Sukta 70

70.1

Shatrudamanam, 1-5 atharva, shyenah, devah, 1 trishtup, 2 atijagatigarbha jagati, 3-5 anushtup (3 purahkakummati)

यत् किं चा॒सौ मन॑सा॒ यच्च॑ वा॒चा य॒ज्ञैर्जु॒होति॑ ह॒विषा॒ यजु॑षा ।
तन्मृ॒त्युना॒ निरृ॑तिः संविदा॒ना पु॒रा स॒त्यादाहु॑तिं हन्त्वस्य ॥१॥

Yat kim chasau manasa yachcha vacha yagyairjuhoti havisha yajusha
Tanmrityuna nirritih sanvidana pura satyadahutim hantvasya

70.2

या॒तु॒धाना॒ निरृ॑ति॒रादु॒ रक्ष॒स्ते अ॑स्य घ्न॒न्त्वनृ॑तेन स॒त्यम्।
इन्द्रे॑षिता दे॒वा आज्य॑मस्य मथ्नन्तु॒ मा तत् सं पा॑दि॒ यद॒सौ जु॒होति॑ ॥२॥

Yatudhana nirritiradu rakshaste asya ghnantvanritena satyam
Indreshita deva ajyamasya mathnantu ma tat sam padi yadasau juhoti

70.3

अ॒जि॒रा॒धि॒रा॒जौ श्ये॒नौ सं॑पा॒तिना॑विव ।
आज्यं॑ पृतन्य॒तो ह॑तां॒ यो नः॒ कश्चा॑भ्यघा॒यति॑ ॥३॥

Ajiradhirajau shyenau sampatinaviva
Ajyam pritanyato hatam yo nah kashchabhyaghayati

70.4

अपा॑ञ्चौ त उ॒भौ बा॒हू अपि॑ नह्याम्या॒स्यऽम्।
अ॒ग्नेर्दे॒वस्य॑ म॒न्युना॒ तेन॑ तेऽवधिषं ह॒विः ॥४॥

Apanchau ta ubhau bahu api nahyamyasyam
Agnerdevasya manyuna tena tevadhisham havih

70.5

अपि॑ नह्यामि ते बा॒हू अपि॑ नह्याम्या॒स्यऽम्।
अ॒ग्नेर्घो॒रस्य॑ म॒न्युना॒ तेन॑ तेऽवधिषं ह॒विः ॥५॥

Api nahyami te bahu api nahyamyasyam
Agnerghorasya manyuna tena tevadhisham havih