UtshovDoha 3
3.1
Chaupai
निसिचरि एक सिंधु महुँ रहई। करि माया नभु के खग गहई।।
जीव जंतु जे गगन उड़ाहीं। जल बिलोकि तिन्ह कै परिछाहीं।।
गहइ छाहँ सक सो न उड़ाई। एहि बिधि सदा गगनचर खाई।।
सोइ छल हनूमान कहँ कीन्हा। तासु कपटु कपि तुरतहिं चीन्हा।।
ताहि मारि मारुतसुत बीरा। बारिधि पार गयउ मतिधीरा।।
तहाँ जाइ देखी बन सोभा। गुंजत चंचरीक मधु लोभा।।
नाना तरु फल फूल सुहाए। खग मृग बृंद देखि मन भाए।।
सैल बिसाल देखि एक आगें। ता पर धाइ चढेउ भय त्यागें।।
उमा न कछु कपि कै अधिकाई। प्रभु प्रताप जो कालहि खाई।।
गिरि पर चढि लंका तेहिं देखी। कहि न जाइ अति दुर्ग बिसेषी।।
अति उतंग जलनिधि चहु पासा। कनक कोट कर परम प्रकासा।।
Nisichari ek sindhu mahun rahai, kari maya nabhu ke khag gahai
Jiv jantu je gagan urahin, jal biloki tinha kai parichhahin
Gahai chhaham sak so na urai, ehi bidhi sada gaganachar khai
Soi chhal hanuman kaham kinha, tasu kapatu kapi turatahin chinha
Tahi mari marutasut bira, baridhi par gayau matidhira
Tahan jai dekhi ban sobha, gunjat chancharik madhu lobha
Nana taru phal phul suhae, khag mrig brind dekhi man bhae
Sail bisal dekhi ek agen, ta par dhai chadheu bhay tyagen
Uma na kachhu kapi kai adhikai, prabhu pratap jo kalahi khai
Giri par chadhi lanka tehin dekhi, kahi na jai ati durga biseshi
Ati utang jalanidhi chahu pasa, kanak kot kar param prakasa
3.2
Chhand
कनक कोट बिचित्र मनि कृत सुंदरायतना घना।
चउहट्ट हट्ट सुबट्ट बीथीं चारु पुर बहु बिधि बना।।
गज बाजि खच्चर निकर पदचर रथ बरूथिन्ह को गनै।।
बहुरूप निसिचर जूथ अतिबल सेन बरनत नहिं बनै।।
बन बाग उपबन बाटिका सर कूप बापीं सोहहीं।
नर नाग सुर गंधर्ब कन्या रूप मुनि मन मोहहीं।।
कहुँ माल देह बिसाल सैल समान अतिबल गर्जहीं।
नाना अखारेन्ह भिरहिं बहु बिधि एक एकन्ह तर्जहीं।।
करि जतन भट कोटिन्ह बिकट तन नगर चहुँ दिसि रच्छहीं।
कहुँ महिष मानषु धेनु खर अज खल निसाचर भच्छहीं।।
एहि लागि तुलसीदास इन्ह की कथा कछु एक है कही।
रघुबीर सर तीरथ सरीरन्हि त्यागि गति पैहहिं सही।।
Kanak kot bichitra mani krit sundarayatana ghana
Chauhatta hatta subatta bithin charu pur bahu bidhi bana
Gaj baji khachchar nikar padachar rath baruthinha ko ganai
Bahurup nisichar juth atibal sen baranat nahin banai
Ban bag upaban batika sar kup bapin sohahin
Nar nag sur gandharba kanya rup muni man mohahin
Kahun mal deh bisal sail saman atibal garjahin
Nana akharenha bhirahin bahu bidhi ek ekanha tarjahin
Kari jatan bhat kotinha bikat tan nagar chahun disi rachchhahin
Kahun mahish manashu dhenu khar aj khal nisachar bhachchhahin
Ehi lagi tulasidas inha ki katha kachhu ek hai kahi
Raghubir sar tirath sariranhi tyagi gati paihahin sahi
3.3
Doha/soratha
पुर रखवारे देखि बहु कपि मन कीन्ह बिचार।
अति लघु रूप धरौं निसि नगर करौं पइसार ॥3॥
Pur rakhavare dekhi bahu kapi man kinha bichar
Ati laghu rup dharaun nisi nagar karaun paisar