Sukta 1

1.1

Madhuvidya, 1-24 atharva, madhu, ashvinau, trishtup, 2 trishtubgarbha panktih, 3 paranushtup, 6 yavamadhya atishakvarigarbha mahabrihati, 7 yavamadhya atijagatarbha mahabrihati, 8 brihatigarbha sanstarapanktih, 9 parabrihati prastarapanktih, 10 paroshnikpanktih, 11-13, 15-16, 18-19 anushtup, 14 pura ushnik, 17 uparishtadvirad brihati, 20 bhurigvishtarapanktih, 21 ekavasana dvipadarchyanushtup, 22 tripada brahmi pura ushnik, 23 dvipada archi panktih, 24 tryavasana shat padashtih

दि॒वस्पृ॑थि॒व्या अ॒न्तरि॑क्षात् समु॒द्राद॒ग्नेर्वाता॑न्मधुक॒शा हि ज॒ज्ञे।
तां चा॑यि॒त्वामृतं॒ वसा॑नां हृ॒द्भिः प्र॒जाः प्रति॑ नन्दन्ति॒ सर्वाः॑ ॥१॥

Divasprithivya antarikshat samudradagnervatanmadhukasha hi jagye
Tam chayitvamritam vasanam hridbhih prajah prati nandanti sarvah

1.2

म॒हत् पयो॑ वि॒श्वरू॑पमस्याः समु॒द्रस्य॑ त्वो॒त रेत॑ आहुः ।
यत॒ ऐति॑ मधुक॒शा ररा॑णा॒ तत् प्रा॒णस्तद॒मृतं॒ निवि॑ष्टम् ॥२॥

Mahat payo vishvarupamasyah samudrasya tvota reta ahuh
Yata aiti madhukasha rarana tat pranastadamritam nivishtam

1.3

पश्य॑न्त्यस्याश्चरि॒तं पृ॑थि॒व्यां पृथ॒ङ् नरो॑ बहु॒धा मीमां॑समानाः ।
अ॒ग्नेर्वाता॑न्मधुक॒शा हि ज॒ज्ञे म॒रुता॑मु॒ग्रा न॒प्तिः ॥३॥

Pashyantyasyashcharitam prithivyam prithang naro bahudha mimansamanah
Agnervatanmadhukasha hi jagye marutamugra naptih

1.4

मा॒तादि॒त्यानां॑ दुहि॒ता वसू॑नां प्रा॒णः प्र॒जाना॑म॒मृत॑स्य॒ नाभिः॑ ।
हिर॑ण्यवर्णा मधुक॒शा घृ॒ताची॑ म॒हान् गर्भ॑श्चरति॒ मर्त्ये॑षु ॥४॥

Matadityanam duhita vasunam pranah prajanamamritasya nabhih
Hiranyavarna madhukasha ghritachi mahan garbhashcharati martyeshu

1.5

मधोः॒ कशा॑मजनयन्त दे॒वास्तस्या॒ गर्भो॑ अभवद् वि॒श्वरू॑पः ।
तं जा॒तं तरु॑णं पिपर्ति मा॒ता स जा॒तो विश्वा॒ भुव॑ना॒ वि च॑ष्टे ॥५॥

Madhoh kashamajanayanta devastasya garbho abhavad vishvarupah
Tam jatam tarunam piparti mata sa jato vishva bhuvana vi chashte

1.6

कस्तं प्र वे॑द॒ क उ॒ तं चि॑केत॒ यो अ॑स्या हृ॒दः क॒लशः॑ सोम॒धानो॒ अक्षि॑तः ।
ब्र॒ह्मा सु॑मे॒धाः सो अ॑स्मिन् मदेत ॥६॥

Kastam pra veda ka u tam chiketa yo asya hridah kalashah somadhano akshitah
Brahma sumedhah so asmin madeta

1.7

स तौ प्र वे॑द॒ स उ॒ तौ चि॑केत॒ याव॑स्याः॒ स्तनौ॑ स॒हस्र॑धारा॒वक्षि॑तौ ।
ऊर्जं॑ दुहाते॒ अन॑पस्फुरन्तौ ॥७॥

