Sukta 60

60.1

Ramyam griham, 1-7 brahma, grihah, vastoshpatih, anushtup, 1 paranushtup trishtup

ऊर्जं॒ बिभ्र॑द् वसु॒वनिः॑ सुमे॒धा अघो॑रेण॒ चक्षु॑षा मि॒त्रिये॑ण ।
गृ॒हानैमि॑ सु॒मना॒ वन्द॑मानो॒ रम॑ध्वं॒ मा बि॑भीत॒ मत् ॥१॥

Urjam bibhrad vasuvanih sumedha aghorena chakshusha mitriyena
Grihanaimi sumana vandamano ramadhvam ma bibhita mat

इ॒मे गृ॒हा म॑यो॒भुव॒ ऊर्ज॑स्वन्तः॒ पय॑स्वन्तः ।
पू॒र्णा वा॒मेन॒ तिष्ठ॑न्त॒स्ते नो॑ जानन्त्वाय॒तः ॥२॥

Ime griha mayobhuva urjasvantah payasvantah
Purna vamena tishthantaste no janantvayatah

येषा॑म॒ध्येति॑ प्र॒वस॒न् येषु॑ सौमन॒सो ब॒हुः ।
गृ॒हानुप॑ ह्वयामहे॒ ते नो॑ जानन्त्वाय॒तः ॥३॥

Yeshamadhyeti pravasan yeshu saumanaso bahuh
Grihanupa hvayamahe te no janantvayatah

उप॑हूता॒ भूरि॑धनाः॒ सखा॑यः स्वा॒दुसं॑मुदः ।
अ॒क्षु॒ध्या अ॑तृ॒ष्या स्त॒ गृहा॒ मास्मद् बि॑भीतन ॥४॥

Upahuta bhuridhanah sakhayah svadusammudah
Akshudhya atrishya sta griha masmad bibhitana

उप॑हूता इ॒ह गाव॒ उप॑हूता अजा॒वयः॑ ।
अथो॒ अन्न॑स्य की॒लाल॒ उप॑हूतो गृ॒हेषु॑ नः ॥५॥

Upahuta iha gava upahuta ajavayah
Atho annasya kilala upahuto griheshu nah

सू॒नृता॑वन्तः सु॒भगा॒ इरा॑वन्तो हसामु॒दाः ।
अ॒तृ॒ष्या अ॑क्षु॒ध्या स्त॒ गृहा॒ मास्मद् बि॑भीतन ॥६॥

Sunritavantah subhaga iravanto hasamudah
Atrishya akshudhya sta griha masmad bibhitana

इ॒हैव स्त॒ मानु॑ गात॒ विश्वा॑ रू॒पाणि॑ पुष्यत ।
ऐष्या॑मि भ॒द्रेणा॑ स॒ह भूयां॑सो भवता॒ मया॑ ॥७॥

Ihaiva sta manu gata vishva rupani pushyata
Aishyami bhadrena saha bhuyanso bhavata maya