Sukta 25

25.1

Garbhadhanam, 1-13 brahma, yonigarbhah, prithivyadayo devatah, anushtup, 13 virat-purastadbrihati

पर्व॑ताद् दि॒वो योने॒रङ्गा॑दङ्गात् स॒माभृ॑तम्।
शेपो॒ गर्भ॑स्य रेतो॒धाः सरौ॑ प॒र्णमि॒वा द॑धत् ॥१॥

Parvatad divo yonerangadangat samabhritam
Shepo garbhasya retodhah sarau parnamiva dadhat

यथे॒यं पृ॑थि॒वी म॒ही भू॒तानां॒ गर्भ॑माद॒धे।
ए॒वा द॑धामि ते॒ गर्भं॒ तस्मै॒ त्वामव॑से हुवे ॥२॥

Yatheyam prithivi mahi bhutanam garbhamadadhe
Eva dadhami te garbham tasmai tvamavase huve

गर्भं॑ धेहि सिनीवालि॒ गर्भं॒ धेहि सरस्वति ।
गर्भं॑ ते अ॒श्विनो॒भा ध॑त्तां॒ पुष्क॑रस्रजा ॥३॥

Garbham dhehi sinivali garbham dhehi sarasvati
Garbham te ashvinobha dhattam pushkarasraja

गर्भं॑ ते मि॒त्रावरु॑णौ॒ गर्भं॑ दे॒वो बृह॒स्पतिः॑ ।
गर्भं॑ त॒ इन्द्र॑श्चा॒ग्निश्च॒ गर्भं॑ धा॒ता द॑धातु ते ॥४॥

Garbham te mitravarunau garbham devo brihaspatih
Garbham ta indrashchagnishcha garbham dhata dadhatu te

विष्णु॒र्योनिं॑ कल्पयतु॒ त्वष्टा॑ रू॒पाणि॑ पिंशतु ।
आ सि॑ञ्चतु प्र॒जाप॑तिर्धा॒ता गर्भं॑ दधातु ते ॥५॥

Vishnuryonim kalpayatu tvashta rupani pinshatu
A sinchatu prajapatirdhata garbham dadhatu te

यद् वेद॒ राजा॒ वरु॑णो॒ यद् वा॑ दे॒वी सर॑स्वती ।
यदिन्द्रो॑ वृत्र॒हा वेद॒ तद् ग॑र्भ॒कर॑णं पिब ॥६॥

Yad veda raja varuno yad va devi sarasvati
Yadindro vritraha veda tad garbhakaranam piba

गर्भो॑ अ॒स्योष॑धीनां॒ गर्भो॒ वन॒स्पती॑नाम्।
गर्भो॒ विश्व॑स्य भू॒तस्य॒ सो अ॑ग्ने॒ गर्भ॒मेह धाः॑ ॥७॥

Garbho asyoshadhinam garbho vanaspatinam
Garbho vishvasya bhutasya so agne garbhameha dhah

अधि॑ स्कन्द वी॒रय॑स्व॒ गर्भ॒मा धे॑हि॒ योन्या॑म्।
वृषा॑सि वृष्ण्यावन् प्र॒जायै॒ त्वा न॑यामसि ॥८॥

Adhi skanda virayasva garbhama dhehi yonyam
Vrishasi vrishnyavan prajayai tva nayamasi

वि जि॑हीष्व बार्हत्सामे॒ गर्भ॑स्ते॒ योनि॒मा श॑याम्।
अदु॑ष्टे दे॒वाः पु॒त्रं सो॑म॒पा उ॑भया॒विन॑म् ॥९॥

Vi jihishva barhatsame garbhaste yonima shayam
Adushte devah putram somapa ubhayavinam

धातः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१०॥

Dhatah shreshthena rupenasya narya gavinyoh
Pumansam putrama dhehi dashame masi sutave

त्वष्टः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥११॥

Tvashtah shreshthena rupenasya narya gavinyoh
Pumansam putrama dhehi dashame masi sutave

सवि॑तः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१२॥

Savitah shreshthena rupenasya narya gavinyoh
Pumansam putrama dhehi dashame masi sutave

प्रजा॑पते॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१३॥

Prajapate shreshthena rupenasya narya gavinyoh
Pumansam putrama dhehi dashame masi sutave