Sa tau pra veda sa u tau chiketa yavasyah stanau sahasradharavakshitau
Urjam duhate anapasphurantau

1.8

हि॒ङ्करि॑क्रती बृह॒ती व॑यो॒धा उ॒च्चैर्घो॑षा॒भ्येति॒ या व्र॒तम्।
त्रीन् घ॒र्मान॒भि वा॑वशा॒ना मिमा॑ति मा॒युं पय॑ते॒ पयो॑भिः ॥८॥

Hinkarikrati brihati vayodha uchchairghoshabhyeti ya vratam
Trin gharmanabhi vavashana mimati mayum payate payobhih

1.9

यामापी॑नामुप॒सीद॒न्त्यापः॑ शाक्व॒रा वृ॑ष॒भा ये स्व॒राजः॑ ।
ते व॑र्षन्ति॒ ते व॑र्षयन्ति त॒द्विदे॒ काम॒मूर्ज॒मापः॑ ॥९॥

Yamapinamupasidantyapah shakvara vrishabha ye svarajah
Te varshanti te varshayanti tadvide kamamurjamapah

1.10

स्त॒न॒यि॒त्नुस्ते॒ वाक् प्र॑जापते॒ वृषा॒ शुष्मं॑ क्षिपसि॒ भूम्या॒मधि॑ ।
अ॒ग्नेर्वाता॑न्मधुक॒शा हि ज॒ज्ञे म॒रुतामु॒ग्रा न॒प्तिः ॥१०॥

Stanayitnuste vak prajapate vrisha shushmam kshipasi bhumyamadhi
Agnervatanmadhukasha hi jagye marutamugra naptih

1.11

यथा॒ सोमः॑ प्रातःसव॒ने अ॒श्विनो॒र्भव॑ति प्रि॒यः ।
ए॒वा मे॑ अश्विना॒ वर्च॑ आ॒त्मनि॑ ध्रियताम् ॥११॥

Yatha somah pratahsavane ashvinorbhavati priyah
Eva me ashvina varcha atmani dhriyatam

1.12

यथा॒ सोमो॑ द्वि॒तीये॒ सव॑न इन्द्रा॒ग्न्योर्भव॑ति प्रि॒यः ।
ए॒वा म॑ इन्द्राग्नी॒ वर्च॑ आ॒त्मनि॑ ध्रियताम् ॥१२॥

Yatha somo dvitiye savana indragnyorbhavati priyah
Eva ma indragni varcha atmani dhriyatam

1.13

यथा॒ सोम॑स्तृ॒तीये॒ सव॑न ऋभू॒णां भव॑ति प्रि॒यः ।
ए॒वा म॑ ऋभवो॒ वर्च॑ आ॒त्मनि॑ ध्रियताम् ॥१३॥

Yatha somastritiye savana ribhunam bhavati priyah
Eva ma ribhavo varcha atmani dhriyatam

1.14

मधु॑ जनिषीय॒ मधु॑ वंसिषीय ।
पय॑स्वानग्न॒ आग॑मं॒ तं मा॒ सं सृ॑ज॒ वर्च॑सा ॥१४॥

Madhu janishiya madhu vansishiya
Payasvanagna agamam tam ma sam srija varchasa

1.15

सं मा॑ग्ने॒ वर्च॑सा सृज॒ सं प्र॒जया॒ समायु॑षा ।
वि॒द्युर्मे॑ अ॒स्य दे॒वा इन्द्रो॑ विद्यात् स॒ह ऋषि॑भिः ॥१५॥

Sam magne varchasa srija sam prajaya samayusha
Vidyurme asya deva indro vidyat saha rishibhih

1.16

यथा॒ मधु॑ मधु॒कृतः॑ सं॒भर॑न्ति॒ मधा॒वधि॑ ।
ए॒वा मे॑ अश्विना॒ वर्च॑ आ॒त्मनि॑ ध्रियताम् ॥१६॥

