UtshovDoha 31
31.1
Chaupai
रघुपति अनुजहि आवत देखी। बाहिज चिंता कीन्हि बिसेषी।।
जनकसुता परिहरिहु अकेली। आयहु तात बचन मम पेली।।
निसिचर निकर फिरहिं बन माहीं। मम मन सीता आश्रम नाहीं।।
गहि पद कमल अनुज कर जोरी। कहेउ नाथ कछु मोहि न खोरी।।
अनुज समेत गए प्रभु तहवाँ। गोदावरि तट आश्रम जहवाँ।।
आश्रम देखि जानकी हीना। भए बिकल जस प्राकृत दीना।।
हा गुन खानि जानकी सीता। रूप सील ब्रत नेम पुनीता।।
लछिमन समुझाए बहु भाँती। पूछत चले लता तरु पाँती।।
हे खग मृग हे मधुकर श्रेनी। तुम्ह देखी सीता मृगनैनी।।
खंजन सुक कपोत मृग मीना। मधुप निकर कोकिला प्रबीना।।
कुंद कली दाड़िम दामिनी। कमल सरद ससि अहिभामिनी।।
बरुन पास मनोज धनु हंसा। गज केहरि निज सुनत प्रसंसा।।
श्रीफल कनक कदलि हरषाहीं। नेकु न संक सकुच मन माहीं।।
सुनु जानकी तोहि बिनु आजू। हरषे सकल पाइ जनु राजू।।
किमि सहि जात अनख तोहि पाहीं । प्रिया बेगि प्रगटसि कस नाहीं।।
एहि बिधि खौजत बिलपत स्वामी। मनहुँ महा बिरही अति कामी।।
पूरनकाम राम सुख रासी। मनुज चरित कर अज अबिनासी।।
आगे परा गीधपति देखा। सुमिरत राम चरन जिन्ह रेखा।।
Raghupati anujahi avat dekhi, bahij chinta kinhi biseshi
Janakasuta pariharihu akeli, ayahu tat bachan mam peli
Nisichar nikar phirahin ban mahin, mam man sita ashram nahin
Gahi pad kamal anuj kar jori, kaheu nath kachhu mohi na khori
Anuj samet gae prabhu tahavan, godavari tat ashram jahavan
Ashram dekhi janaki hina, bhae bikal jas prakrit dina
Ha gun khani janaki sita, rup sil brat nem punita
Lachhiman samujhae bahu bhanti, puchhat chale lata taru panti
He khag mrig he madhukar shreni, tumha dekhi sita mriganaini
Khanjan suk kapot mrig mina, madhup nikar kokila prabina
Kund kali darim damini, kamal sarad sasi ahibhamini
Barun pas manoj dhanu hansa, gaj kehari nij sunat prasansa
Shriphal kanak kadali harashahin, neku na sank sakuch man mahin
Sunu janaki tohi binu aju, harashe sakal pai janu raju
Kimi sahi jat anakh tohi pahin, priya begi pragatasi kas nahin
Ehi bidhi khaujat bilapat svami, manahun maha birahi ati kami
Puranakam ram sukh rasi, manuj charit kar aj abinasi
Age para gidhapati dekha, sumirat ram charan jinha rekha
31.2
Doha/soratha
कर सरोज सिर परसेउ कृपासिंधु रधुबीर।।
निरखि राम छबि धाम मुख बिगत भई सब पीर ॥30॥
Kar saroj sir paraseu kripasindhu radhubir
Nirakhi ram chhabi dham mukh bigat bhai sab pir