Sukta 10

10.1

Atma, 1-28 brahma, gauh, virat adhyatmam, 23 mitravarunau, trishtup, 1, 7, 14, 17-18 jagati, 21 panchapadatishakvari, 24 chatushpada puraskritirbhurigatijagati, 2, 26-27 bhurik

यद् गा॑य॒त्रे अधि॑ गाय॒त्रमाहि॑तं॒ त्रैष्टु॑भं वा॒ त्रैष्टु॑भान्नि॒रत॑क्षत ।
यद् वा॒ जग॒ज्जग॒त्याहि॑तं प॒दं य इत् तद् वि॒दुस्ते अ॑मृत॒त्वमा॑नशुः ॥१॥

Yad gayatre adhi gayatramahitam traishtubham va traishtubhanniratakshata
Yad va jagajjagatyahitam padam ya it tad viduste amritatvamanashuh

10.2

गा॒य॒त्रेण॒ प्रति॑ मिमीते अ॒र्कम॒र्केण॒ साम॒ त्रैष्टु॑भेन वा॒कम्।
वा॒केन॑ वा॒कं द्वि॒पदा॒ चतु॑ष्पदा॒क्षरे॑ण मिमते स॒प्त वाणीः॑ ॥२॥

Gayatrena prati mimite arkamarkena sama traishtubhena vakam
Vakena vakam dvipada chatushpadaksharena mimate sapta vanih

10.3

जग॑ता॒ सिन्धुं॑ दि॒व्यऽस्कभायद् रथंत॒रे सूर्यं॒ पर्य॑पश्यत्।
गा॒य॒त्रस्य॑ स॒मिध॑स्ति॒स्र आ॑हु॒स्ततो॑ म॒ह्ना प्र रि॑रिचे महि॒त्वा ॥३॥

Jagata sindhum divyaskabhayad rathantare suryam paryapashyat
Gayatrasya samidhastisra ahustato mahna pra ririche mahitva

10.4

उप॑ ह्वये सु॒दुघां॑ धे॒नुमे॒तां सु॒हस्तो॑ गो॒धुगु॒त दो॑हदेनाम्।
श्रेष्ठं॑ स॒वं स॑वि॒ता सा॑विषन्नो॒ऽभीऽद्धो घ॒र्मस्तदु॒ षु प्र वो॑चत् ॥४॥

Upa hvaye sudugham dhenumetam suhasto godhuguta dohadenam
Shreshtham savam savita savishannobhiddho gharmastadu shu pra vochat

10.5

हि॒ङ्कृ॒ण्व॒ती व॑सु॒पत्नी॒ वसू॑नां व॒त्समि॒च्छन्ती॒ मन॑सा॒भ्यागा॑त्।
दु॒हाम॒श्विभ्यां॒ पयो॑ अ॒घ्न्येयं सा व॑र्धतां मह॒ते सौभ॑गाय ॥५॥

Hinkrinvati vasupatni vasunam vatsamichchhanti manasabhyagat
Duhamashvibhyam payo aghnyeyam sa vardhatam mahate saubhagaya

10.6

गौर॑मीमेद॒भि व॒त्सं मि॒षन्तं॑ मू॒र्धानं॒ हिङ्ङ॑कृणो॒न्मात॒वा उ॑ ।
सृक्वा॑णं घ॒र्मम॒भि वा॑वशा॒ना मिमा॑ति मा॒युं पय॑ते॒ पयो॑भिः ॥६॥

Gauramimedabhi vatsam mishantam murdhanam hinngakrinonmatava u
Srikvanam gharmamabhi vavashana mimati mayum payate payobhih

10.7

अ॒यं स शि॑ङ्क्ते॒ येन॒ गौर॒भिवृ॑ता॒ मिमा॑ति मा॒युं ध्व॒सना॒वधि॑ श्रि॒ता।
सा चि॒त्तिभि॒र्नि हि च॒कार॒ मर्त्या॑न् वि॒द्युद् भव॑न्ती॒ प्रति॑ व॒व्रिमौ॑हत ॥७॥

