kritam vyachedindrasena

अ॒न्तर्य॑च्छ॒ जिघां॑सतो॒ वज्र॑मिन्द्राभि॒दास॑तः ।
दास॑स्य वा मघव॒न्नार्य॑स्य वा सनु॒तर्य॑वया व॒धम् ॥३॥

Antaryachchha jighansato vajramindrabhidasatah
Dasasya va maghavannaryasya va sanutaryavaya vadham

उ॒द्नो ह्र॒दम॑पिब॒ज्जर्हृ॑षाण॒ः कूटं॑ स्म तृं॒हद॒भिमा॑तिमेति ।
प्र मु॒ष्कभा॑र॒ः श्रव॑ इ॒च्छमा॑नोऽजि॒रं बा॒हू अ॑भर॒त्सिषा॑सन् ॥४॥

Udno hradamapibajjarhrishanah kutam sma trinhadabhimatimeti
Pra mushkabharah shrava ichchhamanojiram bahu abharatsishasan

न्य॑क्रन्दयन्नुप॒यन्त॑ एन॒ममे॑हयन्वृष॒भं मध्य॑ आ॒जेः ।
तेन॒ सूभ॑र्वं श॒तव॑त्स॒हस्रं॒ गवां॒ मुद्ग॑लः प्र॒धने॑ जिगाय ॥५॥

Nyakrandayannupayanta enamamehayanvrishabham madhya ajeh
Tena subharvam shatavatsahasram gavam mudgalah pradhane jigaya

क॒कर्द॑वे वृष॒भो यु॒क्त आ॑सी॒दवा॑वची॒त्सार॑थिरस्य के॒शी ।
दुधे॑र्यु॒क्तस्य॒ द्रव॑तः स॒हान॑स ऋ॒च्छन्ति॑ ष्मा नि॒ष्पदो॑ मुद्ग॒लानी॑म् ॥६॥

Kakardave vrishabho yukta asidavavachitsarathirasya keshi
Dudheryuktasya dravatah sahanasa richchhanti shma nishpado mudgalanim

उ॒त प्र॒धिमुद॑हन्नस्य वि॒द्वानुपा॑युन॒ग्वंस॑ग॒मत्र॒ शिक्ष॑न् ।
इन्द्र॒ उदा॑व॒त्पति॒मघ्न्या॑ना॒मरं॑हत॒ पद्या॑भिः क॒कुद्मा॑न् ॥७॥

Uta pradhimudahannasya vidvanupayunagvansagamatra shikshan
Indra udavatpatimaghnyanamaranhata padyabhih kakudman

शु॒नम॑ष्ट्रा॒व्य॑चरत्कप॒र्दी व॑र॒त्रायां॒ दार्वा॒नह्य॑मानः ।
नृ॒म्णानि॑ कृ॒ण्वन्ब॒हवे॒ जना॑य॒ गाः प॑स्पशा॒नस्तवि॑षीरधत्त ॥८॥

Shunamashtravyacharatkapardi varatrayam darvanahyamanah
Nrimnani krinvanbahave janaya gah paspashanastavishiradhatta

इ॒मं तं प॑श्य वृष॒भस्य॒ युञ्जं॒ काष्ठा॑या॒ मध्ये॑ द्रुघ॒णं शया॑नम् ।
येन॑ जि॒गाय॑ श॒तव॑त्स॒हस्रं॒ गवां॒ मुद्ग॑लः पृत॒नाज्ये॑षु ॥९॥

Imam tam pashya vrishabhasya yunjam kashthaya madhye drughanam shayanam
Yena jigaya shatavatsahasram gavam mudgalah pritanajyeshu

आ॒रे अ॒घा को न्वि१त्था द॑दर्श॒ यं यु॒ञ्जन्ति॒ तम्वा स्था॑पयन्ति ।
नास्मै॒ तृणं॒ नोद॒कमा भ॑र॒न्त्युत्त॑रो धु॒रो व॑हति प्र॒देदि॑शत् ॥१०॥

Are agha ko nvi1ttha dadarsha yam yunjanti tamva sthapayanti
Nasmai trinam nodakama bharantyuttaro dhuro vahati pradedishat

प॒रि॒वृ॒क्तेव॑ पति॒विद्य॑मान॒ट् पीप्या॑ना॒ कूच॑क्रेणेव सि॒ञ्चन् ।
ए॒षै॒ष्या॑ चिद्र॒थ्या॑ जयेम सुम॒ङ्गलं॒ सिन॑वदस्तु सा॒तम् ॥११॥

Parivrikteva patividyamanat pipyana kuchakreneva sinchan
Eshaishya chidrathya jayema sumangalam sinavadastu satam

त्वं विश्व॑स्य॒ जग॑त॒श्चक्षु॑रिन्द्रासि॒ चक्षु॑षः । वृषा॒ यदा॒जिं वृष॑णा॒ सिषा॑ससि चो॒दय॒न्वध्रि॑णा यु॒जा ॥१२॥

Tvam vishvasya jagatashchakshurindrasi chakshushah, vrisha yadajim vrishana sishasasi chodayanvadhrina yuja