Yatha madhu madhukritah sambharanti madhavadhi
Eva me ashvina varcha atmani dhriyatam

1.17

यथा॒ मक्षाः॑ इ॒दं मधु॑ न्य॒ञ्जन्ति॒ मधा॒वधि॑ ।
ए॒वा मे॑ अश्विना॒ वर्च॒स्तेजो॒ बल॒मोज॑श्च ध्रियताम् ॥१७॥

Yatha makshah idam madhu nyanjanti madhavadhi
Eva me ashvina varchastejo balamojashcha dhriyatam

1.18

यद् गि॒रिषु॒ पर्व॑तेषु॒ गोष्वश्वे॑षु॒ यन्मधु॑ ।
सुरा॑यां सि॒च्यमा॑नायां॒ यत् तत्र॒ मधु॒ तन्मयि॑ ॥१८॥

Yad girishu parvateshu goshvashveshu yanmadhu
Surayam sichyamanayam yat tatra madhu tanmayi

1.19

अश्वि॑ना सार॒घेण॑ मा॒ मधु॑नाङ्क्तं शुभस्पती ।
यथा॒ वर्च॑स्वतीं॒ वाच॑मा॒वदा॑नि॒ जनाँ॒ अनु॑ ॥१९॥

Ashvina saraghena ma madhunanktam shubhaspati
Yatha varchasvatim vachamavadani janam anu

1.20

स्त॒न॒यि॒त्नुस्ते॒ वाक् प्र॑जापते॒ वृषा॒ शुष्मं॑ क्षिपसि॒ भूम्यां॑ दि॒वि।
तां प॒शव॒ उप॑ जीवन्ति॒ सर्वे॒ तेनो॒ सेष॒मूर्जं॑ पिपर्ति ॥२०॥

Stanayitnuste vak prajapate vrisha shushmam kshipasi bhumyam divi
Tam pashava upa jivanti sarve teno seshamurjam piparti

1.21

पृ॒थि॒वी द॒ण्डो॒३न्तरि॑क्षं॒ गर्भो॒ द्यौः कशा॑ वि॒द्युत् प्र॑क॒शो हि॑र॒ण्ययो॑ बि॒न्दुः ॥२१॥

Prithivi dando3ntariksham garbho dyauh kasha vidyut prakasho hiranyayo binduh

1.22

यो वै कशा॑याः स॒प्त मधू॑नि॒ वेद॒ मधु॑मान् भवति ।
ब्रा॒ह्म॒णश्च॒ राजा॑ च धे॒नुश्चा॑न॒ड्वांश्च॑ व्री॒हिश्च॒ यव॑श्च॒ मधु॑ सप्त॒मम् ॥२२॥

Yo vai kashayah sapta madhuni veda madhuman bhavati
Brahmanashcha raja cha dhenushchanadvanshcha vrihishcha yavashcha madhu saptamam

1.23

मधु॑मान् भवति॒ मधु॑मदस्याहा॒र्यंऽ भवति ।
मधु॑मतो लो॒कान् ज॑यति॒ य ए॒वं वेद॑ ॥२३॥

Madhuman bhavati madhumadasyaharyan bhavati
Madhumato lokan jayati ya evam veda

1.24

यद् वी॒ध्रे स्त॒नय॑ति प्र॒जाप॑तिरे॒व तत् प्र॒जाभ्यः॑ प्रा॒दुर्भ॑वति ।
तस्मा॑त् प्राचीनोपवी॒तस्ति॑ष्ठे॒ प्रजा॑प॒तेऽनु॑ मा बुध्य॒स्वेति॑ ।
अन्वे॑नं प्र॒जा अनु॑ प्र॒जाप॑तिर्बुध्यते॒ य ए॒वं वेद॑ ॥२४॥

Yad vidhre stanayati prajapatireva tat prajabhyah pradurbhavati
Tasmat prachinopavitastishthe prajapatenu ma budhyasveti
Anvenam praja anu prajapatirbudhyate ya evam veda