Sukta 4

4.1

Prajabhi ragyah sanvaranam, 1-7 atharva, indrah, 2 pancha pradishah, 4 ashvinau, mitravarunau, vishve devah, marutah, 5 dyavaprithivi, trishtup, 1 jagati, 4-5 bhurik

आ त्वा॑ गन् रा॒ष्ट्रं स॒ह वर्च॒सोदि॑हि प्रा॑ङ्वि वि॒शां पति॑रेक॒राट् त्वं वि रा॑ज ।
सर्वा॑स्त्वा राजन् प्र॒दिशो॑ ह्वयन्तूप॒सद्यो॑ नम॒स्योऽ भवे॒ह ॥१॥

A tva gan rashtram saha varchasodihi pranvi visham patirekarat tvam vi raja
Sarvastva rajan pradisho hvayantupasadyo namasyo bhaveha

4.2

त्वां विशो॑ वृणतां रा॒ज्याऽय॒ त्वामि॒माः प्र॒दिशः॒ पञ्च॑ दे॒वीः ।
वर्ष्म॑न् रा॒ष्ट्रस्य॑ क॒कुदि॑ श्रयस्व॒ ततो॑ न उ॒ग्रो वि भ॑जा॒ वसू॑नि ॥२॥

Tvam visho vrinatam rajyaya tvamimah pradishah pancha devih
Varshman rashtrasya kakudi shrayasva tato na ugro vi bhaja vasuni

4.3

अच्छ॑ त्वा यन्तु ह॒विनः॑ सजा॒ता अ॒ग्निर्दू॒तो अ॑जि॒रः सं च॑रातै ।
जा॒याः पु॒त्राः सु॒मन॑सो भवन्तु ब॒हुं ब॒लिं प्रति॑ पश्यासा उ॒ग्रः ॥३॥

Achchha tva yantu havinah sajata agnirduto ajirah sam charatai
Jayah putrah sumanaso bhavantu bahum balim prati pashyasa ugrah

4.4

अ॒श्विना॒ त्वाग्रे॑ मि॒त्रावरु॑णो॒भा विश्वे॑ दे॒वा म॒रुत॑स्त्वा ह्वयन्तु ।
अधा॒ मनो॑ वसु॒देया॑य कृणुष्व॒ ततो॑ न उ॒ग्रो वि भ॑जा॒ वसू॑नि ॥४॥

Ashvina tvagre mitravarunobha vishve deva marutastva hvayantu
Adha mano vasudeyaya krinushva tato na ugro vi bhaja vasuni

4.5

आ प्र द्र॑व पर॒मस्याः॑ परा॒वतः॑ शि॒वे ते॒ द्यावा॑पृथि॒वी उ॒भे स्ता॑म्।
तद॒यं राजा॒ वरु॑ण॒स्तथा॑ह॒ स त्वा॒यम॑ह्व॒त् स उपे॒दमेहि॑ ॥५॥

A pra drava paramasyah paravatah shive te dyavaprithivi ubhe stam
Tadayam raja varunastathaha sa tvayamahvat sa upedamehi

4.6

इन्द्रे॑न्द्र मनु॒ष्याः॒३ परे॑हि॒ सं ह्यज्ञा॑स्था॒ वरु॑णैः संविदा॒नः ।
स त्वा॒यम॑ह्व॒त् स्वे स॒धस्थे॒ स दे॒वान् य॑क्ष॒त् स उ॑ कल्पया॒द् विशः॑ ॥६॥

Indrendra manushyah3 parehi sam hyagyastha varunaih sanvidanah
Sa tvayamahvat sve sadhasthe sa devan yakshat sa u kalpayad vishah

4.7

प॒थ्याऽ रे॒वती॑र्बहु॒धा विरू॑पाः॒ सर्वाः॑ सं॒गत्य॒ वरी॑यस्ते अक्रन्।
तास्त्वा॒ सर्वाः॑ संविदा॒ना ह्व॑यन्तु दश॒मीमु॒ग्रः सु॒मना॑ वशे॒ह ॥७॥

Pathya revatirbahudha virupah sarvah sangatya variyaste akran
Tastva sarvah sanvidana hvayantu dashamimugrah sumana vasheha