Sukta 10

10.1

Shankhamanih, 1-7 atharva, shankhamanih, krishanah, anushtup, 6 pathyapanktih, 7 panchapada paranushtupshakvari

वाता॑ज्जा॒तो अ॒न्तरि॑क्षाद् वि॒द्युतो॒ ज्योति॑ष॒स्परि ।
स नो॑ हिरण्य॒जाः श॒ङ्खः कृश॑नः पा॒त्वंह॑सः ॥१॥

Vatajjato antarikshad vidyuto jyotishaspari
Sa no hiranyajah shankhah krishanah patvanhasah

10.2

यो अ॑ग्र॒तो रो॑च॒नानां॑ समु॒द्रादधि॑ जज्ञि॒षे।
श॒ङ्खेन॑ ह॒त्वा रक्षां॑स्य॒त्त्रिणो॒ वि ष॑हामहे ॥२॥

Yo agrato rochananam samudradadhi jagyishe
Shankhena hatva rakshansyattrino vi shahamahe

10.3

श॒ङ्खेनामी॑वा॒मम॑तिं श॒ङ्खेनो॒त सदान्वाः॑ ।
श॒ङ्खो नो॑ वि॒श्वभे॑षजः॒ कृश॑नः पा॒त्वंह॑सः ॥३॥

Shankhenamivamamatim shankhenota sadanvah
Shankho no vishvabheshajah krishanah patvanhasah

10.4

दि॒वि जा॒तः स॑मुद्र॒जः सि॑न्धु॒तस्पर्याभृ॑तः ।
स नो॑ हिरण्य॒जाः श॒ङ्ख आ॑युष्प्र॒तर॑णो म॒णिः ॥४॥

Divi jatah samudrajah sindhutasparyabhritah
Sa no hiranyajah shankha ayushpratarano manih

10.5

स॒मु॒द्राज्जा॒तो म॒णिर्वृ॒त्राज्जा॒तो दि॑वाक॒रः ।
सो अ॒स्मान्त्स॒र्वतः॑ पातु हे॒त्या दे॑वासु॒रेभ्यः॑ ॥५॥

Samudrajjato manirvritrajjato divakarah
So asmantsarvatah patu hetya devasurebhyah

10.6

हिर॑ण्याना॒मेको॑ऽसि॒ सोमा॒त् त्वमधि॑ जज्ञिषे ।
रथे॒ त्वम॑सि दर्श॒त॑ इ॑षु॒धौ रो॑च॒नस्त्वं प्र ण॒ आयूं॑षि तारिषत् ॥६॥

Hiranyanamekosi somat tvamadhi jagyishe
Rathe tvamasi darshata ishudhau rochanastvam pra na ayunshi tarishat

10.7

दे॒वाना॒मस्थि॒ कृश॑नं बभूव॒ तदा॑त्म॒न्वच्च॑रत्य॒प्स्व॑१न्तः ।
तत् ते॑ बध्ना॒म्यायु॑षे॒ वर्च॑से॒ बला॑य दीर्घायु॒त्वाय॑ श॒तशा॑रदाय कार्श॒नस्त्वा॒भि र॑क्षतु ॥७॥

Devanamasthi krishanam babhuva tadatmanvachcharatyapsva1ntah
Tat te badhnamyayushe varchase balaya dirghayutvaya shatasharadaya karshanastvabhi rakshatu