Ayam sa shinkte yena gaurabhivrita mimati mayum dhvasanavadhi shrita
Sa chittibhirni hi chakara martyan vidyud bhavanti prati vavrimauhata

10.8

अ॒नच्छ॑ये तु॒रगा॑तु जी॒वमेज॑द् ध्रु॒वं मध्य॒ आ प॒स्त्याऽनाम्।
जी॒वो मृ॒तस्य॑ चरति स्व॒धाभि॒रम॑र्त्यो॒ मर्त्ये॑ना॒ सयो॑निः ॥८॥

Anachchhaye turagatu jivamejad dhruvam madhya a pastyanam
Jivo mritasya charati svadhabhiramartyo martyena sayonih

10.9

वि॒धुं द॑द्रा॒णं स॑लि॒लस्य॑ पृ॒ष्ठे युवा॑नं॒ सन्तं॑ पलि॒तो ज॑गार ।
दे॒वस्य॑ पश्य॒ काव्यं॑ महि॒त्वाद्य म॒मार॒ स ह्यः समा॑न ॥९॥

Vidhum dadranam salilasya prishthe yuvanam santam palito jagara
Devasya pashya kavyam mahitvadya mamara sa hyah samana

10.10

य ईं॑ च॒कार॒ न सो अ॒स्य वे॑द॒ य ईं॑ द॒दर्श॒ हिरु॒गिन्नु तस्मा॑त्।
स मा॒तुर्योना॒ परि॑वीतो अ॒न्तर्ब॑हुप्र॒जा निरृ॑ति॒रा वि॑वेश ॥१०॥

Ya im chakara na so asya veda ya im dadarsha hiruginnu tasmat
Sa maturyona parivito antarbahupraja nirritira vivesha

10.11

अप॑श्यं गो॒पाम॑नि॒पद्य॑मान॒मा च॒ परा॑ च प॒थिभि॒श्चर॑न्तम्।
सस॒ध्रीचीः॒ स विषू॑ची॒र्वसा॑न॒ आ व॑रीवर्ति॒ भुव॑नेष्व॒न्तः ॥११॥

Apashyam gopamanipadyamanama cha para cha pathibhishcharantam
Sasadhrichih sa vishuchirvasana a varivarti bhuvaneshvantah

10.12

द्यौर्नः॑ पि॒ता ज॑नि॒ता नाभि॒रत्र॒ बन्धु॑र्नो मा॒ता पृ॑थि॒वी म॒हीयम्।
उ॒त्ता॒नयो॑श्च॒म्वो॒३र्योनि॑र॒न्तरत्रा॑ पि॒ता दु॑हि॒तुर्गर्भ॒माधा॑त् ॥१२॥

Dyaurnah pita janita nabhiratra bandhurno mata prithivi mahiyam
Uttanayoshchamvo3ryonirantaratra pita duhiturgarbhamadhat

10.13

पृ॒च्छामि॑ त्वा॒ पर॒मन्तं॑ पृथि॒व्याः पृ॒च्छामि॒ वृष्णो॒ अश्व॑स्य॒ रेतः॑ ।
पृ॒च्छामि॒ विश्व॑स्य॒ भुव॑नस्य॒ नाभिं॑ पृ॒च्छामि॑ वा॒चः प॑र॒मं व्योऽम ॥१३॥

Prichchhami tva paramantam prithivyah prichchhami vrishno ashvasya retah
Prichchhami vishvasya bhuvanasya nabhim prichchhami vachah paramam vyoma

10.14

इ॒यं वेदिः॒ परो॒ अन्तः॑ पृथि॒व्या अ॒यं सोमो॒ वृष्णो॒ अश्व॑स्य॒ रेतः॑ ।
अ॒यं य॒ज्ञो विश्व॑स्य॒ भुव॑नस्य॒ नाभि॑र्ब्र॒ह्मायं वा॒चः प॑र॒मं व्योऽम ॥१४॥

