Sukta 139

139.1

Saubhagyavardhanam, 1-5 atharva, vanaspatih, anushtup, 1 tryavasana shat pada virad jagati

न्य॒स्ति॒का रु॑रोहिथ सुभगं॒कर॑णी॒ मम॑ ।
श॒तं तव॑ प्रता॒नास्त्रय॑स्त्रिंशन्निता॒नाः ॥
तया॑ सहस्रप॒र्ण्या हृद॑यं शोषयामि ते ॥१॥

Nyastika rurohitha subhagankarani mama
Shatam tava pratanastrayastrinshannitanah
Taya sahasraparnya hridayam shoshayami te

139.2

शुष्य॑तु॒ मयि॑ ते॒ हृद॑य॒मथो॑ शुष्यत्वा॒स्यऽम्।
अथो॒ नि शु॑ष्य॒ मां कामे॒नाथो॒ शुष्का॑स्या चर ॥२॥

Shushyatu mayi te hridayamatho shushyatvasyam
Atho ni shushya mam kamenatho shushkasya chara

139.3

सं॒वन॑नी समुष्प॒ला बभ्रु॒ कल्या॑णि॒ सं नु॑द ।
अमूं च॒ मां च॒ सं नु॑द समा॒नं हृद॑यं कृधि ॥३॥

Sanvanani samushpala babhru kalyani sam nuda
Amum cha mam cha sam nuda samanam hridayam kridhi

139.4

यथो॑द॒कमप॑पुषोऽप॒शुष्य॑त्या॒स्यऽम्।
ए॒वा नि शु॑ष्य॒ मां कामे॒नाथो॒ शुष्का॑स्या चर ॥४॥

Yathodakamapapushopashushyatyasyam
Eva ni shushya mam kamenatho shushkasya chara

139.5

यथा॑ नकु॒लो वि॒च्छिद्य॑ सं॒दधा॒त्यहिं॒ पुनः॑ ।
ए॒वा काम॑स्य॒ विच्छि॑न्नं॒ सं धे॑हि वीर्यावति ॥५॥

Yatha nakulo vichchhidya sandadhatyahim punah
Eva kamasya vichchhinnam sam dhehi viryavati