Sukta 3

3.1

Shatrunashanam 1-7 atharva, rudrah, vyaghrah, anushtup, 1 pathyapanktih, 3 gayatri, 7 kakummatigarbhoparishtad brihati

उदि॒तस्त्रयो॑ अक्रमन् व्या॒घ्रः पुरु॑षो॒ वृकः॑ ।
हिरु॒ग्घि यन्ति॒ सिन्ध॑वो॒ हिरु॑ग् दे॒वो वन॒स्पति॒र्हिरु॑ङ्नमन्तु॒ शत्र॑वः ॥१॥

Uditastrayo akraman vyaghrah purusho vrikah
Hirugghi yanti sindhavo hirug devo vanaspatirhirunnamantu shatravah

3.2

परे॑णैतु प॒था वृकः॑ पर॒मेणो॒त तस्क॑रः ।
परे॑ण द॒त्वती॒ रज्जुः॒ परे॑णाघा॒युर॑र्षतु ॥२॥

Parenaitu patha vrikah paramenota taskarah
Parena datvati rajjuh parenaghayurarshatu

3.3

अ॒क्ष्यौऽच ते॒ मुखं॑ च ते व्याघ्र जम्भयामसि ।
आत् सर्वा॑न् विंश॒तिं न॒खान् ॥३॥

Akshyaucha te mukham cha te vyaghra jambhayamasi
At sarvan vinshatim nakhan

3.4

व्या॒घ्रं द॒त्वतां॑ व॒यं प्र॑थ॒मं ज॑म्भयामसि ।
आदु॑ ष्टे॒नमथो॒ अहिं॑ यातु॒धान॒मथो॒ वृक॑म् ॥४॥

Vyaghram datvatam vayam prathamam jambhayamasi
Adu shtenamatho ahim yatudhanamatho vrikam

3.5

यो अ॒द्य स्ते॒न आय॑ति॒ स संपि॑ष्टो॒ अपा॑यति ।
प॒थाम॑पध्वं॒सेनै॒त्विन्द्रो॒ वज्रे॑ण हन्तु॒ तम् ॥५॥

Yo adya stena ayati sa sampishto apayati
Pathamapadhvansenaitvindro vajrena hantu tam

3.6

मू॒र्णा मृ॒गस्य॒ दन्ता॒ अपि॑शीर्णा उ पृ॒ष्टयः॑ ।
नि॒म्रुक्ते॑ गो॒धा भ॑वतु नी॒चाय॑च्छश॒युर्मृ॒गः ॥६॥

Murna mrigasya danta apishirna u prishtayah
Nimrukte godha bhavatu nichayachchhashayurmrigah

3.7

यत् सं॒यमो॒ न वि य॑मो॒ वि य॑मो॒ यन्न सं॒यमः॑ ।
इ॒न्द्र॒जाः सो॑म॒जा आ॑थर्व॒णम॑सि व्याघ्र॒जम्भ॑नम् ॥७॥

Yat sanyamo na vi yamo vi yamo yanna sanyamah
Indrajah somaja atharvanamasi vyaghrajambhanam