UtshovChapter 34
34.1
अर्जुन उवाच
एवं सततयुक्ता ये भक्तास्त्वां पर्युपासते
ये चाप्यक्षरमव्यक्तं तेषां के योगवित्तमाः
Arjuna uvacha
Evam satatayukta ye bhaktastvam paryupasate
Ye chapyaksharamavyaktam tesham ke yogavittamah
34.2
श्रीभगवानुवाच
मय्यावेश्य मनो ये मां नित्ययुक्ता उपासते
श्रद्धया परयोपेतास्ते मे युक्ततमा मताः
Shribhagavanuvacha
Mayyaveshya mano ye mam nityayukta upasate
Shraddhaya parayopetaste me yuktatama matah
34.3
ये त्वक्षरमनिर्देश्यमव्यक्तं पर्युपासते
सर्वत्रगमचिन्त्यं च कूटस्थमचलं ध्रुवम्
Ye tvaksharamanirdeshyamavyaktam paryupasate
Sarvatragamachintyam cha kutasthamachalam dhruvam
34.4
संनियम्येन्द्रियग्रामं सर्वत्र समबुद्धयः
ते प्राप्नुवन्ति मामेव सर्वभूतहिते रताः
Sanniyamyendriyagramam sarvatra samabuddhayah
Te prapnuvanti mameva sarvabhutahite ratah
34.5
क्लेशोऽधिकतरस्तेषामव्यक्तासक्तचेतसाम्
अव्यक्ता हि गतिर्दुःखं देहवद्भिरवाप्यते
Kleshodhikatarasteshamavyaktasaktachetasam
Avyakta hi gatirduhkham dehavadbhiravapyate
34.6
ये तु सर्वाणि कर्माणि मयि संन्यस्य मत्पराः
अनन्येनैव योगेन मां ध्यायन्त उपासते
Ye tu sarvani karmani mayi sannyasya matparah
Ananyenaiva yogena mam dhyayanta upasate
34.7
तेषामहं समुद्धर्ता मृत्युसंसारसागरात्
भवामि नचिरात्पार्थ मय्यावेशितचेतसाम्
Teshamaham samuddharta mrityusansarasagarat
Bhavami nachiratpartha mayyaveshitachetasam
34.8
मय्येव मन आधत्स्व मयि बुद्धिं निवेशय
निवसिष्यसि मय्येव अत ऊर्ध्वं न संशयः
Mayyeva mana adhatsva mayi buddhim niveshaya
Nivasishyasi mayyeva ata urdhvam na sanshayah
34.9
अथ चित्तं समाधातुं न शक्नोषि मयि स्थिरम्
अभ्यासयोगेन ततो मामिच्छाप्तुं धनंजय
Atha chittam samadhatum na shaknoshi mayi sthiram
Abhyasayogena tato mamichchhaptum dhananjaya
34.10
अभ्यासेऽप्यसमर्थोऽसि मत्कर्मपरमो भव
मदर्थमपि कर्माणि कुर्वन्सिद्धिमवाप्स्यसि
Abhyasepyasamarthosi matkarmaparamo bhava
Madarthamapi karmani kurvansiddhimavapsyasi
34.11
अथैतदप्यशक्तोऽसि कर्तुं मद्योगमाश्रितः
सर्वकर्मफलत्यागं ततः कुरु यतात्मवान्
Athaitadapyashaktosi kartum madyogamashritah
Sarvakarmaphalatyagam tatah kuru yatatmavan
34.12
श्रेयो हि ज्ञानमभ्यासाज्ज्ञानाद्ध्यानं विशिष्यते
ध्यानात्कर्मफलत्यागस्त्यागाच्छान्तिरनन्तरम्
Shreyo hi gyanamabhyasajgyanaddhyanam vishishyate
Dhyanatkarmaphalatyagastyagachchhantiranantaram
34.13
अद्वेष्टा सर्वभूतानां मैत्रः करुण एव च
निर्ममो निरहंकारः समदुःखसुखः क्षमी
Adveshta sarvabhutanam maitrah karuna eva cha
Nirmamo nirahankarah samaduhkhasukhah kshami
34.14
संतुष्टः सततं योगी यतात्मा दृढनिश्चयः
मय्यर्पितमनोबुद्धिर्यो मद्भक्तः स मे प्रियः
Santushtah satatam yogi yatatma dridhanishchayah
Mayyarpitamanobuddhiryo madbhaktah sa me priyah
34.15
यस्मान्नोद्विजते लोको लोकान्नोद्विजते च यः
हर्षामर्षभयोद्वेगैर्मुक्तो यः स च मे प्रियः
Yasmannodvijate loko lokannodvijate cha yah
Harshamarshabhayodvegairmukto yah sa cha me priyah
34.16
अनपेक्षः शुचिर्दक्ष उदासीनो गतव्यथः
सर्वारम्भपरित्यागी यो मद्भक्तः स मे प्रियः
Anapekshah shuchirdaksha udasino gatavyathah
Sarvarambhaparityagi yo madbhaktah sa me priyah
34.17
यो न हृष्यति न द्वेष्टि न शोचति न काङ्क्षति
शुभाशुभपरित्यागी भक्तिमान्यः स मे प्रियः
Yo na hrishyati na dveshti na shochati na kankshati
Shubhashubhaparityagi bhaktimanyah sa me priyah
34.18
समः शत्रौ च मित्रे च तथा मानावमानयोः
शीतोष्णसुखदुःखेषु समः सङ्गविवर्जितः
Samah shatrau cha mitre cha tatha manavamanayoh
Shitoshnasukhaduhkheshu samah sangavivarjitah
34.19
तुल्यनिन्दास्तुतिर्मौनी संतुष्टो येन केनचित्
अनिकेतः स्थिरमतिर्भक्तिमान्मे प्रियो नरः
Tulyanindastutirmauni santushto yena kenachit
Aniketah sthiramatirbhaktimanme priyo narah
34.20
ये तु धर्म्यामृतमिदं यथोक्तं पर्युपासते
श्रद्दधाना मत्परमा भक्तास्तेऽतीव मे प्रियाः
Ye tu dharmyamritamidam yathoktam paryupasate
Shraddadhana matparama bhaktastetiva me priyah