UtshovSukta 96
96.1
ती॒व्रस्या॒भिव॑यसो अ॒स्य पा॑हि सर्वर॒था वि हरी॑ इ॒ह मु॑ञ्च ।
इन्द्र॒ मा त्वा॒ यज॑मानासो अ॒न्ये नि री॑रम॒न् तुभ्य॑मि॒मे सु॒तासः॑ ॥१॥
Tivrasyabhivayaso asya pahi sarvaratha vi hari iha muncha
Indra ma tva yajamanaso anye ni riraman tubhyamime sutasah
96.2
तुभ्यं॑ सु॒तास्तुभ्य॑मु॒ सोत्वा॑स॒स्त्वां गिरः॒ श्वात्र्या॒ आ ह्व॑यन्ति ।
इन्द्रे॒दम॒द्य सव॑नं जुषा॒णो विश्व॑स्य वि॒द्वां इ॒ह पा॑हि॒ सोम॑म् ॥२॥
Tubhyam sutastubhyamu sotvasastvam girah shvatrya a hvayanti
Indredamadya savanam jushano vishvasya vidvam iha pahi somam
96.3
य उ॑श॒ता मन॑सा॒ सोम॑मस्मै सर्वहृ॒दा दे॒वका॑मः सु॒नोति॑ ।
न गा इन्द्र॒स्तस्य॒ परा॑ ददाति प्रश॒स्तमिच्चारु॑मस्मै कृणोति ॥३॥
Ya ushata manasa somamasmai sarvahrida devakamah sunoti
Na ga indrastasya para dadati prashastamichcharumasmai krinoti
96.4
अनु॑स्पष्टो भवत्ये॒षो अ॑स्य॒ यो अ॑स्मै रे॒वान् न सु॒नोति॒ सोम॑म्।
निर॑र॒त्नौ म॒घवा॒ तं द॑धाति ब्रह्म॒द्विषो॑ ह॒न्त्यना॑नुदिष्टः ॥४॥
Anuspashto bhavatyesho asya yo asmai revan na sunoti somam
Niraratnau maghava tam dadhati brahmadvisho hantyananudishtah
96.5
अ॒श्वा॒यन्तो॑ ग॒व्यन्तो॑ वा॒जय॑न्तो॒ हवा॑महे॒ त्वोप॑गन्त॒वा उ॑ ।
आ॒भूष॑न्तस्ते सुम॒तौ नवा॑यां व॒यमि॑न्द्र त्वा शु॒नं हु॑वेम ॥५॥
Ashvayanto gavyanto vajayanto havamahe tvopagantava u
Abhushantaste sumatau navayam vayamindra tva shunam huvema
96.6
मु॒ञ्चामि॑ त्वा ह॒विषा॒ जीव॑नाय॒ कम॑ज्ञातय॒क्ष्मादु॒त रा॑जय॒क्ष्मात्।
ग्राहि॑र्ज॒ग्राह॒ यद्ये॒तदे॑नं तस्या॑ इन्द्राग्नी॒ प्र मु॑मुक्तमेनम् ॥६॥
Munchami tva havisha jivanaya kamagyatayakshmaduta rajayakshmat
Grahirjagraha yadyetadenam tasya indragni pra mumuktamenam
96.7
यदि॑ क्षि॒तायु॒र्यदि॑ वा॒ परे॑तो॒ यदि॑ मृ॒त्योर॑न्ति॒कं नीऽत ए॒व।
तमा ह॑रामि॒ निरृ॑तेरु॒पस्था॒दस्पा॑र्शमेनं श॒तशा॑रदाय ॥७॥
Yadi kshitayuryadi va pareto yadi mrityorantikam nita eva
Tama harami nirriterupasthadasparshamenam shatasharadaya
96.8
स॒ह॒स्रा॒क्षेण॑ श॒तवी॑र्येण श॒तायु॑षा ह॒विषाहा॑र्षमेनम्।
इन्द्रो॒ यथै॑नं श॒रदो॒ नया॒त्यति॒ विश्व॑स्य दुरि॒तस्य॑ पा॒रम् ॥८॥
Sahasrakshena shataviryena shatayusha havishaharshamenam
Indro yathainam sharado nayatyati vishvasya duritasya param
96.9
श॒तं जी॑व श॒रदो॒ वर्ध॑मानः श॒तं हे॑म॒न्तान्छ॒तमु॑ वस॒न्तान्।
श॒तं त॒ इन्द्रो॑ अ॒ग्निः स॑वि॒ता बृह॒स्पतिः॑ श॒तायु॑षा ह॒विषाहा॑र्षमेनम् ॥९॥
Shatam jiva sharado vardhamanah shatam hemantanchhatamu vasantan
Shatam ta indro agnih savita brihaspatih shatayusha havishaharshamenam
96.10
आहा॑र्ष॒मवि॑दं त्वा॒ पुन॒रागाः॒ पुन॑र्णवः ।
सर्वा॑ङ्ग॒ सर्वं॑ ते॒ चक्षुः॒ सर्व॒मायु॑श्च तेऽविदम् ॥१०॥
Aharshamavidam tva punaragah punarnavah
Sarvanga sarvam te chakshuh sarvamayushcha tevidam
96.11
ब्रह्म॑णा॒ग्निः स॑म्विदा॒नो र॑क्षो॒हा बा॑धतामि॒तः ।
अमी॑वा॒ यस्ते॒ गर्भं॑ दु॒र्णामा॒ योनि॑मा॒शये॑ ॥११॥
Brahmanagnih samvidano rakshoha badhatamitah
Amiva yaste garbham durnama yonimashaye