Iyam vedih paro antah prithivya ayam somo vrishno ashvasya retah
Ayam yagyo vishvasya bhuvanasya nabhirbrahmayam vachah paramam vyoma

10.15

न वि जा॑नामि॒ यदि॑वे॒दमस्मि॑ नि॒ण्यः संन॑द्धो॒ मन॑सा चरामि ।
य॒दा माग॑न् प्रथम॒जा ऋ॒तस्यादिद् वा॒चो अ॑श्नुवे भा॒गम॒स्याः ॥१५॥

Na vi janami yadivedamasmi ninyah sannaddho manasa charami
Yada magan prathamaja ritasyadid vacho ashnuve bhagamasyah

10.16

अपा॒ङ् प्राङे॑ति स्व॒धया॑ गृभी॒तोऽम॑र्त्यो॒ मर्त्ये॑ना॒ सयो॑निः ।
ता शश्व॑न्ता विषू॒चीना॑ वि॒यन्ता॒ न्य॑१न्यं चि॒क्युर्न नि चि॑क्युर॒न्यम् ॥१६॥

Apang prangeti svadhaya gribhitomartyo martyena sayonih
Ta shashvanta vishuchina viyanta nya1nyam chikyurna ni chikyuranyam

10.17

स॒प्तार्ध॑ग॒र्भा भुव॑नस्य॒ रेतो॒ विष्णो॑स्तिष्ठन्ति प्र॒दिशा॒ विध॑र्मणि ।
ते धी॒तिभि॒र्मन॑सा॒ ते वि॑प॒श्चितः॑ परि॒भुवः॑ परि॑ भवन्ति वि॒श्वतः॑ ॥१७॥

Saptardhagarbha bhuvanasya reto vishnostishthanti pradisha vidharmani
Te dhitibhirmanasa te vipashchitah paribhuvah pari bhavanti vishvatah

10.18

ऋ॒चो अ॒क्षरे॑ पर॒मे व्योऽम॒न् यस्मि॑न् दे॒वा अधि॒ विश्वे॑ निषे॒दुः ।
यस्तन्न वेद॒ किमृ॒चा क॑रिष्यति॒ य इत् तद् वि॒दुस्ते अ॒मी समा॑सते ॥१८॥

Richo akshare parame vyoman yasmin deva adhi vishve nisheduh
Yastanna veda kimricha karishyati ya it tad viduste ami samasate

10.19

ऋ॒चः प॒दं मात्र॑या क॒ल्पय॑न्तोऽर्ध॒र्चेन॑ चाक्लृपु॒र्विश्व॒मेज॑त्।
त्रि॒पाद् ब्रह्म॑ पुरु॒रूपं॒ वि त॑ष्ठे॒ तेन॑ जीवन्ति प्र॒दिश॒श्चत॑स्रः ॥१९॥

Richah padam matraya kalpayantordharchena chaklripurvishvamejat
Tripad brahma pururupam vi tashthe tena jivanti pradishashchatasrah

10.20

सू॒य॒व॒साद् भग॑वती॒ हि भू॒या अधा॑ व॒यं भग॑वन्तः स्याम ।
अ॒द्धि तृण॑मघ्न्ये विश्व॒दानीं॒ पिब॑ शु॒द्धमु॑द॒कमा॒चर॑न्ती ॥२०॥

Suyavasad bhagavati hi bhuya adha vayam bhagavantah syama
Addhi trinamaghnye vishvadanim piba shuddhamudakamacharanti

10.21

गौरिन्मि॑माय सलि॒लानि॒ तक्ष॒त्येक॑पदी द्वि॒पदी॒ सा चतु॑ष्पदी ।
अ॒ष्टाप॑दी॒ नव॑पदी बभू॒वुषी॑ स॒हस्रा॑क्षरा॒ भुव॑नस्य प॒ङ्क्तिस्तस्याः॑ समु॒द्रा अधि॒ वि क्ष॑रन्ति ॥२१॥

