UtshovDoha 8
8.1
Chaupai
अस बिबेक जब देइ बिधाता। तब तजि दोष गुनहिं मनु राता।।
काल सुभाउ करम बरिआई। भलेउ प्रकृति बस चुकइ भलाई।।
सो सुधारि हरिजन जिमि लेहीं। दलि दुख दोष बिमल जसु देहीं।।
खलउ करहिं भल पाइ सुसंगू। मिटइ न मलिन सुभाउ अभंगू।।
लखि सुबेष जग बंचक जेऊ। बेष प्रताप पूजिअहिं तेऊ।।
उधरहिं अंत न होइ निबाहू। कालनेमि जिमि रावन राहू।।
किएहुँ कुबेष साधु सनमानू। जिमि जग जामवंत हनुमानू।।
हानि कुसंग सुसंगति लाहू। लोकहुँ बेद बिदित सब काहू।।
गगन चढ़इ रज पवन प्रसंगा। कीचहिं मिलइ नीच जल संगा।।
साधु असाधु सदन सुक सारीं। सुमिरहिं राम देहिं गनि गारी।।
धूम कुसंगति कारिख होई। लिखिअ पुरान मंजु मसि सोई।।
सोइ जल अनल अनिल संघाता। होइ जलद जग जीवन दाता।।
As bibek jab dei bidhata, tab taji dosh gunahin manu rata
Kal subhau karam bariai, bhaleu prakriti bas chukai bhalai
So sudhari harijan jimi lehin, dali dukh dosh bimal jasu dehin
Khalau karahin bhal pai susangu, mitai na malin subhau abhangu
Lakhi subesh jag banchak jeu, besh pratap pujiahin teu
Udharahin ant na hoi nibahu, kalanemi jimi ravan rahu
Kiehun kubesh sadhu sanamanu, jimi jag jamavant hanumanu
Hani kusang susangati lahu, lokahun bed bidit sab kahu
Gagan charhai raj pavan prasanga, kichahin milai nich jal sanga
Sadhu asadhu sadan suk sarin, sumirahin ram dehin gani gari
Dhum kusangati karikh hoi, likhia puran manju masi soi
Soi jal anal anil sanghata, hoi jalad jag jivan data
8.2
Doha/soratha
ग्रह भेषज जल पवन पट पाइ कुजोग सुजोग।
होहि कुबस्तु सुबस्तु जग लखहिं सुलच्छन लोग ॥7(क)॥
Grah bheshaj jal pavan pat pai kujog sujog
Hohi kubastu subastu jag lakhahin sulachchhan log, 7(ka)
8.3
Doha/soratha
सम प्रकास तम पाख दुहुँ नाम भेद बिधि कीन्ह।
ससि सोषक पोषक समुझि जग जस अपजस दीन्ह ॥7(ख)॥
Sam prakas tam pakh duhun nam bhed bidhi kinha
Sasi soshak poshak samujhi jag jas apajas dinha, 7(kh)
8.4
Doha/soratha
जड़ चेतन जग जीव जत सकल राममय जानि।
बंदउँ सब के पद कमल सदा जोरि जुग पानि ॥7(ग)॥
Jar chetan jag jiv jat sakal ramamay jani
Bandaum sab ke pad kamal sada jori jug pani, 7(ga)
8.5
Doha/soratha
देव दनुज नर नाग खग प्रेत पितर गंधर्ब।
बंदउँ किंनर रजनिचर कृपा करहु अब सर्ब ॥7(घ)॥
Dev danuj nar nag khag pret pitar gandharba
Bandaum kinnar rajanichar kripa karahu ab sarba, 7(gh)