Sukta 4

4.1

Kushthatakmanashanam, 1-10 bhrigvangirah, kushtho, yakshmanashanam, anushtap, 5 bhurik, 6 gayatri, 10 ushniggarbha nichrit

यो गि॒रिष्वजा॑यथा वी॒रुधां॒ बल॑वत्तमः ।
कुष्ठेहि॑ तक्मनाशन त॒क्मानं॑ ना॒शय॑न्नि॒तः ॥१॥

Yo girishvajayatha virudham balavattamah
Kushthehi takmanashana takmanam nashayannitah

4.2

सु॒प॒र्ण॒सुव॑ने गि॒रौ जा॒तं हि॒मव॑त॒स्परि॑ ।
धनै॑र॒भि श्रु॒त्वा य॑न्ति वि॒दुर्हि त॑क्म॒नाश॑नम् ॥२॥

Suparnasuvane girau jatam himavataspari
Dhanairabhi shrutva yanti vidurhi takmanashanam

4.3

अ॒श्व॒त्थो दे॑व॒सद॑नस्तृ॒तीय॑स्यामि॒तो दि॒वि।
तत्रा॒मृत॑स्य चक्ष॑णं दे॒वाः कुष्ठ॑मवन्वत ॥३॥

Ashvattho devasadanastritiyasyamito divi
Tatramritasya chakshanam devah kushthamavanvata

4.4

हि॒र॒ण्ययी॒ नौर॑चर॒द्धिर॑ण्यबन्धना दि॒वि।
तत्रा॒मृत॑स्य॒ पुष्पं॑ दे॒वाः कुष्ठ॑मवन्वत ॥४॥

Hiranyayi nauracharaddhiranyabandhana divi
Tatramritasya pushpam devah kushthamavanvata

4.5

हि॒र॒ण्ययाः॒ पन्था॑न आस॒न्नरि॑त्राणि हिर॒ण्यया॑ ।
नावो॑ हिर॒ण्ययी॑रास॒न् याभिः॒ कुष्ठं॑ नि॒राव॑हन् ॥५॥

Hiranyayah panthana asannaritrani hiranyaya
Navo hiranyayirasan yabhih kushtham niravahan

4.6

इ॒मं मे॑ कुष्ठ॒ पूरु॑षं॒ तमा व॑ह॒ तं निष्कु॑रु ।
तमु॑ मे अग॒दं कृ॑धि ॥६॥

Imam me kushtha purusham tama vaha tam nishkuru
Tamu me agadam kridhi

4.7

दे॒वेभ्यो॒ अधि॑ जा॒तोऽसि॒ सोम॑स्यासि॒ सखा॑ हि॒तः ।
स प्रा॒णाय॑ व्या॒नाय॒ च॑क्षुषे मे अ॒स्मै मृ॑ड ॥७॥

Devebhyo adhi jatosi somasyasi sakha hitah
Sa pranaya vyanaya chakshushe me asmai mrida

4.8

उद॑ङ् जा॒तो हि॒मव॑तः॒ स प्रा॒च्यां नी॑यसे॒ जन॑म्।
तत्र॑ कुष्ठ॑स्य॒ नामा॑न्युत्त॒मानि॒ वि भे॑जिरे ॥८॥

Udang jato himavatah sa prachyam niyase janam
Tatra kushthasya namanyuttamani vi bhejire

4.9

उ॒त्त॒मो नाम॑ कुष्ठस्युत्त॒मो नाम॑ ते पि॒ता।
यक्ष्मं॑ च॒ सर्वं॑ ना॒शय॑ त॒क्मानं॑ चार॒सं कृ॑धि ॥९॥

Uttamo nama kushthasyuttamo nama te pita
Yakshmam cha sarvam nashaya takmanam charasam kridhi

4.10

शी॒र्षा॒म॒यमु॑पह॒त्याम॒क्ष्योस्त॒न्वो॒३रपः॑ ।
कुष्ठ॒स्तत् सर्वं॒ निष्क॑र॒द् दैवं॑ समह॒ वृष्ण्य॑म् ॥१०॥

Shirshamayamupahatyamakshyostanvo3rapah
Kushthastat sarvam nishkarad daivam samaha vrishnyam