Gaurinmimaya salilani takshatyekapadi dvipadi sa chatushpadi
Ashtapadi navapadi babhuvushi sahasrakshara bhuvanasya panktistasyah samudra adhi vi ksharanti

10.22

कृ॒ष्णं नि॒यानं॒ हर॑यः सुप॒र्णा अ॒पो वसा॑ना॒ दिव॒मुत्प॑तन्ति ।
तं आव॑वृत्र॒न्त्सद॑नादृ॒तस्यादिद् घृ॒तेन॑ पृथि॒वीं व्यूऽदुः ॥२२॥

Krishnam niyanam harayah suparna apo vasana divamutpatanti
Tam avavritrantsadanadritasyadid ghritena prithivim vyuduh

10.23

अ॒पादे॑ति प्रथ॒मा प॒द्वती॑नां॒ कस्तद् वां॑ मित्रावरु॒णा चि॑केत ।
गर्भो॑ भा॒रं भ॑र॒त्या चि॑दस्या ऋ॒तं पिप॒र्त्यनृ॑तं नि पा॑ति ॥२३॥

Apadeti prathama padvatinam kastad vam mitravaruna chiketa
Garbho bharam bharatya chidasya ritam pipartyanritam ni pati

10.24

वि॒राड् वाग् विरा॑ट् पृ॑थि॒वी वि॒राड॒न्तरि॑क्षं वि॒राट् प्र॒जाप॑तिः ।
वि॒राण्मृ॒त्युः सा॒ध्याना॑मधिरा॒जो ब॑भूव॒ तस्य॑ भू॒तं भव्यं॒ वशे॒ स मे॑ भू॒तं भव्यं॒ वशे॑ कृणोतु ॥२४॥

Virad vag virat prithivi viradantariksham virat prajapatih
Viranmrityuh sadhyanamadhirajo babhuva tasya bhutam bhavyam vashe sa me bhutam bhavyam vashe krinotu

10.25

श॒क॒मयं॑ धू॒ममा॒राद॑पश्यं विषू॒वता॑ प॒र ए॒नाव॑रेण ।
उ॒क्षाणं॒ पृश्नि॑मपचन्त वी॒रास्तानि॒ धर्मा॑णि प्रथ॒मान्या॑सन् ॥२५॥

Shakamayam dhumamaradapashyam vishuvata para enavarena
Ukshanam prishnimapachanta virastani dharmani prathamanyasan

10.26

त्रयः॑ के॒शिन॑ ऋतु॒था वि च॑क्षते संवत्स॒रे व॑पत॒ एक॑ एषाम्।
विश्व॑म॒न्यो अ॑भि॒चष्टे॒ शची॑भि॒र्ध्राजि॒रेक॑स्य ददृशे॒ न रू॒पम् ॥२६॥

Trayah keshina ritutha vi chakshate sanvatsare vapata eka esham
Vishvamanyo abhichashte shachibhirdhrajirekasya dadrishe na rupam

10.27

च॒त्वारि॒ वाक् परि॑मिता प॒दानि॒ तानि॑ विदुर्ब्राह्म॒णा ये म॑नी॒षिणः॑ ।
गुहा॒ त्रीणि॒ निहि॑ता॒ नेङ्ग॑यन्ति तु॒रीयं॑ वा॒चो म॑नु॒ष्याऽवदन्ति ॥२७॥

Chatvari vak parimita padani tani vidurbrahmana ye manishinah
Guha trini nihita nengayanti turiyam vacho manushyavadanti

10.28

इन्द्रं॑ मि॒त्रं वरु॑णम॒ग्निमा॑हु॒रथो॑ दि॒व्यः स सु॑प॒र्णो ग॒रुत्मा॑न्।
ए॒कं सद् विप्रा॑ बहु॒धा व॑दन्त्य॒ग्निं य॒मं मा॑त॒रिश्वा॑नमाहुः ॥२८॥

Indram mitram varunamagnimahuratho divyah sa suparno garutman
Ekam sad vipra bahudha vadantyagnim yamam matarishvanamahuh