UtshovDoha 105
105.1
Chaupai
पति सिर देखत मंदोदरी। मुरुछित बिकल धरनि खसि परी।।
जुबति बृंद रोवत उठि धाईं। तेहि उठाइ रावन पहिं आई।।
पति गति देखि ते करहिं पुकारा। छूटे कच नहिं बपुष सँभारा।।
उर ताड़ना करहिं बिधि नाना। रोवत करहिं प्रताप बखाना।।
तव बल नाथ डोल नित धरनी। तेज हीन पावक ससि तरनी।।
सेष कमठ सहि सकहिं न भारा। सो तनु भूमि परेउ भरि छारा।।
बरुन कुबेर सुरेस समीरा। रन सन्मुख धरि काहुँ न धीरा।।
भुजबल जितेहु काल जम साईं। आजु परेहु अनाथ की नाईं।।
जगत बिदित तुम्हारी प्रभुताई। सुत परिजन बल बरनि न जाई।।
राम बिमुख अस हाल तुम्हारा। रहा न कोउ कुल रोवनिहारा।।
तव बस बिधि प्रपंच सब नाथा। सभय दिसिप नित नावहिं माथा।।
अब तव सिर भुज जंबुक खाहीं। राम बिमुख यह अनुचित नाहीं।।
काल बिबस पति कहा न माना। अग जग नाथु मनुज करि जाना।।
Pati sir dekhat mandodari, muruchhit bikal dharani khasi pari
Jubati brind rovat uthi dhaim, tehi uthai ravan pahin ai
Pati gati dekhi te karahin pukara, chhute kach nahin bapush sambhara
Ur tarana karahin bidhi nana, rovat karahin pratap bakhana
Tav bal nath dol nit dharani, tej hin pavak sasi tarani
Sesh kamath sahi sakahin na bhara, so tanu bhumi pareu bhari chhara
Barun kuber sures samira, ran sanmukh dhari kahun na dhira
Bhujabal jitehu kal jam saim, aju parehu anath ki naim
Jagat bidit tumhari prabhutai, sut parijan bal barani na jai
Ram bimukh as hal tumhara, raha na kou kul rovanihara
Tav bas bidhi prapanch sab natha, sabhay disip nit navahin matha
Ab tav sir bhuj jambuk khahin, ram bimukh yah anuchit nahin
Kal bibas pati kaha na mana, ag jag nathu manuj kari jana
105.2
Chhand
जान्यो मनुज करि दनुज कानन दहन पावक हरि स्वयं।
जेहि नमत सिव ब्रह्मादि सुर पिय भजेहु नहिं करुनामयं।।
आजन्म ते परद्रोह रत पापौघमय तव तनु अयं।
तुम्हहू दियो निज धाम राम नमामि ब्रह्म निरामयं।।
Janyo manuj kari danuj kanan dahan pavak hari svayam
Jehi namat siv brahmadi sur piy bhajehu nahin karunamayam
Ajanma te paradroh rat papaughamay tav tanu ayam
Tumhahu diyo nij dham ram namami brahma niramayam
105.3
Doha/soratha
अहह नाथ रघुनाथ सम कृपासिंधु नहिं आन।
जोगि बृंद दुर्लभ गति तोहि दीन्हि भगवान ॥104॥
Ahah nath raghunath sam kripasindhu nahin an
Jogi brind durlabh gati tohi dinhi bhagavan