Sukta 80

80.1

Purnima, 1-4 atharva, paurnamasi, 3 prajapatih, trishtup, 2 anushtup

पू॒र्णा प॒श्चादु॒त पू॒र्णा पु॒रस्ता॒दुन्म॑ध्य॒तः पौ॑र्णमा॒सी जि॑गाय ।
तस्यां॑ दे॒वैः सं॒वस॑न्तो महि॒त्वा नाक॑स्य पृ॒ष्ठे समि॒षा म॑देम ॥१॥

Purna pashchaduta purna purastadunmadhyatah paurnamasi jigaya
Tasyam devaih sanvasanto mahitva nakasya prishthe samisha madema

80.2

वृ॒ष॒भं वा॒जिनं॑ व॒यं पौ॑र्णमा॒सं य॑जामहे ।
स नो॑ ददा॒त्वक्षि॑तां र॒यिमनु॑पदस्वतीम् ॥२॥

Vrishabham vajinam vayam paurnamasam yajamahe
Sa no dadatvakshitam rayimanupadasvatim

80.3

प्रजा॑पते॒ न त्वदे॒तान्य॒न्यो विश्वा॑ रू॒पाणि॑ परि॒भूर्ज॑जान ।
यत् का॑मास्ते जुहु॒मस्तन्नो॑ अस्तु व॒यं स्या॑म॒ पत॑यो रयी॒णाम् ॥३॥

Prajapate na tvadetanyanyo vishva rupani paribhurjajana
Yat kamaste juhumastanno astu vayam syama patayo rayinam

80.4

पौ॒र्ण॒मा॒सी प्र॑थ॒मा य॒ज्ञिया॑सी॒दह्नां॒ रात्री॑णामतिशर्व॒रेषु॑ ।
ये त्वां य॒ज्ञैर्य॑ज्ञिये अ॒र्धय॑न्त्य॒मी ते नाके॑ सु॒कृतः॒ प्रवि॑ष्टाः ॥४॥

Paurnamasi prathama yagyiyasidahnam ratrinamatisharvareshu
Ye tvam yagyairyagyiye ardhayantyami te nake sukritah pravishtah