Sukta 26

26.1

10 ajigartih shunahshepa sa kritrimo vaishvamitro devaratah, agnih, , gayatri

वसि॑ष्वा॒ हि मि॑येध्य॒ वस्त्रा॑ण्यूर्जां पते । सेमं नो॑ अध्व॒रं य॑ज ॥१॥

Vasishva hi miyedhya vastranyurjam pate, semam no adhvaram yaja

नि नो॒ होता॒ वरे॑ण्य॒ः सदा॑ यविष्ठ॒ मन्म॑भिः । अग्ने॑ दि॒वित्म॑ता॒ वच॑ः ॥२॥

Ni no hota varenyah sada yavishtha manmabhih, agne divitmata vachah

आ हि ष्मा॑ सू॒नवे॑ पि॒तापिर्यज॑त्या॒पये॑ । सखा॒ सख्ये॒ वरे॑ण्यः ॥३॥

A hi shma sunave pitapiryajatyapaye, sakha sakhye varenyah

आ नो॑ ब॒र्ही रि॒शाद॑सो॒ वरु॑णो मि॒त्रो अ॑र्य॒मा । सीद॑न्तु॒ मनु॑षो यथा ॥४॥

A no barhi rishadaso varuno mitro aryama, sidantu manusho yatha

पूर्व्य॑ होतर॒स्य नो॒ मन्द॑स्व स॒ख्यस्य॑ च । इ॒मा उ॒ षु श्रु॑धी॒ गिर॑ः ॥५॥

Purvya hotarasya no mandasva sakhyasya cha, ima u shu shrudhi girah

यच्चि॒द्धि शश्व॑ता॒ तना॑ दे॒वंदे॑वं॒ यजा॑महे । त्वे इद्धू॑यते ह॒विः ॥६॥

Yachchiddhi shashvata tana devandevam yajamahe, tve iddhuyate havih

प्रि॒यो नो॑ अस्तु वि॒श्पति॒र्होता॑ म॒न्द्रो वरे॑ण्यः । प्रि॒याः स्व॒ग्नयो॑ व॒यम् ॥७॥

Priyo no astu vishpatirhota mandro varenyah, priyah svagnayo vayam

स्व॒ग्नयो॒ हि वार्यं॑ दे॒वासो॑ दधि॒रे च॑ नः । स्व॒ग्नयो॑ मनामहे ॥८॥

Svagnayo hi varyam devaso dadhire cha nah, svagnayo manamahe

अथा॑ न उ॒भये॑षा॒ममृ॑त॒ मर्त्या॑नाम् । मि॒थः स॑न्तु॒ प्रश॑स्तयः ॥९॥

Atha na ubhayeshamamrita martyanam, mithah santu prashastayah

विश्वे॑भिरग्ने अ॒ग्निभि॑रि॒मं य॒ज्ञमि॒दं वच॑ः । चनो॑ धाः सहसो यहो ॥१०॥

Vishvebhiragne agnibhirimam yagyamidam vachah, chano dhah sahaso yaho