Sukta 96

96.1

9 kutsa angirasah, agnih, dravinoda agnirva, trishtup

स प्र॒त्नथा॒ सह॑सा॒ जाय॑मानः स॒द्यः काव्या॑नि॒ बळ॑धत्त॒ विश्वा॑ ।
आप॑श्च मि॒त्रं धि॒षणा॑ च साधन् दे॒वा अ॒ग्निं धा॑रयन् द्रविणो॒दाम् ॥१॥

Sa pratnatha sahasa jayamanah sadyah kavyani baladhatta vishva
Apashcha mitram dhishana cha sadhan deva agnim dharayan dravinodam

स पूर्व॑या नि॒विदा॑ क॒व्यता॒योरि॒माः प्र॒जा अ॑जनय॒न्मनू॑नाम् ।
वि॒वस्व॑ता॒ चक्ष॑सा॒ द्याम॒पश्च॑ दे॒वा अ॒ग्निं धा॑रयन् द्रविणो॒दाम् ॥२॥

Sa purvaya nivida kavyatayorimah praja ajanayanmanunam
Vivasvata chakshasa dyamapashcha deva agnim dharayan dravinodam

तमी॑ळत प्रथ॒मं य॑ज्ञ॒साधं॒ विश॒ आरी॒राहु॑तमृञ्जसा॒नम् ।
ऊ॒र्जः पु॒त्रं भ॑र॒तं सृ॒प्रदा॑नुं दे॒वा अ॒ग्निं धा॑रयन् द्रविणो॒दाम् ॥३॥

Tamilata prathamam yagyasadham visha arirahutamrinjasanam
Urjah putram bharatam sripradanum deva agnim dharayan dravinodam

स मा॑त॒रिश्वा॑ पुरु॒वार॑पुष्टिर्वि॒दद् गा॒तुं तन॑याय स्व॒र्वित् ।
वि॒शां गो॒पा ज॑नि॒ता रोद॑स्योर्दे॒वा अ॒ग्निं धा॑रयन् द्रविणो॒दाम् ॥४॥

Sa matarishva puruvarapushtirvidad gatum tanayaya svarvit
Visham gopa janita rodasyordeva agnim dharayan dravinodam

नक्तो॒षासा॒ वर्ण॑मा॒मेम्या॑ने धा॒पये॑ते॒ शिशु॒मेकं॑ समी॒ची ।
द्यावा॒क्षामा॑ रु॒क्मो अ॒न्तर्वि भा॑ति दे॒वा अ॒ग्निं धा॑रयन् द्रविणो॒दाम् ॥५॥

Naktoshasa varnamamemyane dhapayete shishumekam samichi
Dyavakshama rukmo antarvi bhati deva agnim dharayan dravinodam

रा॒यो बु॒ध्नः सं॒गम॑नो॒ वसू॑नां य॒ज्ञस्य॑ के॒तुर्म॑न्म॒साध॑नो॒ वेः ।
अ॒मृ॒त॒त्वं रक्ष॑माणास एनं दे॒वा अ॒ग्निं धा॑रयन् द्रविणो॒दाम् ॥६॥

Rayo budhnah sangamano vasunam yagyasya keturmanmasadhano veh
Amritatvam rakshamanasa enam deva agnim dharayan dravinodam

नू च॑ पु॒रा च॒ सद॑नं रयी॒णां जा॒तस्य॑ च॒ जाय॑मानस्य च॒ क्षाम् ।
स॒तश्च॑ गो॒पां भव॑तश्च॒ भूरे॑र्दे॒वा अ॒ग्निं धा॑रयन् द्रविणो॒दाम् ॥७॥

Nu cha pura cha sadanam rayinam jatasya cha jayamanasya cha ksham
Satashcha gopam bhavatashcha bhurerdeva agnim dharayan dravinodam

द्र॒वि॒णो॒दा द्रवि॑णसस्तु॒रस्य॑ द्रविणो॒दाः सन॑रस्य॒ प्र यं॑सत् ।
द्र॒वि॒णो॒दा वी॒रव॑ती॒मिषं॑ नो द्रविणो॒दा रा॑सते दी॒र्घमायु॑ः ॥८॥

Dravinoda dravinasasturasya dravinodah sanarasya pra yansat
Dravinoda viravatimisham no dravinoda rasate dirghamayuh

ए॒वा नो॑ अग्ने स॒मिधा॑ वृधा॒नो रे॒वत् पा॑वक॒ श्रव॑स॒॒ वि भा॑हि ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥९॥

Eva no agne samidha vridhano revat pavaka shravasa vi bhahi
Tanno mitro varuno mamahantamaditih sindhuh prithivi uta dyauh