UtshovDoha 99
99.1
Chaupai
सिर भुज बाढ़ि देखि रिपु केरी। भालु कपिन्ह रिस भई घनेरी।।
मरत न मूढ़ कटेउ भुज सीसा। धाए कोपि भालु भट कीसा।।
बालितनय मारुति नल नीला। बानरराज दुबिद बलसीला।।
बिटप महीधर करहिं प्रहारा। सोइ गिरि तरु गहि कपिन्ह सो मारा।।
एक नखन्हि रिपु बपुष बिदारी। भअगि चलहिं एक लातन्ह मारी।।
तब नल नील सिरन्हि चढ़ि गयऊ। नखन्हि लिलार बिदारत भयऊ।।
रुधिर देखि बिषाद उर भारी। तिन्हहि धरन कहुँ भुजा पसारी।।
गहे न जाहिं करन्हि पर फिरहीं। जनु जुग मधुप कमल बन चरहीं।।
कोपि कूदि द्वौ धरेसि बहोरी। महि पटकत भजे भुजा मरोरी।।
पुनि सकोप दस धनु कर लीन्हे। सरन्हि मारि घायल कपि कीन्हे।।
हनुमदादि मुरुछित करि बंदर। पाइ प्रदोष हरष दसकंधर।।
मुरुछित देखि सकल कपि बीरा। जामवंत धायउ रनधीरा।।
संग भालु भूधर तरु धारी। मारन लगे पचारि पचारी।।
भयउ क्रुद्ध रावन बलवाना। गहि पद महि पटकइ भट नाना।।
देखि भालुपति निज दल घाता। कोपि माझ उर मारेसि लाता।।
Sir bhuj barhi dekhi ripu keri, bhalu kapinha ris bhai ghaneri
Marat na murh kateu bhuj sisa, dhae kopi bhalu bhat kisa
Balitanay maruti nal nila, banararaj dubid balasila
Bitap mahidhar karahin prahara, soi giri taru gahi kapinha so mara
Ek nakhanhi ripu bapush bidari, bhaagi chalahin ek latanha mari
Tab nal nil siranhi charhi gayau, nakhanhi lilar bidarat bhayau
Rudhir dekhi bishad ur bhari, tinhahi dharan kahun bhuja pasari
Gahe na jahin karanhi par phirahin, janu jug madhup kamal ban charahin
Kopi kudi dvau dharesi bahori, mahi patakat bhaje bhuja marori
Puni sakop das dhanu kar linhe, saranhi mari ghayal kapi kinhe
Hanumadadi muruchhit kari bandar, pai pradosh harash dasakandhar
Muruchhit dekhi sakal kapi bira, jamavant dhayau ranadhira
Sang bhalu bhudhar taru dhari, maran lage pachari pachari
Bhayau kruddha ravan balavana, gahi pad mahi patakai bhat nana
Dekhi bhalupati nij dal ghata, kopi majh ur maresi lata
99.2
Chhand
उर लात घात प्रचंड लागत बिकल रथ ते महि परा।
गहि भालु बीसहुँ कर मनहुँ कमलन्हि बसे निसि मधुकरा।।
मुरुछित बिलोकि बहोरि पद हति भालुपति प्रभु पहिं गयौ।
निसि जानि स्यंदन घालि तेहि तब सूत जतनु करत भयो।।
Ur lat ghat prachand lagat bikal rath te mahi para
Gahi bhalu bisahun kar manahun kamalanhi base nisi madhukara
Muruchhit biloki bahori pad hati bhalupati prabhu pahin gayau
Nisi jani syandan ghali tehi tab sut jatanu karat bhayo
99.3
Doha/soratha
मुरुछा बिगत भालु कपि सब आए प्रभु पास।
निसिचर सकल रावनहि घेरि रहे अति त्रास ॥98॥
Muruchha bigat bhalu kapi sab ae prabhu pas
Nisichar sakal ravanahi gheri rahe ati tras