96.12
यस्ते॒ गर्भ॒ममी॑वा दु॒र्णामा॒ योनि॑मा॒शये॑ ।
अ॒ग्निष्टं ब्रह्म॑णा स॒ह निष्क्र॒व्याद॑मनीनशत् ॥१२॥
Yaste garbhamamiva durnama yonimashaye
Agnishtam brahmana saha nishkravyadamaninashat
96.13
यस्ते॒ हन्ति॑ प॒तय॑न्तं निष॒त्स्नुं यः स॑रीसृ॒पम्।
जा॒तं यस्ते॒ जिघां॑सति॒ तमि॒तो ना॑शयामसि ॥१३॥
Yaste hanti patayantam nishatsnum yah sarisripam
Jatam yaste jighansati tamito nashayamasi
96.14
यस्त॑ ऊ॒रू वि॒हर॑त्यन्त॒रा दम्प॑ती॒ शये॑ ।
योनिं॒ यो अ॒न्तरा॒रेल्हि॒ तमि॒तो ना॑शयामसि ॥१४॥
Yasta uru viharatyantara dampati shaye
Yonim yo antararelhi tamito nashayamasi
96.15
यस्त्वा॒ भ्राता॒ पति॑र्भू॒त्वा जा॒रो भू॒त्वा नि॒पद्य॑ते ।
प्र॒जां यस्ते॒ जिघां॑सति॒ तमि॒तो ना॑शयामसि ॥१५॥
Yastva bhrata patirbhutva jaro bhutva nipadyate
Prajam yaste jighansati tamito nashayamasi
96.16
यस्त्वा॒ स्वप्ने॑न॒ तम॑सा मोहयि॒त्वा नि॒पद्य॑ते ।
प्र॒जां यस्ते॒ जिघां॑सति॒ तमि॒तो ना॑शयामसि ॥१६॥
Yastva svapnena tamasa mohayitva nipadyate
Prajam yaste jighansati tamito nashayamasi
96.17
अ॒क्षीभ्यां॑ ते॒ नासि॑काभ्यां॒ कर्णा॑भ्यां॒ छुबु॑का॒दधि॑ ।
यक्ष्मं॑ शीर्ष॒ण्यं म॒स्तिष्का॑ज्जि॒ह्वाया॒ वि वृ॑हामि ते ॥१७॥
Akshibhyam te nasikabhyam karnabhyam chhubukadadhi
Yakshmam shirshanyam mastishkajjihvaya vi vrihami te
96.18
ग्री॒वाभ्य॑स्त उ॒ष्णिहा॑भ्यः॒ कीक॑साभ्यो अनू॒क्याऽत्।
यक्ष्मं॑ दोष॒ण्य॑१मंसा॑भ्यां बा॒हुभ्यां॒ वि वृ॑हामि ते ॥१८॥
Grivabhyasta ushnihabhyah kikasabhyo anukyat
Yakshmam doshanya1mansabhyam bahubhyam vi vrihami te
96.19
हृद॑यात् ते॒ परि॑ क्लो॒म्नो हली॑क्ष्णात् पा॒र्श्वाभ्या॑म्।
यक्ष्मं॒ मत॑स्नाभ्यां प्ली॒ह्नो य॒क्नस्ते॒ वि वृ॑हामसि ॥१९॥
Hridayat te pari klomno halikshnat parshvabhyam
Yakshmam matasnabhyam plihno yaknaste vi vrihamasi
96.20
आ॒न्त्रेभ्य॑स्ते॒ गुदा॑भ्यो वनि॒ष्ठोरु॒दरा॒दधि॑ ।
यक्ष्मं॑ कु॒क्षिभ्यां॑ प्ला॒शेर्नाभ्या॒ वि वृ॑हामि ते ॥२०॥
Antrebhyaste gudabhyo vanishthorudaradadhi
Yakshmam kukshibhyam plashernabhya vi vrihami te
96.21
ऊ॒रुभ्यां॑ ते अष्ठी॒वद्भ्यां॒ पार्ष्णिभ्यां॒ प्रप॑दाभ्याम्।
यक्ष्मं॑ भस॒द्यं॑१ श्रोणि॑भ्यां॒ भास॑दं॒ भंस॑सो॒ वि वृ॑हामि ते ॥२१॥
Urubhyam te ashthivadbhyam parshnibhyam prapadabhyam
Yakshmam bhasadyan1 shronibhyam bhasadam bhansaso vi vrihami te
96.22
अ॒स्थिभ्य॑स्ते म॒ज्जभ्यः॒ स्नाव॑भ्यो ध॒मनि॑भ्यः
यक्ष्मं॑ पा॒णिभ्या॑म॒ङ्गुलि॑भ्यो न॒खेभ्यो॒ वि वृ॑हामि ते ॥२२॥
Asthibhyaste majjabhyah snavabhyo dhamanibhyah
Yakshmam panibhyamangulibhyo nakhebhyo vi vrihami te
96.23
अङ्गे॑अङ्गे॒ लोम्नि॑लोम्नि॒ यस्ते॒ पर्व॑णिपर्वणि ।
यक्षं॑ त्वच॒स्यं ते व॒यं क॒श्यप॑स्य वीब॒र्हेण॒ विष्व॑ञ्चं॒ वि वृ॑हामसि ॥२३॥
Angeange lomnilomni yaste parvaniparvani
Yaksham tvachasyam te vayam kashyapasya vibarhena vishvancham vi vrihamasi
96.24
अपे॑हि मनसस्प॒तेऽप॑ क्राम प॒रश्च॑र ।
प॒रो निरृ॑त्या॒ आ च॑क्ष्व बहु॒धा जीव॑तो॒ मनः॑ ॥२४॥
Apehi manasaspatepa krama parashchara
Paro nirritya a chakshva bahudha jivato manah