Sukta 53

53.1

Dirghayuh, 1-7 brahma, ayuh, brihaspatih ashvinau cha, 1-2 trishtup, 3 bhurik, 4 ushniggarbharshi panktih, 5-7 anushtup

अ॒मु॒त्र॒भूया॒दधि॒ यद् य॒मस्य॒ बृह॑स्पतेर॒भिश॑स्तेर॑मुञ्चः ।
प्रत्यौ॑हताम॒श्विना॑ मृ॒त्युम॒स्मद् दे॒वाना॑मग्ने भि॒षजा॒ शची॑भिः ॥१॥

Amutrabhuyadadhi yad yamasya brihaspaterabhishasteramunchah
Pratyauhatamashvina mrityumasmad devanamagne bhishaja shachibhih

53.2

सं क्रा॑मतं॒ मा ज॑हीतं॒ शरी॑रं प्राणापा॒नौ ते॑ स॒युजा॑वि॒ह स्ता॑म्।
श॒तं जी॑व श॒रदो॒ वर्ध॑मानो॒ऽग्निष्टे॑ गो॒पा अ॑धि॒पा वसि॑ष्ठः ॥२॥

Sam kramatam ma jahitam shariram pranapanau te sayujaviha stam
Shatam jiva sharado vardhamanognishte gopa adhipa vasishthah

53.3

आयु॒र्यत् ते॒ अति॑हितं परा॒चैर॑पा॒नः प्रा॒णः पुन॒रा तावि॑ताम्।
अ॒ग्निष्टदाहा॒र्निरृ॑तेरु॒पस्था॒त् तदा॒त्मनि॒ पुन॒रा वे॑शयामि ते ॥३॥

Ayuryat te atihitam parachairapanah pranah punara tavitam
Agnishtadaharnirriterupasthat tadatmani punara veshayami te

53.4

मेमं प्रा॒णो हा॑सी॒न्मो अ॑पा॒नोऽव॒हाय॒ परा॑ गात्।
स॒प्त॒र्षिभ्य॑ एनं॒ परि॑ ददामि॒ त ए॑नं स्व॒स्ति ज॒रसे॑ वहन्तु ॥४॥

Memam prano hasinmo apanovahaya para gat
Saptarshibhya enam pari dadami ta enam svasti jarase vahantu

53.5

प्र वि॑शतं प्राणापानावन॒ड्वाहा॑विव व्र॒जम्।
अ॒यं ज॑रि॒म्णः शे॑व॒धिररि॑ष्ट इ॒ह व॑र्धताम् ॥५॥

Pra vishatam pranapanavanadvahaviva vrajam
Ayam jarimnah shevadhirarishta iha vardhatam

53.6

आ ते॑ प्रा॒णं सु॑वामसि॒ परा॒ यक्ष्मं॑ सुवामि ते ।
आयु॑र्नो वि॒श्वतो॑ दधद॒यम॒ग्निर्वरे॑ण्यः ॥६॥

A te pranam suvamasi para yakshmam suvami te
Ayurno vishvato dadhadayamagnirvarenyah

53.7

उद् व॒यं तम॑स॒स्परि॒ रोह॑न्तो॒ नाक॑मुत्त॒मम्।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ॥७॥

Ud vayam tamasaspari rohanto nakamuttamam
Devam devatra suryamaganma jyotiruttamam