Sukta 125

125.1

7 kakshivan dairghatamasa aushijah, svanayasya danastutih, trishtup, 4-5 jagati

प्रा॒ता रत्नं॑ प्रात॒रित्वा॑ दधाति॒ तं चि॑कि॒त्वान् प्र॑ति॒गृह्या॒ नि ध॑त्ते ।
तेन॑ प्र॒जां व॒र्धय॑मान॒ आयू॑ रा॒यस्पोषे॑ण सचते सु॒वीर॑ः ॥१॥

Prata ratnam prataritva dadhati tam chikitvan pratigrihya ni dhatte
Tena prajam vardhayamana ayu rayasposhena sachate suvirah

125.2

सु॒गुर॑सत् सुहिर॒ण्यः स्वश्वो॑ बृ॒हद॑स्मै॒ वय॒ इन्द्रो॑ दधाति ।
यस्त्वा॒यन्तं॒ वसु॑ना प्रातरित्वो मु॒क्षीज॑येव॒ पदि॑मुत्सि॒नाति॑ ॥२॥

Sugurasat suhiranyah svashvo brihadasmai vaya indro dadhati
Yastvayantam vasuna prataritvo mukshijayeva padimutsinati

125.3

आय॑म॒द्य सु॒कृतं॑ प्रा॒तरि॒च्छन्नि॒ष्टेः पु॒त्रं वसु॑मता॒ रथे॑न ।
अं॒शोः सु॒तं पा॑यय मत्स॒रस्य॑ क्ष॒यद्वी॑रं वर्धय सू॒नृता॑भिः ॥३॥

Ayamadya sukritam pratarichchhannishteh putram vasumata rathena
Anshoh sutam payaya matsarasya kshayadviram vardhaya sunritabhih

125.4

उप॑ क्षरन्ति॒ सिन्ध॑वो मयो॒भुव॑ ईजा॒नं च॑ य॒क्ष्यमा॑णं च धे॒नव॑ः ।
पृ॒णन्तं॑ च॒ पपु॑रिं च श्रव॒स्यवो॑ घृ॒तस्य॒ धारा॒ उप॑ यन्ति वि॒श्वत॑ः ॥४॥

Upa ksharanti sindhavo mayobhuva ijanam cha yakshyamanam cha dhenavah
Prinantam cha papurim cha shravasyavo ghritasya dhara upa yanti vishvatah

125.5

नाक॑स्य पृ॒ष्ठे अधि॑ तिष्ठति श्रि॒तो यः पृ॒णाति॒ स ह॑ दे॒वेषु॑ गच्छति ।
तस्मा॒ आपो॑ घृ॒तम॑र्षन्ति॒ सिन्ध॑व॒स्तस्मा॑ इ॒यं दक्षि॑णा पिन्वते॒ सदा॑ ॥५॥

Nakasya prishthe adhi tishthati shrito yah prinati sa ha deveshu gachchhati
Tasma apo ghritamarshanti sindhavastasma iyam dakshina pinvate sada

125.6

दक्षि॑णावता॒मिदि॒मानि॑ चि॒त्रा दक्षि॑णावतां दि॒वि सूर्या॑सः ।
दक्षि॑णावन्तो अ॒मृतं॑ भजन्ते॒ दक्षि॑णावन्त॒ः प्र ति॑रन्त॒ आयु॑ः ॥६॥

Dakshinavatamidimani chitra dakshinavatam divi suryasah
Dakshinavanto amritam bhajante dakshinavantah pra tiranta ayuh

125.7

मा पृ॒णन्तो॒ दुरि॑त॒मेन॒ आर॒न् मा जा॑रिषुः सू॒रय॑ः सुव्र॒तास॑ः ।
अ॒न्यस्तेषां॑ परि॒धिर॑स्तु॒ कश्चि॒दपृ॑णन्तम॒भि सं य॑न्तु॒ शोका॑ः ॥७॥

Ma prinanto duritamena aran ma jarishuh surayah suvratasah
Anyastesham paridhirastu kashchidaprinantamabhi sam yantu shokah