Sukta 125

125.1

अपे॑न्द्र॒ प्रा॑चो मघवन्न॒मित्रा॒नपापा॑चो अभिभूते नुदस्व ।
अपोदी॑चो॒ अप॑ शूराध॒राच॑ उ॒रौ यथा॒ तव॒ शर्म॒न् मदे॑म ॥१॥

Apendra pracho maghavannamitranapapacho abhibhute nudasva
Apodicho apa shuradharacha urau yatha tava sharman madema

कु॒विद॒ङ्ग यव॑मन्तो॒ यवं॑ चि॒द् यथा॒ दान्त्य॑नुपू॒र्वं वि॒यूय॑ ।
इ॒हेहै॑षां कृणुहि॒ भोज॑नानि॒ ये ब॒र्हिषो॒ नमो॑वृक्तिं॒ न ज॒ग्मुः ॥२॥

Kuvidanga yavamanto yavam chid yatha dantyanupurvam viyuya
Ihehaisham krinuhi bhojanani ye barhisho namovriktim na jagmuh

न॒हि स्थूर्यृ॑तु॒था या॒तमस्ति॒ नोत श्रवो॑ विविदे संग॒मेषु॑ ।
ग॒व्यन्त॒ इन्द्रं॑ स॒ख्याय॒ विप्रा॑ अश्वा॒यन्तो॒ वृष॑णं वा॒जय॑न्तः ॥३॥

Nahi sthuryritutha yatamasti nota shravo vivide sangameshu
Gavyanta indram sakhyaya vipra ashvayanto vrishanam vajayantah

यु॒वं सु॒राम॑मश्विना॒ नमु॑चावासु॒रे सचा॑ ।
वि॒पि॒पा॒ना शु॑भस्पती॒ इन्द्रं॒ कर्म॑स्वावतम् ॥४॥

Yuvam suramamashvina namuchavasure sacha
Vipipana shubhaspati indram karmasvavatam

पु॒त्रमि॑व पि॒तरा॑व॒श्विनो॒भेन्द्रा॒वथुः॒ काव्यै॑र्दं॒सना॑भिः ।
यत् सु॒रामं॒ व्यपि॑बः॒ शची॑भिः॒ सर॑स्वती त्वा मघवन्नभिष्णक् ॥५॥

Putramiva pitaravashvinobhendravathuh kavyairdansanabhih
Yat suramam vyapibah shachibhih sarasvati tva maghavannabhishnak

इन्द्रः॑ सु॒त्रामा॒ स्ववाँ॒ अवो॑भिः सुमृडी॒को भ॑वतु वि॒श्ववे॑दाः ।
बाध॑तां॒ द्वेषो॒ अभ॑यं नः कृणोतु सु॒वीर्य॑स्य॒ पत॑यः स्याम ॥६॥

Indrah sutrama svavam avobhih sumridiko bhavatu vishvavedah
Badhatam dvesho abhayam nah krinotu suviryasya patayah syama

स सु॒त्रामा॒ स्ववाँ॒ इन्द्रो॑ अ॒स्मदा॒राच्चि॒द् द्वेषः॑ सनु॒तर्यु॑योतु ।
तस्य॑ व॒यं सु॑म॒तौ य॒ज्ञिय॒स्यापि॑ भ॒द्रे सौ॑मन॒से स्या॑म ॥७॥

Sa sutrama svavam indro asmadarachchid dveshah sanutaryuyotu
Tasya vayam sumatau yagyiyasyapi bhadre saumanase syama